ماۋسىم ايىنىڭ ءبىرىنشى اپتاسىندا الەۋمەتتىك ماڭىزى بار ازىق-ت ۇلىك ونىمدەرىنىڭ ورتاشا باعا يندەكسى 0,1%-عا تومەندەدى. وڭىرلەردەگى باعا كورسەتكىشى ۆيتسە-پرەمەر سەرىك جۇمانعاريننىڭ توراعالىعىمەن وتكەن كەڭەستە قارالدى.
ساۋدا كوميتەتىنىڭ مالىمەتى بويىنشا, ءبىر اپتا ىشىندە تاۋار مەن كوكونىستىڭ 10 تۇرىنە باعا تومەندەدى: كۇرىش, قاراقۇمىق, كۇنباعىس مايى, سۇزبە, 1-سۇرىپتى ۇن, تاۋىق جۇمىرتقاسى, ماكارون ءونىمى, ءسابىز, پياز جانە قىرىققابات. كارتوپتىڭ باعاسى 4,4%-عا كوتەرىلدى. بۇل كوكونىس تۇرىنە باعانىڭ ءوسۋى استانا, الماتى, ۇلىتاۋ, ماڭعىستاۋ, اقتوبە, سولتۇستىك قازاقستان جانە جامبىل وبلىستارىندا تىركەلدى.
ساۋدا كوميتەتىنىڭ توراعاسى ايدار ابىلدابەكوۆ اتاپ وتكەندەي, ەگىستىكتەن الىنعان جاڭا ءونىمنىڭ باعاسى قازىر تۇراقسىز جانە كۇن سايىن وزگەرىپ وتىرادى. دەگەنمەن اكىمدىكتەردىڭ ەرتە شىعاتىن ونىمگە فورۆاردتىق كەلىسىمشارتتاردى ۋاقتىلى جاساسۋى باعا اۋىتقۋلارىن رەتتەي الادى.
الماتىدا الەۋمەتتىك ونىمدەردى جەتكىزۋ جاعدايىنا ەرەكشە نازار اۋدارىلدى. بۇل قالا بۇكىل ەل بويىنشا ازىق-ت ۇلىك ينفلياتسياسىنىڭ يندەكسىن قالىپتاستىرۋعا ەڭ ۇلكەن اسەر ەتەتىن ايماقتاردىڭ قاتارىندا ءبىرىنشى تۇر. ودان كەيىن استانا مەن شىمكەنت كەلەدى.
الماتىنىڭ بازارلارىن تۇراقتى باعاداعى ونىممەن تولتىرۋ ءۇشىن كوكونىستەردى تىكەلەي جەتكىزۋشىلەر ازدىق ەتەدى. وسىعان بايلانىستى سەرىك جۇمانعارين اۋىل شارۋاشىلىعى مينيسترلىگىنىڭ الدىنا جاقىن ماڭداعى وبلىستاردان كوكونىستەرگە كەپىلدىك بەرەتىن جەتكىزۋشىلەردى رەسپۋبليكالىق ماڭىزى بار ءۇش قالاعا بەكىتۋ مىندەتىن قويدى. الەۋمەتتىك-كاسىپكەرلىك كورپوراتسيالار ۇزدىكسىز جەتكىزۋ كەپىلدىگىن قامتاماسىز ەتۋگە ءتيىس.
كەڭەس قورىتىندىسى بويىنشا ۆيتسە-پرەمەر اكىمدىكتەرگە باعانى تۇراقتاندىرۋ ماسەلەلەرى بويىنشا اكك جۇمىسىن قاتاڭ باقىلاۋعا الۋدى تاپسىردى. اتاپ ايتقاندا, 2025 جىلدىڭ ماۋسىمارالىق كەزەڭىندە قازاقستاندىقتاردى تۇراقتى باعاداعى كوكونىسپەن قامتاماسىز ەتۋ ءۇشىن 2024 جىلعى 1 تامىزعا دەيىن اۋىل شارۋاشىلىعى تاۋارىن وندىرۋشىلەرىنەن ءونىم ساتىپ الۋدى قارجىلاندىرۋ قاجەت.