جاز مەزگىلىندە كۇن كۇرت ىسىسا, وڭتۇستىكتەگى جۇرتشىلىق ورتتەن قاۋىپتەنەتىنى انىق. وتكەن جىلى اباي وبلىسىندا بولعان ورمان ءورتى تالاي اتقامىنەردى ويلاندىرعان ەدى. ايتسە دە, ءتىلسىز جاۋ وسى جىلى جامبىلدىقتاردان سىرت اينالىپ وتكەن جوق.
5 ماۋسىم كۇنگى دەرەككە جۇگىنسەك, «مەركى ورماندارى جانە جانۋارلار دۇنيەسىن قورعاۋ مەكەمەسى» سارىقوبا ورمانشىلىعىنداعى ءورتتىڭ جايىلۋ كولەمى 1 750 گەكتارعا جەتكەن. ءتىلسىز جاۋمەن كۇرەسۋ ءۇشىن ءوڭىر باسشىسىنىڭ ورىنباسارى قاناتبەك مادىبەك باستاپ, باسقا دا اتقامىنەرلەر قوشتاپ, وقيعا ورنىنا جەدەل جەتكەن.
«مەركى ورمان جانە جانۋارلار دۇنيەسىن قورعاۋ مەكەمەسى» كمم-عا قاراستى سارىقوبا ورمانشىلىعىندا قۇرعاق شوپتەر مەن بۇتالار ورتەندى. ءتىلسىز جاۋمەن كۇرەسكە بارلىعى 244 ادام جانە 50 تەحنيكا تارتىلدى. ونىڭ ىشىندە جەرگىلىكتى جەردە ورمان شارۋاشىلىعى قىزمەتكەرلەرىنەن 100 ادام جانە 13 تراكتور, 2 اۆتوتسيستەرنا, سونداي-اق 12 جەڭىل اۆتوموبيل, «قازاۆياقورعاۋدىڭ» 1 تىكۇشاعى جانە 6 قىزمەتكەرى جۇمىس ىستەدى. سونداي-اق تجد جەكە قۇرامىنىڭ 84 ادامى مەن 9 تەحنيكاسى جۇمىلدىرىلدى. قوسىمشا ورمان شارۋاشىلىعىنان 31 ادام, 6 جەڭىل اۆتوكولىك, جەرگىلىكتى اتقارۋشى ورگانداردان 26 ادام, 10 تەحنيكا وقيعا ورنىنا شىقتى.
«مەركى ورمانداردى جانە جانۋارلار دۇنيەسىن قورعاۋ جونىندەگى مەكەمەسى» كمم سارىقوبا ورمانشىلىعىندا 1 800 گەكتار اۋماقتى قامتىعان ءورت 5 ماۋسىم كۇنى تاڭەرتەڭ وقشاۋلاندى. ەلدى مەكەندەرگە قاۋىپ ءتونىپ تۇرعان جوق», دەلىنگەن جەرگىلىكتى اتقارۋشى بيلىك كەلتىرگەن رەسمي مالىمەتتە.
قالاي دەسەك تە, جازدىڭ العاشقى ايىن جامبىلدىق شەنەۋنىكتەر ءتىلسىز جاۋمەن كۇرەسۋدەن باستاپ وتىر. شىلىڭگىر شىلدە ايىندا اۋا رايى 40 گرادۋستان اسىپ جىعىلاتىنى انىق. ارينە, ءورتتىڭ بەتىن اۋلاق قىلسىن, دەسە دە جاۋاپتى مەكەمەلەر كەز كەلگەن جاعدايدا ءتىلسىز جاۋمەن كۇرەسكە ساقاداي ساي دايىن بولعانى ءجون.
جامبىل وبلىسى