اۋماعىنا تۇمەنباي, تەمىرلىك اۋىلدارى كىرەتىن كەرەگە تاۋلى كەگەن اۋىلدىق وكرۋگىندە 6 مىڭعا جۋىق ءىرى قارا, 30 مىڭنان ارتىق قوي-ەشكى جانە 2 مىڭنان اسا جىلقى تىركەلگەن.
«اۋىل اماناتى» باعدارلاماسىمەن 2,5% پايىز نەسيە الىپ, جۇمىس جۇرگىزۋ ءۇشىن 4 كووپەراتيۆتىڭ نەسيە قۇجاتتاماسى دايىندالىپ, «قوناەۆ» الەۋمەتتىك-كاسىپكەرلىك كورپوراتسياسىنا جولداندى. ناتيجەسىندە, 3 كووپەراتيۆكە 86 ملن 500 مىڭ نەسيە ماقۇلداندى. سونداي-اق اتالعان باعدارلامامەن 27 ملن 600 مىڭ تەڭگە نەسيەگە «كەگەن اگروماش» اۋىلشارۋاشىلىق وندىرىستىك كووپەراتيۆى قۋاتى جوعارى 2 «YUTO» تراكتورىن جەر جىرتۋ, وڭدەۋ, ءشوپ شابۋ, تىرمالاۋ اگرەگاتتارىمەن الىپ, بانك قاراجاتى ەسەبىنەن اۋلىمىزعا ينۆەستيتسيا سالىپ وتىر», دەيدى كەگەن اۋىلدىق وكرۋگىنىڭ اكىمى رۋسلان ماسەنوۆ.
وكرۋگتە «كەڭدالا» باعدارلاماسىمەن دە 13 ملن 645 مىڭ تەڭگە قاراجات العان شارۋا قوجالىقتارى كوكتەمگى دالا جۇمىستارىن جۇرگىزۋگە قىزۋ كىرىسىپ كەتكەن.
مەملەكەتتىك باعدارلامانىڭ شاپاعاتىن قوي وسىرۋشىلەر دە كورىپ جاتىر. كەگەن اۋلىنىڭ تۇرعىنى ءابىلجان ءارىشوۆ اقساقال «اسىل تۇقىمدى مال شارۋاشىلىعىن دامىتۋ» باعدارلاماسى ارقىلى 1 351 باس «ەدىلباي» تۇقىمدى قويدى 121 ملن تەڭگەگە ليزينگكە الىپ, باعىپ وتىر.
«مال باققانعا بىتەدى» دەمەكشى, جامبىل وبلىسىنان ساتىپ الىنعان قازاقى قۇيرىقتى قىلشىق ءجۇندى قويلار قىستان قوڭدى شىعىپ, كوكتەمگى تولدەۋ ناۋقانىندا ءار ساۋلىق سوڭىنا قوزى ىلەستىرىپ, قوراسىن جاس تولگە تولتىرعان. ءشوبى شۇيگىن ءشولادىردىڭ كۇنگەيلى قىراتتارىنا جايىلىمعا شىققان قويدىڭ بۇگىنگى كۇيى كوڭىل توعايتادى. ەنەسىنىڭ ۋىزىنا جارىعان قارا قوزىلار كوك مايسانى قۋالاپ, قۇلدىراڭدايدى. ەرتە تۋعان كەپەلەردىڭ سالماعى وسى كۇنى 45 كگ-عا جەتكەن.
«تاۋلى وڭىردە بۇعان دەيىن ارقار-مەرينوس تۇقىمدى اق قويلار وسىرۋمەن اينالىستىق. اق قويدىڭ ازابى از ەمەس. ونىڭ ءتولى نازىك, سۋىققا ءتوزىمسىز بولعاندىقتان, كۇتىمدى اسا قاجەتسىنەدى. «ەدىلباي» قويى جىلقى تەكتەس سەزىمتال ءارى قيمىل-قوزعالىسى جىلدام, سۋىققا دا ءتوزىمدى. تۋا سالا ءتولى ىلەسىپ كەتە بەرەدى. قوي تولدەتۋگە اۋىلدان 5 ساقمانشى الدىق. جاسىراتىنى جوق, وسى كۇنى ساقمان تابۋ قيىن», دەيدى جاسى 80-نەن اسقان شوپان اتا.
كوپتى كورگەن كونەكوز قاريا اتاكاسىپتەن جاستاردىڭ الشاقتاپ, قول ءۇزىپ بارا جاتقانىنا الاڭداۋلى.
«مال-جانىڭ امان با؟» دەپ حال سۇراسقان حالىقتىڭ ۇرپاعىمىز. مەملەكەتتىك باعدارلامانىڭ ارقاسىندا مىڭداعان قوي قوزداتىپ, ءورىسىمىز جاس تولگە تولدى. از كۇندە تاقياتوبە دەگەن جايلاۋعا شىعارامىز. قاراعايلى تاۋدىڭ ءشوبى قۇنارلى, مالىمىز قوڭ جيناپ, كۇزدە قايتا تومەندەيدى», دەيدى «ەرسىن» شارۋا قوجالىعىنىڭ جەتەكشىسى ءابىلجان اتا.
سەكسەننىڭ سەڭگىرىنە شىققان قاريا كەگەن اۋلىندا تىرشىلىك ەتە ءجۇرىپ, 10-نان استام اسىل تۇقىمدى جىلقى, 100-گە جۋىق ءىرى قارا وسىرگەن. اتتى كۇتىپ-باپتاۋ سۇيىكتى ءىسى ەكەنىن العا تارتقان اقساقال جال-قۇيرىعى تارالعان جۇيرىكتەرى رەسپۋبليكالىق, وبلىستىق جارىستاردا سان مارتە جۇلدەمەن ورالعانىن ماقتان ەتتى. بۇل شارۋانى جۇرگىزۋدى كەنجە ۇلى ۇلان ارىشوۆكە سەنىپ تاپسىرعان. اكەنىڭ ءتالىم-تاربيەسىن ءسىڭىرىپ, كاسىبىن العا دوڭگەلەتىپ وتىرعان كاسىپكەر ۇلان ءابىلجان ۇلى دا ءوز ۇلدارىن مال باعۋعا مامانداندىرىپ ءجۇر. ۇلكەن ۇلى دياس ۆەتەرينار ماماندىعىن تاڭداپ, الماتى اۋىلشارۋاشىلىق ۋنيۆەرسيتەتىندە ءبىلىم الىپ جاتىر.
«ەرسىن» شارۋا قوجالىعىندا ءبىراز جىلدان بەرى شوپان بولىپ ەڭبەك ەتەتىن قۋاتنۇر سىرعاباي اتاجۇرتقا 2013 جىلى قونىس اۋدارعان. مالساق ازامات باققان قويىن كوزدەن تاسا قىلماي, جاي-كۇيىن كەلتىرە باعۋىنىڭ ناتيجەسىندە قىستان كۇيلى شىعارىپ, شىعىنسىز قوزداتۋعا ايرىقشا ۇلەس قوسىپتى.
«جىلدىڭ ءتورت مەزگىلىندە دە تەحنيكانىڭ كومەگى قاجەت. شارۋاشىلىققا تيەسىلى تەحنيكالارىمىز جەتكىلىكتى, دەگەنمەن كەلەشەكتە سانىن ارتتىرىپ, جاڭالاۋدى جوسپارلاپ ءجۇرمىز. مال ازىعىن قوسىمشا ساتىپ الامىز», دەيدى ۇلان ءابىلجان ۇلى.
الماتى وبلىسى