اۋليەاتادا مەملەكەتتىك رامىزدەر كۇنى «تۋعان جەرىم – قازاقستانىم!» تاقىرىبىندا پاتريوتتار فورۋمى ۇيىمداستىرىلدى. قالا تۇرعىندارى, جەرگىلىكتى اتقامىنەر ازاماتتار قاتىسقان فورۋمدا مەملەكەتتىك گيمن شىرقالىپ, ەلدىگىمىزدىڭ ايناسى – كوك بايراق كوكتە جەلبىرەدى.
ەلدىگىمىزدىڭ باستى نىشانىنا اينالعان مەملەكەتتىك رامىزدەر كۇنىنە ورايلاستىرىلعان ءىس-شارادا ءوڭىر باسشىسى ەربول قاراشوكەەۆ ءسوز الىپ, جامبىلدىق الەۋمەتتى قۇتتىقتادى.
«مەملەكەتتىك رامىزدەر – ەلدىگىمىزدىڭ بىرتۇتاستىعىن بەينەلەيتىن باستى ماقتانىشىمىز. ازاتتىق جىلدارىندا ەلىمىزدىڭ بويتۇمارىنا اينالعان رامىزدەردى قادىرلەۋ, قۇرمەتتەۋ – جاستىڭ دا, جاسامىستىڭ دا قاسيەتتى بورىشى.
رامىزدەرىمىز ارقىلى ءبىز تاتۋلىق تۋىن بارىنەن بيىك قويعان ەل ەكەنىمىزدى تورتكۇل دۇنيەگە دالەلدەپ ءجۇرمىز. جىل سايىن ءداستۇرلى تۇردە ۇيىمداستىرىلاتىن پاتريوتتار فورۋمى بيىل قاسيەت دارىپ, قۇت قونعان جامبىل وبلىسىنىڭ 85 جىلدىعىمەن تۇسپا-تۇس كەلىپ تۇر. وڭىرىمىزدە ۇيىمداستىرىلعان ءىس-شارا وبلىسىمىزداعى تاتۋلىق پەن تۇراقتىلىقتى, بىرلىگىمىزدى ارمەن قاراي نىعايتا بەرەتىنىنە سەنىم مول. تاۋەلسىزدىگىمىز ماڭگىلىك باياندى, مەملەكەتتىك رامىزدەرىمىزدىڭ مارتەبەسى ارقاشان اسقاق بولسىن», دەدى ە.قاراشوكەەۆ.
ءىس-شارا بارىسىندا وڭىردە ءپاتريوتيزمدى نىعايتۋعا, وبلىستىڭ قوعامدىق-ساياسي ءومىرىنىڭ دامۋىنا سۇبەلى ۇلەس قوسىپ جۇرگەن ازاماتتار مەن بەيبىت كۇننىڭ باتىرلارى اتانعان تۇرعىندار ءوڭىر باسشىسىنىڭ قولىنان قۇرمەت گراموتاسى مەن العىسحات الدى.
فورۋم اياسىندا ۇيىمداستىرىلعان كونتسەرتتىك باعدارلاماعا بەلسەنە قاتىسقان كەنەن ازىرباەۆ اتىنداعى وبلىستىق فيلارمونيانىڭ ونەرپازدارى رۋحتى وياتاتىن پاتريوتتىق اندەردى شىرقاپ, كوپشىلىكتىڭ ىستىق ىقىلاسىنا بولەندى. رامىزدەر كۇنىنە وراي ءوڭىردىڭ بارلىق اۋدانىندا ءتۇرلى فورماتتاعى ءىس-شارالار وتكىزىلدى.
تاراز