وتاندىق كوركەم تۋىندى لوندوندا وتكەن ەۋرازيالىق فيلمدەر فەستيۆالىندە لاۋرەات اتاندى. رەجيسسەر كاميلا ساعىنتقاننىڭ شىعارماسى «ەڭ ۇزدىك قىسقامەترلى فيلم» اتالىمىندا ۇزدىك شىقتى.
«تاۋەلسىزدىك كۇنى قۇتتى بولسىن» ءفيلمى سۇيگەن جارى باقيلىق بولىپ, ءومىردىڭ ءمانىن جوعالتقان ورتا جاستاعى ەر كىسىنىڭ تاعدىرىن سۋرەتتەيدى. ماراتتىڭ جاڭا قوعامعا كوڭىلى تولماسا دا, ءتۇرلى كەدەرگىگە قاراماستان تىعىرىقتان شىعۋدىڭ جولىن ىزدەيدى. ۇيىمداستىرۋشىلاردىڭ ايتۋىنشا, وتاندىق فيلم ساراپشىلار مەن كورەرمەندەردىڭ جوعارى باعاسىنا يە بولعان.
ء«فيلمنىڭ كوركەمدىك شەشىمى ءارى قىزىقتى مازمۇنى, قىسقا ۋاقىتتىڭ ىشىنە ءبىراز ماڭىزدى دۇنيەنى سىيعىزا العانى ۇنادى. ەكسپەريمەنتتىك ەلەمەنتتەرى دە كوڭىلدەن شىقتى. بايقاۋعا قاتىسۋشى باسقا باسەكەلەستەرىنە قاراعاندا وق بويى وزىق بولدى», دەيدى قازىلار القاسىنىڭ مۇشەسى تيمۋر احمەدجانوۆ.
«ەۋرازيالىق شىعارماشىلىق گيلدياسى» كوممەرتسيالىق ەمەس ۇيىمى ۇيىمداستىرعان كينوفەستيۆال بيىل التىنشى رەت وتكىزىلىپ وتىر. وعان قاتىسۋعا 100-گە جۋىق ۇمىتكەر نيەت بىلدىرگەن. ىشىنەن 20-سى ىرىكتەلىپ الىنىپ, باق سىناستى.
«ورتالىق ازيا كينوگەرلەرى سەنىمى نىعايا تۇسكەنى سەزىلەدى. ولار شىعارماشىلىقتارىن شىڭداپ, باتىس كورەرمەنىنە ءبىر قادام جاقىنداي ءتۇستى. ومىرىمىزگە باسقا قىرىنان قاراۋعا مۇمكىندىك بەرگەنى قۋانتادى», دەيدى ساراپشى دجون فارندون.
كينوفەستيۆال جىل سايىن جۇزدەگەن تالانتتى رەجيسسەر, اكتەر, پروديۋسەر, ستسەناريستەردىڭ باسىن قوسادى. ءىس-شارانى وتكىزۋدەگى ماقسات – ەۋرازيالىق كينونى اعىلشىنتىلدى كەڭىستىكتە ناسيحاتتاپ, ورتالىق ازيا جانە پوستكەڭەستىك كينويندۋستريا وكىلدەرىن دۇنيەجۇزىنەن جينالعان كاسىپقويلارمەن تانىستىرۋ.
« ۇلىبريتانيا حالقى بۇل فيلمدەردى ەشقاشان كورمەس ەدى. ويتكەنى بىزدە ورتالىق ازيا ونەر تۋىندىلارى ءۇشىن نارىق قالىپتاسپاعان. ءبىز بۇل ولقىلىقتىڭ ورنىن تولتىرعىمىز كەلەدى. شىعارماشىلىق ادامدارىن الەمنىڭ تۇكپىر-تۇكپىرىنەن جيناي العانىمىزعا ريزامىز», دەيدى فەستيۆالدى ۇيىمداستىرۋشى سپەنسەر حوۋكەن.
ماراپاتتاۋ سالتاناتىنىڭ سىيلى قوناقتارى قاتارىندا لوندونداعى حاۆەرينگ اۋدانىنىڭ مەرى, تمد مەملەكەتتەرى ەلشىلىكتەرىنىڭ وكىلدەرى بولدى.
ايتا كەتەيىك, جۋىردا بۋرابايدا قىسقامەترلى كينونىڭ ءۇشىنشى حالىقارالىق بايقاۋى وتەدى.