ۆەنەرا ارداشەۆانىڭ بۇل كاسىپكە كەلۋىنە اقتوبە وبلىسى كاسىپكەرلەر پالاتاسى ماماندارىنىڭ ىقپالى زور. سەبەبى بالا كۇتىمىمەن ۇيدە وتىرعان قاراپايىم انا وسىدان بىرنەشە جىل بۇرىن ەلىمىزدە «باستاۋ-بيزنەس» باعدارلاماسى تۋرالى ەستىپ, ءمان-جايدى ءبىلۋ ءۇشىن پالاتاعا كەلەدى. وسى كەزدەن باستاپ بيزنەستەگى بارلىق قادامدارىن «اتامەكەنمەن» بىرگە جۇزەگە اسىرىپ كەلە جاتىر, دەپ حابارلايدى Egemen.kz.
اقتوبە قالاسىنىڭ تۇرعىنى ۆەنەرا ارداشەۆا − كوپبالالى انا. بۇگىندە ءوز قاراجاتىنا وقۋ ورتالىعىن اشقان ول الداعى ۋاقىتتا «دامۋ» كاسىپكەرلىكتى دامىتۋ قورى ارقىلى بيزنەسىن كەڭەيتۋدى جوسپارلايدى. قايدا جۇگىنۋ كەرەك جانە قانداي قۇجاتتار پاكەتى قاجەت دەگەن ساۋالدارعا جاۋاپ الۋ ءۇشىن ءبىرىنشى كەزەكتە كاسىپكەرلەرگە قىزمەت كورسەتۋ ورتالىعىندا كەڭەس بەرىلدى. «2020 جىلى كاسىپكەرلەر پالاتاسىندا «باستاۋ-بيزنەس» باعدارلاماسى جايىندا مول ماعلۇمات الدىم. بيزنەس باستاۋ ءۇشىن تاۋەكەلگە بارۋ كەرەكتىگىن ءتۇسىندىم. ەسەپ-قيساپ, بيزنەس-جوبا قۇرۋ, ماركەتينگتىك تالداۋعا باسىمدىق بەرۋ — بيزنەس اشۋداعى العاشقى قادامدار. سوندىقتان 2021-2022 جىلداردى وسى باعىتتا وقۋعا ارنادىم», دەيدى ۆەنەرا. بۇگىندە اقتوبە قالاسىنىڭ كونە بولىگىندە «Kel, Balalar» وقۋ ورتالىعىن اشقان كاسىپكەر بۇل كاسىپتىڭ قوعامعا قانشالىقتى قاجەت ەكەنىن ءبىلۋ ماقساتىندا كوپ ىزدەنىپ, تالداۋ جۇرگىزگەن. بۇل ىستە وعان جولداسى ەرەكشە قولداۋ تانىتىپتى. «باستاۋىش سىنىپ مۇعالىمى ماماندىعى بويىنشا ءبىلىم الىپ جاتىرمىن. بيىل ديپلوم الامىن. تۇڭعىشىمىزدىڭ جاسى — 14-تە, ال كەنجەمىز — ءۇش ايلىق. الايدا كوپبالالى انا رەتىندە ۇيدە قول قۋسىرىپ وتىرعاندى ءجون كورمەي, ءبىر نارسەمەن اينالىسۋ كەرەكتىگىن ءتۇسىندىم. ويلانا كەلە, وقۋ ورتالىعىن اشۋعا بەكىندىم. سەبەبى بالامەن جۇمىس ىستەگەندى جاقسى كورەمىن ءارى ماماندىعىم دا وسى ىسكە كەلىڭكىرەيدى. ورتالىق اشۋ تۋرالى ويىمدى جولداسىم دا قۇپتادى. ول ۆاحتالىق ادىسپەن جۇمىس ىستەيدى. ءسويتىپ, ونىڭ دەمالىسىندا ەكەۋلەپ وقۋ ورتالىعىن قالانىڭ قاي بولىگىنەن اشۋدى ۇزاق ويلاستىرىپ, تالداۋ جۇرگىزۋگە كىرىستىك», دەپ ءبولىستى ۆەنەرا ارداشەۆا. ونىڭ ايتۋىنشا, ورتالىققا سۇرانىس بولۋ كەرەك.
«ەگەر سۇرانىس بولماسا, وندا بيزنەسىڭ قۇردىمعا كەتەدى. اقتوبە قالاسىنىڭ ەسەت باتىر تۇرعىن الابىندا تۇراتىندىقتان, اۋەلى وسى ماڭنان اشۋدى كوزدەدىك, بىراق مۇنداعى 4-اۋداندا مۇنداي ورتالىقتىڭ بارىنا كوز جەتكىزدىم. قۇرمىش اۋدانىنا مۇنداي ورتالىقتىڭ قاجەت ەكەنىن وسى اۋداندا كوشە بويى تۇرعىندارعا جۇرگىزگەن ساۋالنامام مەن تالداۋىمنىڭ ارقاسىندا جاقسى ءتۇسىندىم», دەيدى ورتالىق جەتەكشىسى. قازىر ۆەنەرا ءبىر عيماراتتىڭ ءۇش بولمەسىن جالعا الىپ وتىر. ەكى اۋىسىمدا جۇزگە تارتا بالانى وقىتۋعا جاعداي جاساۋعا كىرىسكەن. ول ءۇشىن كاسىپكەر ءوز قاراجاتىنا جاڭا پارتالار مەن ورىندىقتار, وقۋعا, كورنەكىلىككە قاجەتتى قۇرال-جابدىقتار ساتىپ الىپتى. جۇمىستى بيىل ساۋىردە باستاپ كەتتى. قازىر جيىرماعا تارتا بالاعا ءدارىس بەرىپ جاتىر. 5 ادامدى تۇراقتى جۇمىسپەن قامتىپ وتىر. ونىڭ ءبىرى لوگوپەد مامان بولسا, ەكەۋى — باساۋىش سىنىپ مۇعالىمدەرى. قازىر ورتالىقتا جازعى لاگەرگە بالا قابىلدانىپ جاتىر.
«ورتالىق اشۋدا اقتوبە وبلىستىق پالاتاسى تاراپىنان جۇرگىزىلگەن سەمينار, ترەنينگتەر كوپ پايداسىن بەردى. وسىنداي ءىس-شارالارعا قاتىسۋدىڭ ناتيجەسىندە كوپتەگەن ادامدارمەن تانىسىپ, كاسىپكەرلەرمەن جاقىن ارالاسا باستادىم. ۇيدە وتىرعان قاراپايىم انادان ورتالىق جەتەكشىسى بولۋعا دەيىنگى ارالىقتا كوپ ەڭبەكتەنۋىمە تۋرا كەلدى. اسىرەسە بۋحگالتەرلىك ەسەپتەردى جۇرگىزۋ ءۇشىن پالاتادان تەگىن كەڭەس الۋدىڭ ارقاسىندا وسىنداي دارەجەگە جەتتىم. ورتالىق اشىپ, ءوز الدىما بيزنەسىمدى باستاسام دا, ءالى كۇنگە دەيىن پالاتا ماماندارىنان كەڭەس الىپ وتىرامىن. ولار قاي ۋاقىتتا بارسام دا, حابارلاسسام دا تەگىن كەڭەس بەرۋگە دايىن», دەيدى ورتالىق جەتەكشىسى.
ۆەنەرانىڭ ايتۋىنشا, جاڭا وقۋ جىلىنان باستاپ ورتالىق وقۋ باعدارلاماسى نەگىزىندە تولىق جۇمىس ىستەيتىن بولادى. ول الداعى ۋاقىتتا «Darabala.kz» باعدارلاماسى نەگىزىندە جۇمىس جۇرگىزۋ تاسىلىنە كوشۋدى دە ويلاستىرىپ وتىر.