بيىل قىتايدا وتەتىن جاستار اراسىنداعى ازيا بىرىنشىلىگىنە قاتىساتىن ۇستەل تەننيسشىلەرى الماتىدا انىقتالدى. بۇل جارىستا ەلىمىزدىڭ ۇلدار كومانداسى ەكىنشى ورىن الدى. الدىمىزدا – يران. ءدال سول پارسى ەلى وكىلدەرى مەن وزبەكستاندى العا جىبەرگەن قىزدارىمىز ءۇشىنشى ساتىعا تابان تىرەدى. ءبىزدىڭ كوماندا قۇرامىندا الان قۇرمانعاليەۆ, سارۆينوز مىرقادىروۆا, جانەركە كوشكىمباەۆا, تاعى باسقا تانىمال سپورتشىلار ونەر كورسەتتى.
كاسىپقوي رينگتە اسا جەڭىل سالماقتا (53,5 كگ) كۇش سىناسىپ جۇرگەن قازاق قىزى بالاۋسا مۇزديمان (3-0, 2 كو) ءوزىنىڭ كەلەسى كەزدەسۋىن 1 مامىردا الماتىدا وتكىزەدى. بەلگىلى باپكەر ساعات مۇساحانوۆتىڭ شاكىرتى ۇندىستاندىق مونيكا سينگحپەن (5-1, 3كو) قولعاپ تۇيىستىرەدى.
يتاليانىڭ تودي قالاسىندا ستەند اتۋدان «Green Cup» ءتۋرنيرىنىڭ تۇساۋى كەسىلدى. 300 سپورتشىنىڭ قاتىسۋىمەن ءوتىپ جاتقان جارىستىڭ العاشقى كۇنى نيكيتا مويسەەۆ «تراپتا» قولا مەدالدى يەلەندى. جاتتىعۋدىڭ ءدال سول تۇرىندە قۇرامىندا مويسەەۆتەن بولەك, اسىلحان ايسالباەۆ پەن بوگدان كونچەنكو سىندى مەرگەندەرى بار ءبىزدىڭ كوماندا ۇزدىك ۇشتىكتى تۇيىندەدى.
2023/24 جىلعى فۋتبول ماۋسىمىنىڭ قورىتىندىسى بويىنشا ەۋروپانىڭ ەڭ مەرگەن ويىنشىسى انىقتالدى. ءداستۇرلى «التىن بۋتسى» بۇل جولى ميۋنحەننىڭ «باۆارياسى» مەن انگليا ۇلتتىق قۇراماسىنىڭ شابۋىلشىسى حارري كەينگە بۇيىردى. بيىل ول بۋندەسليگادا 36 گول سوقتى. ەكىنشى جانە ءۇشىنشى ورىنداردا – گۆينەيالىق سەرۋ گيراسسي («شتۋتگارت», 28 گول) مەن فرانتسيالىق كيليان مباپپە («پاري-سەن-جەرمەن», 27 گول).
فۋتزالدان بيىل كۇزدە وزبەكستاندا جالاۋى جەلبىرەيتىن الەم چەمپيوناتىنىڭ جارىس كەستەسى بەلگىلى بولدى. D توبىنا ونەر كورسەتەتىن قازاقستان قۇراماسى تۇساۋكەسەر ويىنىن 15 قىركۇيەكتە يسپانياعا قارسى وتكىزەدى. 18 قىركۇيەكتە ليۆيا جانە 21 قىركۇيەكتە جاڭا زەلانديامەن شەبەرلىك بايقاسامىز.
تەننيسشىلەردىڭ الەمدىك رەيتينگى جاڭارتىلدى. توپ-200 ويىنشىنىڭ قاتارىنا ەنگەن وتانداستارىمىزدىڭ ناتيجەلەرى مىناداي: ەلەنا رىباكينا – 4-ورىن, الەكساندر بۋبليك – 17-ورىن, يۋليا پۋتينتسەۆا – 39-ورىن, الەكساندر شەۆچەنكو – 59-ورىن, ميحايل كۋكۋشكين – 136-ورىن, دەنيس ەۆسەەۆ – 167-ورىن, بەيبىت جۇقاەۆ – 171-ورىن, تيموفەي سكاتوۆ – 199-ورىن. ەرلەر مەن ايەلدەر اراسىندا سەربيالىق نوۆاك دجوكوۆيچ پەن پولشالىق يگا سۆەنتەك كوش باستاپ تۇر.
وزبەكستاننىڭ اتاقتى سپورتشىسى وكسانا چۋسوۆيتيناعا بىرقاتار رەكوردتىق كورسەتكىش تيەسىلى. ول 1992-2021 جىلدار ارالىعىندا 8 وليمپيا ويىندارىنا قاتىستى. جەر-جاھانداعى بىردە-ءبىر گيمناسشى وسىنداي كورسەتكىشىمەن ماقتانا المايدى. سونىڭ ارقاسىندا وكسانانىڭ ەسىمى گيننەسس رەكوردتار كىتابىنا ەندى. اتاقتى سپورتشى 1992 جىلى بارسەلونادا التىن, 2008 جىلى بەيجىڭدە قولا مەدالدى ولجالادى. الەم چەمپيوناتىندا 11 رەت (3 التىن+4 كۇمىس+4 قولا) جەڭىس تۇعىرىنا كوتەرىلدى. بيىل جازدا چۋسوۆيتينا 49 جاسقا تولادى. سوعان قاراماستان ول پاريج وليمپياداسىندا ونەر كورسەتۋ ءۇشىن جاتپاي-تۇرماي دايارلاندى. بىراق ازيا چەمپيوناتىندا جاراقات الۋىنا بايلانىستى تورتجىلدىقتىڭ باستى دوداسىنان شەت قالدى. ءسويتىپ, وكسانا چۋسوۆيتينا ءوزىنىڭ توعىزىنشى وليمپياداسىنا بارا المايتىن بولدى.
1 ماۋسىمدا الماتىداعى ADD ارەنادا كاسىپقوي بوكس كەشى وتەدى. سول جارىستىڭ باستى جەكپە-جەگىندە ەلىمىزدىڭ قوس بوكسشىسى – ۆيكتور كوتوچيگوۆ (14-2, 5 كو) پەن ميراس ەرتانوۆ (5-1, 3 كو) ءوزارا كۇش سىناسادى. سونداي-اق اتالعان تۋرنيردە الىس-جاقىن شەت مەملەكەتتەردەن كەلگەن تاعى بىرقاتار بىلعارى قولعاپ شەبەرلەرى قولعاپ تۇيىستىرەدى.
حالىقارالىق حوككەي فەدەراتسياسى (يحف) ءوز رەيتينگىن جاڭارتتى. ۇزدىكتەر تىزىمىندە 3 305 ۇپاي جيعان قازاقستان 15-ساتىعا جايعاستى. ال كوش باسىندا – كانادا قۇراماسى (4 100). سونداي-اق توپ-5-تىكتىڭ قاتارىنا رەسەي (4 065), فينليانديا (3 955), چەحيا (3 945) جانە شۆەيتساريا (3 945) كوماندالارى ەندى.