الدا بالالاردى جازعى دەمالىس كۇتىپ تۇر. ءبىلىم سالاسىنداعى ماماندار مەن اتا-انالاردىڭ موينىندا ەندى مىنانداي جاۋاپكەرشىلىك بار: بالانى بەيساۋات جۇرىستەن تىيىپ, جازعى ۋاقىتىن دۇرىس ۇيىمداستىرۋ, قاۋىپسىزدىگىن قامتاماسىز ەتۋ.
مەكتەپ جانىنداعى جانە قالا سىرتىنداعى لاگەرلەر وقۋشىلاردى قابىلداۋعا قىزۋ دايىندىققا كىرىسكەن. ولاردىڭ جۇمىسى 3 ماۋسىمدا باستالادى. وبلىستىق ءبىلىم باسقارماسى باسشىسىنىڭ ورىنباسارى باقتىگۇل ادەكەنوۆا ايماقتا 160 مىڭ بالا لاگەرلەرگە بارادى دەيدى.
«قالا سىرتىنداعى لاگەرلەرگە 7 مىڭ, مەكتەپ جانىنداعى لاگەرلەرگە 140 مىڭنان استام بالا بارادى. ەرەكشە ءبىلىم بەرۋ قاجەتتىلىگى بار 2 مىڭ بالاعا ءوز مەكتەپ-ينتەرناتتارىندا لاگەر ۇيىمداستىرىلادى. قوسىمشا ءبىلىم ۇيىمدارى كەستەمەن جۇمىس ىستەي بەرەدى. 1 ماۋسىمدا پريشاحتينسكىدە جاڭا وقۋشىلار سارايى اشىلادى. 600 بالاعا ارنالعان «كاۋسار» سارايىنىڭ عيماراتى بارلىق ستاندارتقا ساي. قوسىمشا ءبىلىم ءۇشىن بارلىق جاعداي قاراستىرىلعان. HI-TECH, شىعارماشىلىق شەبەرحانالارى, حورەوگرافيا زالى, ART-ستۋديا, دىبىس جازۋ ستۋدياسى, تەلەۆيدەنيە جانە فوتوستۋديا, VR-ارحيتەكتۋرا جانە WEB-ديزاين ستۋدياسى, Intellectum-ستۋديا, روبوتتەحنيكا جانە تەحنيكالىق شىعارماشىلىق ستۋدياسى, STEM زەرتحانا, مۋزىكا ستۋدياسى, ەكولوگيالىق ورتالىق باعىتتارى جۇمىس ىستەيدى. مۇنداي ساراي مايقۇدىقتا دا اشىلادى دەگەن جوسپار بار», دەيدى ب.ناۋقانبايقىزى.
1–31 تامىز ارالىعىندا مەكتەپكە دەيىنگى ۇيىمداردىڭ تاربيەلەنۋشىلەرىن توپتارعا اۋىستىرا باستايدى. بۇگىنگى تاڭدا وبلىستا 411 مەكتەپكە دەيىنگى ۇيىم جۇمىس ىستەيدى. ولاردا 39 323 بالا قامتىلعان. بۇل 2 جاستان 6 جاسقا دەيىنگى بالالاردىڭ 82,6 پايىزىن قۇرايدى.
مەكتەپكە دەيىنگى ۇيىمداردا جاڭا ورىندار قۇرۋ جۇمىستارى اتقارىلىپ جاتىر. وسى جىلى 2 مىڭعا جۋىق جاڭا ورىن اشۋ جوسپارلارىندا بار. جىل باسىنان بەرى اباي, وساكاروۆ, بۇقار جىراۋ اۋداندارى مەن شاحتينسك قالاسىندا 343 ورىن اشىلعان. قازىرگى ۋاقىتتا «ينديگو» مەن ۇببدق جۇيەلەرى بىرىڭعاي رەسپۋبليكالىق كەزەككە كوشىرۋ اياسىندا بىرىكتىرىلىپ جاتىر. بىرىڭعاي كەزەك ەنگىزىلگەننەن كەيىن اتا-انالار ورىن «ۇستاپ الۋعا» تىرىسپايتىن بولادى. جۇيە بوس ورىندار تۋرالى اۆتوماتتى تۇردە حابارلاپ وتىراتىن بولادى.
قازىر 1-سىنىپقا قۇجات قابىلدانىپ جاتىر. ول 31 تامىزعا دەيىن جالعاسادى. ءوتىنىمدى ەGov, ء«بىلىمال» جۇيەسى ارقىلى «1-سىنىپقا قابىلداۋ» مەملەكەتتىك كورسەتىلەتىن قىزمەتتەر پورتالىندا جانە قاعاز جۇزىندە بەرۋگە بولادى. بيىل 1-سىنىپقا 16 مىڭنان استام وقۋشى بارادى.
قاراعاندى وبلىسى