مەملەكەتتىك اسكەري-تاريحي مۋزەيدە تاۋەلسىز قازاقستاننىڭ تۇڭعىش قورعانىس ءمينيسترى, كەڭەس وداعىنىڭ باتىرى, حالىق قاھارمانى ارميا گەنەرالى ساعادات نۇرماعامبەتوۆتىڭ 100 جىلدىعىنا ارنالعان «حالىق جۇرەگىندەگى قاھارمان» اتتى كورمە اشىلدى, دەپ حابارلايدى Egemen.kz.
كورمەنىڭ سالتاناتتى اشىلۋىنا مەملەكەتتىك اسكەري-تاريحي مۋزەيدىڭ باسشىسى ءلاززات ءالجان, قارۋلى كۇشتەردىڭ ارداگەرلەرى, مەرزىمدى قىزمەتتىڭ اسكەري قىزمەتشىلەرى, ارميا گەنەرالى س. نۇرماعامبەتوۆ اتىنداعى اسكەري كوللەدجدىڭ كادەتتەرى جانە باتىردىڭ تۋىستارى قاتىستى.
تۇڭعىش قورعانىس ءمينيسترى تۋرالى قىزىقتى ەستەلىكتەر ايتقان گەنەرال-لەيتەنانت باقىتجان ەرتاەۆ باتىرمەن بولعان ەستەن كەتپەس كەزدەسۋلەرگە دە توقتالدى. ارميا گەنەرالى ساعادات نۇرماعامبەتوۆ وتە قاراپايىم بولاتىن, اسكەري بولىمدەرگە دە ءجيى بارىپ تۇردى. ءتىپتى, قاراماعىنداعىلاردىڭ ەسىمىن جاتقا بىلەتىنىن اتاپ ءوتتى.
باتىردىڭ قىزى ايسۇلۋ ساعاداتقىزى نۇرماعامبەتوۆا حالىق قاھارمانىنىڭ ومىرىنەن قىزىقتى ەستەلىكتەردەن سىر شەرتتى.
«ول كىسىنىڭ ءومىربايانى ۆزۆود كومانديرىنەن باستاپ مينيسترگە دەيىنگى جاۋىنگەرلىك جولدان تۇرادى. اكەم قۋاتتى, زاماناۋي جانە ۇتقىر ارميانى ارماندادى. ومىرلىك ۇستانىمى تۋعان حالقى مەن ەلىنە قىزمەت ەتۋ بولاتىن», دەدى ايسۇلۋ ساعاداتقىزى.
ەكسپوزيتسيادا ساعادات قوجاحمەت ۇلىنىڭ ارميا گەنەرالىنىڭ سالتاناتتى كيىم نىسانى, قۇجاتتار مەن ناگرادالارى, سوعىس كەزىندەگى, سوعىستان كەيىنگى جىلدار مەن قازاقستان قارۋلى كۇشتەرىن باسقارۋ كەزەڭىنەن سىر شەرتەتىن سيرەك فوتوسۋرەتتەرى قويىلعان. باتىردىڭ 1994 جىلى الماتىدا اقش قورعانىس ءمينيسترى ۋيليام پەرريمەن كەزدەسۋىن جانە 2005 جىلى 9 مامىردا نيۋ-يوركتە وتكەن ەكىنشى دۇنيەجۇزىلىك سوعىستىڭ اياقتالۋىنىڭ 60 جىلدىعىنا ارنالعان بۇۇ-نىڭ سالتاناتتى وتىرىسىنا قاتىسۋىن بەينەلەيتىن فوتوسۋرەتتەرى ەرەكشە قىزىعۋشىلىق تۋدىرادى.
ءىس-شارا ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ شىعارماشىلىق ۇجىمى دايىنداعان كونتسەرتپەن اياقتالدى. ورتالىق ءانسامبلدىڭ ءسوليسى داۋرەن تولەۋباەۆ كورمەگە كەلۋشىلەر ءۇشىن «ساعادات» ءانىن ورىندادى.