«ساليقالى ۇرپاق» قورى سۋ تاسقىنىنان زارداپ شەككەن اۋىلدارعا كيىز ۇيلەر جىبەردى. حالىقتىڭ سۇرانىسىنا وراي ساتىپ الىنعان كيىز ۇيلەر ارقالىق قالاسىنا قاراستى ەكىدىڭ جانە قىزىل جۇلدىز ەلدى مەكەندەرىنە جونەلتىلدى.
قوستاناي وڭىرىندەگى بۇل اۋىلداردى سۋ باسىپ, ۇيلەر قيراپ, شاراسىز قالعان حالىق تۇگەل كوشىرىلگەن ەدى. سوندىقتان قوعامدىق قوردىڭ مۇشەلەرى جەرگىلىكتى تۇرعىنداردىڭ جانايقايىن تىڭداپ, قانداي مۇقتاجدىق باسىم ەكەنىن ءبىلىپ, جاعدايدى كوزبەن كورۋ ءۇشىن وسى اۋىلدارعا ارنايى بارعان. ۋاقىتشا پانالايتىن كيىز ءۇي سۇراعان حالىقتىڭ تىلەۋى كوپ ۇزاماي ورىندالدى.
– سۋ تاسقىنىنىڭ سالدارىنان تىرنەكتەپ جيناعان بارلىق دۇنيە-مۇلكىنەن, مالىنان ايرىلعان حالىقتىڭ جاعدايى ءالى كۇنگە دەيىن كۇردەلى ەكەنىنە كوزىمىز جەتتى. تۇرعىنداردىڭ كوپشىلىگى پانالايتىن ورىن تاپپاي قينالىپ وتىر ەكەن. سوندىقتان كوپتىڭ تىلەۋى كيىز ءۇي بولدى. ءبىز جينالعان حالىققا ۋادە ەتىپ, بىردەن تاپسىرىس بەردىك. تاپسىرىسىمىز ۋاقىتىندا دايىن بولىپ, مىنەكەي, بۇگىن كيىز ۇيلەردى اۋىل ىشىنە قۇرىپ, حالىققا تابىستادىق. باستىسى, كيىز ۇيلەردىڭ ساپاسىنا ءمان بەردىك. بارلىعى تالاپقا ساي جاسالدى. جەرگىلىكتى حالىق ريزاشىلىعىن, شەكسىز العىسىن ءبىلدىرىپ جاتىر. قانداي قيىنشىلىق بولسا دا, حالىقپەن بىرگە بولايىق, – دەيدى «ساليقالى ۇرپاق» قوعامدىق قورىنىڭ ديرەكتورى قاسىم قاسابەكوۆ.
سۋ تاسقىنى كەزىندە ارقالىق قالاسىنا قاراستى ەكىدىڭ جانە قىزىل جۇلدىز اۋىلىنىڭ تۇرعىندارى تىكۇشاقتىڭ كومەگىمەن قاۋىپسىز ايماققا, ارقالىق قالاسىنداعى ەۆاكۋاتسيالىق پۋنكتتەرگە كوشىرىلگەن ەدى. جالپى, قالا اۋماعىنداعى سۋ باسقان اۋىلداردا 87 ءۇي, ال تەك ەكىدىڭ اۋىلىنىڭ وزىندە 38 باسپانا تۇرۋعا جارامسىز دەپ تانىلعان. بۇگىندە جاڭا ۇيلەردىڭ قۇرىلىسى باستالىپ, حالىققا بىرتە-بىرتە وتەماقى تولەنىپ, شىعىن وتەلىپ, كاسىپكەرلەر تاراپىنان دا ءتيىستى كومەك كورسەتىلىپ جاتىر.