بۇگىن – سوڭعى قوڭىراۋ

كەشە ەلىمىزدەگى مەكتەپتەردىڭ 1-10 سىنىپ وقۋشىلارى ءۇشىن وقۋ جىلىنىڭ اياقتالۋىنا وراي ء«بىلىمىم – وتانىما» اتتى بىرىڭعاي سىنىپ ساعاتتارى وتكىزىلدى. ال بۇگىن, ياعني 25 مامىر كۇنى وقۋ-اعارتۋ مينيسترلىگىنىڭ بەكىتكەن جوسپارىنا سايكەس ورتا ءبىلىم بەرۋ ۇيىمدارىندا مەكتەپ تۇلەكتەرى­نە ارنالعان «مەكتەبىم, ساعان مىڭ العىس!» اتتى سالتاناتتى جيىن وتكىزىلەدى.

جاۋاپتى مينيسترلىكتىڭ تاراتقان اقپاراتىنا سۇيەنسەك, بيىلعى وقۋ جىلىن باس-اياعى 22 مىڭنان اسا مەكتەپكە دەيىنگى, ورتا ءبىلىم, تەحنيكالىق جانە كاسىپتىك ءبىلىم وشاقتارى اياقتايدى. ال بۇل ۇيىمداردا وسى وقۋ جىلىندا 5 ميلليوننان كوپ بالا ءبىلىم مەن تاربيە الدى. ونىڭ ىشىندە, جوعارىدا جازعانىمىزداي, 4 ميلليونعا تارتا وقۋشى مەكتەپتە وقىدى. وسىنشاما بالانىڭ 341 مىڭنان كوبى 9-سىنىپتى اياقتايدى, بىلتىر 9-سىنىپتى 288 مىڭنان اسا وقۋشى تامامداعان. ولاردىڭ اراسىندا 10-سىنىپتى جالعاستىراتىنى دا, كوللەدج­گە وقۋ­عا كەتەتىندەرى دە بولادى. ءدال سول وقۋىن تەحنيكالىق جانە كاسىپتىك ءبىلىم وشاقتارىندا جالعاستىرۋدى قۇپ كورە­تىندەرگە دە بۇگىن مەكتەپتەگى سوڭعى قوڭىراۋ سوعىلادى.

وسىلايشا, وقۋ-اعارتۋ ءمي­نيس­ترىنىڭ بۇيرىعىنا سايكەس مەك­تەپتەردە وقۋ مەرزىمى رەسمي تۇردە بۇگىن اياقتالادى. بىراق كەيبىر سىنىپتاردىڭ وقۋشىلارى ءۇشىن الدا ەمتيحاندار بار. ايتپاقشى, بيىل العاش رەت 5-8, 10 سىنىپتاردا قازاق ءتىلىن مەڭگەرۋ دەڭگەيىن باعالاۋ ماقساتىندا قازاق جانە باسقا دا وقىتۋ تىلدەرى بار مەكتەپتەر ءۇشىن قازاق ءتىلى بويىنشا ارالىق ەمتيحاندار وتكىزىلەدى. 5-11 سىنىپ وقۋشىلارىنا 27 مامىردان باستاپ ەمتيحاندار باستالادى. 9-سىنىپ وقۋشىلارىنىڭ ەمتيحاندارى 29 مامىردان 10 ماۋسىمعا دەيىن جالعاسادى. 11 سىنىپتار ءۇشىن قورىتىندى ەمتيحاندار 28 مامىر مەن 11 ماۋسىم ارالىعىنا جوسپارلانعان. اتتەستاتتاردى سالتاناتتى تۇردە تاپسىرۋ 12-15 ماۋسىم ارالىعىندا وتەدى. وسى جەردە ەسكە سالا كەتۋ كەرەك, ەمتيحانداردان بوساتىلعان وقۋشىلار دا بار. بۇل تۋرالى وقۋ-اعارتۋ ءمينيسترى عاني بەيسەمباەۆ اپتا باسىنداعى ۇكىمەت وتىرىسىندا: «پرەمەر-ءمينيستردىڭ تاپسىرماسىنا سايكەس جانە تابيعي سيپاتتاعى توتەنشە جاعداي جاريالانۋىنا بايلانىستى اتىراۋ, اقتوبە, سولتۇستىك قازاقستان وبلىستارىنىڭ 3 581 وقۋشى­سى ارالىق جانە قورىتىندى ەمتي­حانداردان بوساتىلادى. قورىتىندى باعا ولارعا جىلدىق باعالار نەگىزىندە قويى­­لادى», دەگەن بولاتىن. ال 156 مىڭ تەحنيكالىق جانە كاسىپ­تىك ءبىلىم بەرۋ ۇيىمدارىن بىتىرۋشىلەر ءۇشىن قورىتىندى اتتەستاتتاۋ 28 ماۋسىمعا دەيىن جۇرگىزىلەدى, ال ديپلوم تاپسىرۋ ءراسىمى 28 ماۋسىم مەن 1 شىلدە ارالىعىندا وتەدى.

وقىپ وتىرعان وقىرماندا, اسىرەسە بالالارىنىڭ دەمالىسىن ولاردان دا اسىعا كۇتەتىن اتا-انالاردا «دەمالىس قاشان؟» دەگەن سۇراق تۋاتىن شىعار. دەمالىس ماسەلەسىنە كەلسەك, باس­تاۋىش سىنىپ وقۋشىلارى مامىر ايىنىڭ سوڭعى كۇندەرىنەن ءداستۇرلى تۇردە جازعى دەمالىس­قا شىعادى. ال قالعان مەكتەپ وقۋشىلارىنا ەمتيحانداردان كەيىن جازعى دەمالىس باستالادى. مينيستر ع.بەيسەمباەۆ اپتا باسىنداعى ۇكىمەت وتىرىسىندا سۋ تاسقىنىنان زارداپ شەككەن جانە اۋا رايىنىڭ قولايسىزدىعىنا بايلانىستى قىسقى ۋاقىتتا قاشىقتان وقىعان 2 622 مەك­تەپتىڭ 832 مىڭ وقۋشىسىنا 27-31 مامىر ارالىعىندا «جازعى مەكتەپ» جۇمىسى ۇيىمداستىرىلاتىنىن ايتتى. ءمينيستردىڭ ايتۋىنشا, «قازاقستان حالقىنا» قورىنىڭ قولداۋىمەن «QH جازدىق جولداما» جوباسى شەڭبەرىندە 20 مىڭ بالا تەگىن دەمالادى. ولاردىڭ ىشىندە سۋ تاسقىنىنان زارداپ شەككەن وڭىرلەردىڭ وقۋشى­لارىنا, حالىقتىڭ الەۋ­مەتتىك وسال توپتارىنىڭ بالالا­رىنا جانە اۋىلدىق جەرلەردەن كوپبالالى وتباسىلارعا باسىمدىق بەرىلەدى.

وسى جولداردى جازىپ جات­قاندا وقۋ-اعارتۋ ءمينيسترى ع.بەيسەمباەۆ 2023-2024 وقۋ جى­لى­نىڭ اياقتالۋىنا وراي قۇت­تىقتاۋىن جاريالادى. ول ءوزىنىڭ قۇتتىقتاۋىندا: «قۇر­مەتتى ارىپتەستەر, اتا-انالار, وقۋشىلار! وسى وقۋ جىلىن­دا وقۋشىلارىمىز 10 حالىق­ارالىق وليمپيادادا 243 مەدال جەڭىپ الدى. ونىڭ ىشىندە 20 – التىن, 95 – كۇمىس, 128 – قولا مەدال بار. سىزدەردى شىن جۇرەكتەن قۇتتىقتايمىن جانە مۇنىمەن توقتاپ قال­ماۋ­دى تىلەيمىن! قۇرمەتتى پەدا­گوگ­تەر! بيىلعى كوكتەم, اسىرە­سە باتىس جانە سولتۇستىك وڭىر­لەر­دەگى ارىپتەستەرىمىزگە اۋىرت­پا­شى­لىق الا كەلدى. 26 مىڭنان اسا ءبىلىم بەرۋ قىزمەتكەرلەرى سۋ تاسقىنىنا قارسى كۇرەستە ال­دىڭعى قاتاردا بولدى. قيىن­­­دىق­تارعا مويىنسۇنباي, اعار­تۋ­شى­لىق ميسسيانى ادال ات­قار­دىڭىزدار. قۇرمەتتى تۇلەكتەر! سىزدەر ءومىردىڭ جاڭا, جاۋاپتى كەزەڭىنە اياق باسقالى تۇرسىزدار, بۇل سىزدەرگە عانا ەمەس, ءبارىمىز ءۇشىن – اتا-انالار, مۇعالىمدەر, تالىمگەرلەر ءۇشىن دە جان تەبىرەنتەر ءسات. بيىل 150 مىڭنان اسا كوللەدج ءبىتىرۋشى ديپلوم يەلەنىپ, تولىققاندى مامان بولادى. سىزدەرگە اق جول تىلەيمىن!», دەپ اقجارما پەيىلىن اقتاردى.