2024 جىلعى 1 مامىرداعى جاعداي بويىنشا بجزق-دا الۋشى سالىمشىلاردىڭ جەكە جانە شارتتى شوتتارىندا شامامەن 19 ترلن تەڭگە جينالدى. ءبىر جىل ىشىندە زەينەتاقى جيناقتارى 3,3 ترلن تەڭگەدەن استامعا نەمەسە 21,1%-عا ءوستى. بۇل تۋرالى بجزق ءباسپاسوز ورتالىعى حابارلادى, دەپ جازادى Egemen.kz.
زەينەتكەرلىك جاسقا تولۋىنا بايلانىستى بىرىڭعاي زەينەتاقى قورىنان تولەنەتىن كەستە بويىنشا ورتاشا ايلىق تولەم مولشەرى 33 858 تەڭگەنى, ال اي سايىنعى تولەمنىڭ ەڭ جوعارى مولشەرى 945 752 تەڭگەنى قۇراعانىن ايتا كەتەيىك.
ەستەرىڭىزگە سالا كەتەيىك, وتكەن جىلدىڭ وسى كەزەڭىندە بىرىڭعاي زەينەتاقى قورىنان تولەنەتىن كەستە بويىنشا ورتاشا ايلىق تولەم مولشەرى 32 090 تەڭگەنى, ال اي سايىنعى تولەمنىڭ ەڭ جوعارى مولشەرى 742 692 تەڭگەنى قۇراعان ەدى.