قازاقستان ۇكىمەتى سۋ تاسقىنىنان زارداپ شەككەن ازاماتتارعا كەلتىرىلگەن شىعىندى وتەۋ جۇمىستارىن ءالى دە جالعاستىرىپ كەلەدى. سۋ تاسقىنىنان كەيىن 356 وتباسى قيراعان باسپاناسىنىڭ ورنىنا تۇرعىن ءۇي مەن پاتەر الدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
بۇگىنگى تاڭدا 29 625 وتباسى 10,7 ملرد تەڭگەدەن استام سوماعا 100 اەك مولشەرىندە بىرجولعى تولەم الدى, بارلىعى 30 912 ءوتىنىم قابىلداندى. اتالعان جۇمىستار قوستاناي, اقتوبە, اقمولا, باتىس قازاقستان, قاراعاندى, پاۆلودار, اباي, ۇلىتاۋ وبلىستارىندا تولىعىمەن اياقتالدى. جۇمىس اتىراۋ جانە سولتۇستىك قازاقستان وبلىستارىندا جالعاسىپ جاتىر.
زارداپ شەككەن وڭىرلەردە 8 863 نىسان بويىنشا زالالدى باعالاۋ جۇمىستارى اياقتالدى.
356 وتباسى جاڭا ۇيلەر مەن پاتەرلەرگە يە بولدى. 1 472 ءۇي سالىنىپ جاتىر. 1 389 ۇيدە جوندەۋ جۇمىستارىن جۇرگىزۋگە 5,2 ملرد تەڭگەدەن استام قاراجات ءبولىندى. 3 804 وتباسى ماتەريالدىق شىعىن ءۇشىن جالپى سوماسى 657 ملن تەڭگەگە وتەماقى الدى.
ايتا كەتۋ كەرەك, مال شىعىنى ءۇشىن بەرىلگەن تولەم كولەمى 1,6 ملرد تەڭگەگە جەتتى.
كەلتىرىلگەن زياندى وتەۋ جۇمىستارى جالعاسۋدا جانە تۇراقتى باقىلاۋعا الىنعان.