ىستانبۇلدا تۇركى ينۆەستيتسيالىق قورىنا مۇشە باسقارۋشى ەلدەر كەڭەسىنىڭ (تيق) العاشقى ۇلىقتاۋ وتىرىسى ءوتتى. پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ قازاقستان تاراپىنان قوردىڭ باسقارۋشىلار كەڭەسىنىڭ وكىلى بولدى.
تۇركى ينۆەستيتسيالىق قورى – تۇركى الەمى ەكونوميكالىق ينتەگراتسياسىنىڭ العاشقى بىرلەسكەن قارجى ينستيتۋتى. قوردىڭ باستاپقى كاپيتالى $500 ملن-دى قۇرايدى. ونى قۇرۋدىڭ باستى ماقساتى – تۇركى ەلدەرى اراسىنداعى ەكونوميكالىق جانە كوممەرتسيالىق قاتىناستاردىڭ دامۋىن قامتاماسىز ەتۋ. تۇركيا قارجى مينيسترلىگىنىڭ باعالاۋىنشا, 2024 جىلدىڭ سوڭىنا قاراي تۇركى مەملەكەتتەرى الەمدىك ەكونوميكادا ماڭىزدى ورىن الادى. ياعني ەكونوميكا كولەمى $1,9 ترلن-عا جانە حالىق سانى 178 ملن ادامعا جەتەدى دەپ كۇتىلەدى.
نۇرلان بايبازاروۆ قازاقستان ءۇشىن تۇركى ينتەگراتسياسىن دامىتۋدىڭ ايرىقشا ماڭىزدى ەكەنىن اتاپ ءوتتى:
«قازاقستان رەسپۋبليكاسىنىڭ ۇكىمەتى قور قىزمەتىنىڭ باستالۋىن تولىعىمەن قولدايدى. اتالعان قور قاتىسۋشى ەلدەردىڭ ەكونوميكالىق ءوسۋى مەن دامۋىنىڭ كاتاليزاتورى بولاتىنىنا جانە ينۆەستيتسيالىق ىنتىماقتاستىقتى تەرەڭدەتۋگە ءارى بىرلەسكەن جوبالاردى ىسكە اسىرۋدا ءتيىمدى ءوزارا ارەكەتتەستىككە ىقپال ەتەتىنىنە سەنىمدىمىن», دەدى ول.
قور قىزمەتى بارىسىندا ينفراقۇرىلىمدى, جاڭارتىلاتىن ەنەرگيا كوزدەرىن, اۋىل شارۋاشىلىعىن, ءتۋريزمدى, IT جانە باسقا دا باعىتتاردى قامتيتىن ءتۇرلى سەكتورلارداعى بىرلەسكەن جوبالاردى قولداۋعا باستى نازار اۋدارىلادى.
مۇنداي جوبالاردى ىسكە اسىرۋ جاڭا جۇمىس ورىندارىن قۇرۋ, ەكونوميكانى ارتاراپتاندىرۋعا باعىتتالادى. قازاقستانعا تۇركى الەمىنىڭ بەلسەندى قاتىسۋشىسى بولۋعا, جوبالار ءۇشىن قارجىلاندىرۋ, گرانتتار مەن تەحنيكالىق كومەك الۋعا, سونداي-اق تۇركى مەملەكەتتەرى ۇيىمىنىڭ ءوڭىرى اياسىندا جانە ودان تىس جەرلەردە ساۋدا-ەكونوميكالىق ىنتىماقتاستىقتى نىعايتۋعا مۇمكىندىك بەرەدى.
ەسكە سالا كەتەيىك, تۇركى ينۆەستيتسيالىق قورىن قۇرۋ تۋرالى كەلىسىمگە 2023 جىلدىڭ 16 ناۋرىزىندا انكارادا وتكەن تۇركى مەملەكەتتەرى ۇيىمىنىڭ كەزەكتەن تىس ءسامميتى اياسىندا قول قويىلعان بولاتىن. قۇرىلتايشى ەلدەر قاتارىندا ازەربايجان, قازاقستان, قىرعىزستان, وزبەكستان, تۇركيا بار.