پرەزيدەنت كۇنى كەشە قول قويعان بۇل زاڭدى ۇلتتىق قاۋىپسىزدىكتى قامتاماسىز ەتۋدىڭ ەرەكشە ماڭىزدى قادامدارىنىڭ ءبىرى رەتىندە قابىلداۋ كەرەك. قۇجاتتاعى وزگەرىستەردى ەكى بلوك اياسىندا قاراستىرۋعا بولادى. ءبىرى – ەلىمىزدىڭ ىرگەسىن نىعايتۋعا جانە ۇلتتىق مۇددەنى قورعاۋعا باعىتتالعان, ەكىنشىسى – قوعامداعى قىلمىستىڭ الدىن الۋدىڭ تاعى ءبىر ءتيىمدى تەتىگى.
اتاپ ايتقاندا, تەرروريستىك نە ەكسترەميستىك, كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىس جاساعانداردى, سونداي-اق قازاقستان قاتىساتىن حالىقارالىق شارتتاردا كوزدەلگەن اۋىر جانە اسا اۋىر قىلمىس جاساعان ادامداردى قازاقستان ازاماتتىعىنا قابىلداۋدان باس تارتۋمەن قاتار, ءتىپتى ەلگە كىرگىزۋگە دە تىيىم سالۋدى كوزدەيتىن وزگەرىستەر مەن تولىقتىرۋلار – مەملەكەتىمىزدىڭ مۇددەسىن قورعاۋداعى ايرىقشا قادام.
بۇل ءىس-شارالار ەل باسشىلىعىنىڭ قازىرگى تاڭداعى قىلمىستىلىقتىڭ كەي تۇرلەرىنە قاتىستى كونتسەپتۋالدى ۇستانىمىمەن ساباقتاستىق تاۋىپ وتىر. سونىمەن بىرگە مۇنى تەرروريستىك جانە ەكسترەميستىك, سونداي-اق كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستاردىڭ ەتەك الۋىنا زاڭگەرلەردىڭ نازار اۋدارۋى رەتىندە دە قابىلداۋعا بولادى.
ەل ازاماتتىعىن الۋعا نيەتتى ادامنىڭ مەملەكەتتىك ءتىلدى قاراپايىم دەڭگەيدە ءبىلۋىن جانە ەل تاريحىنا قاتىستى جەتكىلىكتى دەڭگەيدە ءبىلىمىنىڭ بولۋىن تالاپ ەتۋ الەم تاجىريبەسىندە بار. كوپتەگەن ۇلكەندى-كىشىلى مەملەكەت ۇلتتىق قۇندىلىقتارىنا قاتىستى مۇنداي تالاپتاردى بۇرىننان قويىپ كەلەدى. بۇل شارتتاردىڭ ويداعىداي ىسكە اسىرىلۋى قوعامداعى ءارالۋان الەۋمەتتىك قاقتىعىستاردىڭ, ءارتۇرلى الەۋمەتتىك توپ اراسىنداعى تۇسىنىسپەۋشىلىكتەردىڭ الدىن الۋعا جانە ۇلتتار اراسىنداعى ىنتىماقتاستىق پەن تاتۋلىقتى ارتتىرۋعا سەپتىگىن تيگىزەدى. سونىمەن قاتار بۇل شارا بەلگىلى ءبىر دارەجەدە ءوز ازاماتتارىمىزدىڭ دا مۇددەلەرىنىڭ ەسكەرىلگەندىگىن كورسەتەدى.
نۇرلان نيەتۋللاەۆ,
زاڭگەر