«مايقايىڭالتىن» اق جەر استىنا اۆتوبۋسپەن بىرگە ءتۇسىپ كەتكەن ازاماتتاردى ىزدەۋ جۇمىستارىن قايتا جالعاستىردى. كاسىپورىننىڭ جاڭا باسشىلىعى ويىق استىندا جاتقان قوس قۇتقارۋشىنى قايتسە دە ىزدەپ تابۋعا بەل بايلاعان ءتارىزدى.
كومپانيا بيىل اقپان ايىنىڭ سوڭىندا كەنىشتەگى قۇردىمعا قۇلاعان اۆتوبۋس پەن ونىڭ ىشىندەگى ەكى ازاماتتى ىزدەۋ جۇمىستارىن توقتاتىپ تاستاعانى تۋرالى حابارلاعان ەدىك. «مايقايىڭالتىن» اق-نىڭ جاڭادان تاعايىندالعان ديرەكتورى قايروللا جۇرسىنباەۆ 13 مامىردان باستاپ قوس قۇتقارۋشىنى ىزدەۋ جۇمىستارىن قايتا جانداندىرۋ تۋرالى شەشىم قابىلدادى.
بۇل تۋرالى قۇتقارۋشى ايدوس شايمەردەننىڭ جارى نۇرسۇلۋ شايمەردەن حابارلادى. ا.شايمەردەن – ويىق استىندا جاتقان ەكى ازاماتتىڭ ءبىرى. ول كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا جەدەل الدىن الۋ جۇمىستارى جونىندەگى ۆزۆود كومانديرىنىڭ ورىنباسارى بولىپ قىزمەت اتقارعان. ال ەكىنشىسى – جەدەل اۆتوكولىك جۇرگىزۋشىسى ايىپ تىلەۋبەرگەنوۆ.
– 13 مامىردان باستاپ ايدوس پەن ونىڭ ارىپتەسىن ىزدەۋ جۇمىستارى قايتا باستالدى. وتباسىمىز بۇل كۇندى ۇزاق ۋاقىتتان بەرى تاعاتسىزدانا كۇتكەن ەدىك. قۇتقارۋشىلار جاقىن ادامدارىمىزدى تاۋىپ الاتىنىنا سەنىمدىمىز. كاسىپورىن باسشىلىعى ايتقانداي, ەڭ اۋەلى ويىق ماڭىندا كەن جىنىستارىن قازۋ جۇمىستارى جۇرگىزىلەدى. سودان سوڭ كاسىبي اسكەريلەندىرىلگەن اپاتتىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قۇتقارۋشىلارى ىسكە كىرىسەدى. قازىرگى ۋاقىتتا جۇمىستار تاۋلىك بويى جۇرگىزىلىپ جاتىر. باس ديرەكتور قايروللا جۇرسىنباەۆ جەر استىندا جاتقان قوس ازاماتتى تاۋىپ العان سوڭ عانا شاحتا ىسكە قوسىلاتىنىن جەتكىزدى, – دەيدى نۇرسۇلۋ شايمەردەن.
ال «مايقايىڭالتىن» اق-نىڭ جاڭا باسشىلىعى ىزدەۋ-قۇتقارۋ جۇمىستارى تۋرالى اقپارات بەرۋدەن باس تارتىپ وتىر. تاۋ-كەن مەتاللۋرگيالىق ونەركاسىبىنىڭ سالالىق پورتالى metalmininginfo.kz حابارلاعانداي, «مايقايىڭالتىن» اق ينۆەستورلارى التىن كەنىشىندەگى ونەركاسىپتىك قاۋىپسىزدىكتى باعالاۋ, سونداي-اق ىزدەستىرۋ-قۇتقارۋ شارالارى مەن كەن ءوندىرۋ جۇمىستارىن جالعاستىرۋ ءۇشىن «التىنالماس اك» اق كومپانياسىن تارتقان. سوعان وراي 26 ساۋىردە جاڭا ديرەكتور تاعايىندالعان. جاڭا باسشىلىقتىڭ الدىندا تەز ارادا قوس قۇتقارۋشىنى تاۋىپ, ءوندىرىستى تولىققاندى ىسكە قوسۋ مىندەتتەرى تۇر.
بۇعان دەيىن دە جازعانىمىزداي, ايدوستىڭ جارى نۇرسۇلۋ شايمەردەن كۇيەۋىنىڭ ءتىرى ەكەنىنە ەشقانداي ءۇمىتى جوق ەكەنىن, قۇتقارۋشىلار مۇردەسىن قازىپ بەرسە, ارۋلاپ جەر قوينىنا تاپسىرۋ سوڭعى تىلەگى ەكەنىن ايتادى.
پاۆلودار وبلىسى,
باياناۋىل اۋدانى,
مايقايىڭ كەنتى