مەملەكەتتىك ءبىلىم گرانتتارىنىڭ ءتىزىمى شىقتى. جوعارى ءبىلىمنىڭ قاي دەڭگەيىنە قانشا گرانت ءبولىندى؟ ەڭ كوپ گرانت قاي ماماندىقتاردى دايارلاۋعا قاراستىرىلعان؟ جاڭادان قانداي ماماندىقتارعا گرانتتار ءبولىندى؟ وسى جانە وزگە دە سۇراقتارعا جاۋاپ الۋ ماقساتىندا جاريالانعان تىزىمگە تولىعىراق توقتالۋعا تىرىستىق.
ءيا, بيىلعى تالاپكەرلەر اسىعا كۇتكەن اقپارات جاريالاندى. بۇل اقپاراتتىڭ ماڭىزى سول, وندا جوعارى ءبىلىمنىڭ بارلىق دەڭگەيى (باكالاۆريات, ماگيستراتۋرا, دوكتورانتۋرا) بويىنشا 2024 – 2025 وقۋ جىلىنا ارنالعان ءبىلىم گرانتتارىن ءبولۋ تۋرالى ماعلۇمات بەرىلگەن.
سونىمەن, عىلىم جانە جوعارى ءبىلىم مينيسترلىگىنىڭ مالىمەتىنە سۇيەنسەك, 2024 – 2025 وقۋ جىلىندا جوعارى وقۋ ورىندارىندا ءبىلىم الۋعا باس-اياعى 112 مىڭ گرانت بولىنگەن. ونىڭ ىشىندە باكالاۆرياتقا 79 مىڭعا جۋىق گرانت قاراستىرىلعان. ال ماگيستراتۋراعا 13 مىڭعا جۋىق, دوكتورانتۋراعا 1 900 اسا گرانت ءبولىندى.
ال ءسوز باسىندا تۋىنداعان «جاڭادان قانداي ماماندىقتارعا گرانتتار ءبولىندى؟» دەگەن سۇراعىمىزعا مينيسترلىك تاراتقان اقپاراتىنداعى مىناۋ جولداردان جاۋاپ تاپقانداي بولدىق. وندا: «بيىل العاش رەت ءىشىنارا وقۋ اقىسى بار سارالانعان گرانتتار ەنگىزىلدى. «پەداگوگيكالىق عىلىمدار» جانە «الەۋمەتتىك عىلىمدار, جۋرناليستيكا جانە اقپارات» ءبىلىم باعدارلاماسى توپتارى بويىنشا 150 سارالانعان گرانتتان ءبولىندى. وسىعان قوسا «سەرپىن» باعدارلاماسى ارقىلى تۇسۋشىلەرگە 3 903 گرانت بار. «سەرپىن» جوباسى ارقىلى 4 دايارلاۋ باعىتى بويىنشا ءبىلىم الۋعا مۇمكىندىك بەرىلەدى. اتاپ ايتقاندا, پەداگوگيكالىق عىلىمدار, ينجەنەرلىك-تەحنيكالىق, اقپاراتتىق تەحنولوگيالار, اۋىل شارۋاشىلىعى ماماندىقتارى بويىنشا وقۋعا تۇسە الادى. باعدارلاماعا وڭتۇستىك وڭىردەگى اۋىل جاستارى قاتىسادى. ايتا كەتسەك, وقۋ بىتىرگەن سوڭ, گرانت وتەۋ مەرزىمى 3 جىلدان 2 جىلعا قىسقارتىلىپ, وتەۋ ورنى 11 ايماققا ۇلعايتىلدى. گرانتتار تىزىمىندە 5 000 حالىق تىعىز قونىستانعان جانە باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋعا ماقساتتى ءبىلىم گرانتى بار, ونىڭ ىشىندە گرانتتار اتىراۋ, ماڭعىستاۋ وبلىسى تۇلەكتەرىنە تيەسىلى», دەلىنگەن.
ەندى «جوعارى ءبىلىمنىڭ قاي دەڭگەيىندە قانداي ماماندىقتارعا گرانت كوپ بولىنگەن؟» دەگەن سۇراققا كەلسەك, باكالاۆريات بويىنشا گرانتتاردىڭ باسىم بولىگى «ينجەنەرلىك, وڭدەۋ, قۇرىلىس سالالارى» ءبىلىم باعدارلاماسى توپتارىنا ءبولىندى, ونىڭ سانى 19 344 گرانتتى قۇرايدى. ال «پەداگوگيكالىق عىلىمدارعا» – 13 735 گرانت, «اقپاراتتىق-كوممۋنيكاتسيالىق تەحنولوگيالار» سالاسىنا – 10 903 گرانت, «جاراتىلىستانۋ عىلىمدارى, ماتەماتيكا جانە ستاتيستيكا» باعىتىنا 8 288 گرانت قاراستىرىلعان. ەلىمىزدىڭ كوپ وڭىرىندە سۋ تاسقىنىنان حالىق پەن جايىلىمدىق جەرلەر, ەگىن القاپتارى زارداپ شەگىپ جاتقان شاقتا سۋ, مال, وسىمدىك شارۋاشىلىعى ماماندارىن دايارلاۋعا گرانت سانى ارتقان بولار دەدىك. ءۇمىت الداماپتى, سونشالىقتى كوپ بولىنبەسە دە, بىلتىرعىدان سانى ارتقان. مىسالى, بىلتىر «اۋىل شارۋاشىلىعى جانە بيورەسۋرستار» باعىتى بويىنشا ماماندار دايارلاۋعا بارلىعى 1967 گرانت قاراستىرىلسا, بيىل 2 311 گرانت ءبولىنىپتى. بۇل باعىتتاعى ماماندىقتاردا وسىمدىك, مال, ورمان, بالىق شارۋاشىلىعىنىڭ, «سۋ رەسۋرستارى جانە سۋدى پايدالانۋ», «اگروينجەنەريا» ماماندارى دايارلانادى. بيىل كوبەيدى دەسەك تە, جوعارىداعى 20 مىڭعا جۋىقتايتىن ماماندىقتاردىڭ جانىندا ء«جىپ ەسە الماي» قالاتىنى تاعى بار.
ماگيستراتۋرادا وقۋعا بولىنگەن گرانتتار تىزىمىنە كەلسەك, مۇندا دا باكالاۆرياتتاعىداي «ينجەنەرلىك, وڭدەۋ جانە قۇرىلىس» سالالارى بويىنشا ماماندىقتارعا ەڭ كوپ گرانت (3227) بولىنگەن. ودان كەيىنگى رەتتە «پەداگوگيكا عىلىمدارى» باعىتى بويىنشا ماماندىقتار (3347) قاراستىرىلعان. «جاراتىلىستانۋ عىلىمدارى, ماتەماتيكا جانە ستاتيستيكا» سالالارىنداعى ماماندىقتارعا – 1265, «اقپاراتتىق-كوممۋنيكاتسيالىق تەحنولوگيالار» سالالارىنداعى ماماندىقتارعا 1235 گرانت ءبولىندى. ال ەڭ از گرانت بولىنگەنى – «دەنساۋلىق ساقتاۋ جانە الەۋمەتتىك قامتاماسىز ەتۋ» (225), «قىزمەت كورسەتۋ» (315) سالالارىنداعى ماماندىقتار.
دوكتورانتۋرا تۋرالى ايتساق, جوعارى ءبىلىمنىڭ بۇل دەڭگەيىندە دە تەحنيكالىق ماماندىقتارعا باسىمدىق بەرىلگەن. «ينجەنەرلىك, وڭدەۋ جانە قۇرىلىس» سالالارى بويىنشا ماماندىقتارعا – 455, «پەداگوگيكا عىلىمدارى» باعىتى بويىنشا ماماندىقتارعا – 356, «جاراتىلىستانۋ عىلىمدارى, ماتەماتيكا جانە ستاتيستيكا» ماماندىقتارىنا 259 گرانت بولىنگەن. ەڭ از گرانت «قىزمەت كورسەتۋ» (36), «ۆەتەريناريا» (20), «اۋىل شارۋاشىلىعى جانە بيورەسۋرستار» سالالارىنداعى ماماندىقتارعا قاراستىرىلدى.