قازاقستاننىڭ ءباا-دەگى ەلشىسىنىڭ بۇرىنعى كەڭەسشىسى ساكەن ماماشتىڭ ۇستىنەن «ازاپتاۋ» بابى بويىنشا قىلمىستىق ءىس قوزعالدى. بۇل تۋرالى ىشكى ىستەر ءمينيسترىنىڭ ورىنباسارى يگور لەپەحا حابارلادى, دەپ جازادى Egemen.kz.
يگور لەپەحانىڭ ايتۋىنشا, «ازاپتاۋ» بويىنشا ءىس قوزعالدى.
«قازىر ونىڭ قايدا ەكەنىن ايتا المايمىن. بىرىنشىدەن, ماتەريالدار ساراپتاماعا جىبەرىلدى, ونىڭ قورىتىندىسى بويىنشا شەشىم قابىلدانادى. ساراپتامانىڭ ناتيجەسىن كۇتەيىك, جاۋاپ الۋ قاجەت, قازىر پروتسەسسۋالدى شارالار جۇرگىزىلىپ جاتىر», دەدى ول ءماجىلىس كۋلۋارىندا.
ەستەرىڭىزگە سالا كەتەيىك, قازاقستاننىڭ ءباا-دەگى ەلشىسىنىڭ كەڭەسشىسى بولعان ساكەن ماماشتىڭ ايەلى كارينا ماماش كۇيەۋىنەن قورلىق كورىپ كەلگەنىن ايتقان ەدى. جابىرلەنۋشىنىڭ ايتۋىنشا, ساكەن ماماش ون جىل بويى ايەلىن ۇرىپ-سوققان. كارينا قازاقستاننىڭ بيلىك ورگاندارىنان وزىنە اراشا ءتۇسۋدى سۇرادى.
كوپ ۇزاماي ايەل بالالارىمەن بىرگە استاناعا ورالدى. قازىر ول «قورعاۋ» داعدارىس ورتالىعىندا تۇرىپ جاتىر.
ال ديپلومات ساكەن ماماش ايەلىنىڭ ارىزىنان سوڭ ەلگە شاقىرتىلىپ, قىزمەتىنەن بوساتىلدى.