اقشا بوپسالاپ, ءۇش جىل ارقالادى

بيىلعى ناۋرىز ايىندا ءوڭىر باسشىسىنىڭ ءبىرىنشى ورىنباسارى سەرىك باتىرعوجينوۆتىڭ وتكەن جازدا ەكى بالانىڭ اناسىن زورلاعانى تۋرالى اقپارات تاراپ كەتكەن ەدى. لاۋازىم يەسى بۇل ايىپتاۋمەن كەلىسپەي, ايەلدىڭ ۇستىنەن قۇقىق قورعاۋ ورگاندارىنا شاعىم تۇسىرەدى. پاۆلودار وبلىسىنىڭ پوليتسيا دەپارتامەنتى ونىڭ وتىنىشىنە سايكەس بوپسالاۋ فاكتىسىمەن قىلمىستىق ءىس قوزعادى. اتالعان ءىس بويىنشا تەرگەۋ ءىس-شارالارى جۇرگىزىلىپ, كەيىن ءىس سوتقا جىبەرىلدى.

پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القا بيلەردىڭ قاتىسۋىمەن ك-عا قاتىستى اسا ءىرى مولشەردە بوپسالاپ, اقشا فاكتىسى بويىنشا قىلمىستىق ءىستى قارادى.

بەلگىلى بولعانداي, ايەل جالعىزباستى, وتباسىن­دا مۇگەدەك بالا تاربيەلەپ وتىر. سوعان بايلا­نىستى بىلتىرعى ءساۋىر ايىنان تۇرعىن ءۇي الۋعا كەزەككە تۇرعان. ول الەۋمەتتىك جەلىدە س.باتىرعوجينوۆ­پەن تانىسىپ, ونىڭ قابىلداۋىندا بولعان. كەيىن جاقىن ارالاسا باستاعان. 2023 جىلدىڭ مامىر-قىركۇيەك ايلارى ارالىعىندا باتىرعوجينوۆ ك-عا ماتەريالدىق كومەك تۇرىندە 50 مىڭ تەڭگەدەن 160 مىڭ تەڭگەگە دەيىن اقشالاي قاراجات اۋدارعان. ايەل بارا-بارا اقشا سۇراۋدى ۇدەتە ءتۇسىپ, ونىڭ بەدەلىن تۇسىرەتىن اقپاراتتى تاراتامىن دەپ بوپسالاعان. ءسويتىپ, ءوز ەسەپشوتىنا جالپى سوماسى 4 812 000 تەڭگە اۋدارتىپ العان كورىنەدى. ال وتكەن جىلدىڭ قاراشا ايىندا 20 ملن تەڭگە تالاپ ەتكەن.

القابيلەر ك-نى قىلمىستىق كودەكستىڭ 194-بابىنىڭ 4-بولىگى 2-تارماعى بويىنشا كىنالى دەپ تانىدى. سوت ايەلدىڭ بۇرىن سوتتالماعانىن, اسىراۋىندا كامەلەتكە تولماعان بالاسى بار ەكەنىن جانە جەكە باسىنىڭ اۋىر جاعدايلارىنىڭ جيىنتىعى بويىنشا قىلمىس جاساعانىن ەسكەرە وتىرىپ, قىلمىستىق كودەكستىڭ 55-بابى 4-بولىگىنىڭ نەگىزىندە وعان 3 جىلعا باس بوستاندىعىنان ايىرۋ جازاسىن تاعايىندادى.

پاۆلودار وبلىسى