ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى س.كيروۆ اتىنداعى زاۋىتتا اقىلى ءىس-تاجىريبەدەن وتەدى. ۋنيۆەرسيتەت پەن زاۋىت ونەركاسىپتىك تەحنولوگيالاردى دامىتۋ بويىنشا تاجىريبە الماسۋعا, عالىمدار مەن ينجەنەرلەردى تەحنيكالىق قايتا دايارلاۋدى دامىتۋعا مۇددەلى. سونىمەن قاتار تاراپتار عىلىمي باعىتتاعى ىنتىماقتاستىقتى دا نىعايتۋعا نيەتتى.
وسىعان وراي ۇيىمداستىرىلعان فيزيكا-تەحنيكالىق فاكۋلتەتىنىڭ 15 جىلدىعىنا ارنالعان «عىلىم جانە بيزنەس: دامۋ جولدارى» اتتى دوڭگەلەك ۇستەل بارىسىندا ىنتىماقتاستىق تۋرالى مەموراندۋمعا قول قويىلدى. ۋنيۆەرسيتەت پەن «س.كيروۆ اتىنداعى زاۋىت» اكتسيونەرلىك قوعاممەن ىنتىماقتاستىق تۋرالى كەلىسىمگە كەلگەنىنىڭ ناتيجەسىندە ىزدەنۋشىلەر اقىسى تولەنەتىن تاعىلىمداماعا قابىلداناتىن بولدى.
ەۋرازيا ۇلتتىق ۋنيۆەرسيتەتىنىڭ ستراتەگيالىق دامۋ جونىندەگى پرورەكتورى دۋمان ايتماعامبەتوۆ: «مەموراندۋمعا قول قويۋ – عىلىم, ءبىلىم جانە وندىرىستىك ينتەگراتسيا سالاسىنداعى ستراتەگيالىق ماڭىزدى قادام. ءبىز ىنتىماقتاستىق شەڭبەرىندە بىرلەسكەن يننوۆاتسيالىق جوبالاردى ىسكە اسىرۋدى, سونداي-اق ستۋدەنتتەردى وندىرىستىك بازادا تاجىريبەدەن وتكىزۋ ارقىلى جوعارى بىلىكتى كادرلاردى دايارلاۋ جۇمىستارىن جۇرگىزۋدى جوسپارلاپ وتىرمىز. مەموراندۋم ەل يگىلىگى ءۇشىن عىلىم مەن ءوندىرىستىڭ ودان ءارى بايلانىستارىن نىعايتۋعا بەرىك نەگىز قالادى دەپ سەنەمىن», دەپ اتاپ ءوتتى.
ال اتالعان ۋنيۆەرسيتەتتىڭ «راديوتەحنيكا, ەلەكترونيكا جانە تەلەكوممۋنيكاتسيالار» كافەدراسىنىڭ مەڭگەرۋشىسى قانات ماحانوۆ «RFID جۇيەسى ءۇشىن دوڭگەلەك پولياريزاتسيالانعان انتەننانى جوبالاۋ» جوباسىن جۇزەگە اسىرىپ جاتىر. عالىم عىلىمي زەرتتەۋلەرىن جۇزەگە اسىرۋ بارىسىندا قاجەتتى زاتتارىن وسى زاۋىتتان ساتىپ الادى. ء«بىز زاۋىتتان ءوزىمىزدىڭ زەرتتەۋ جوبامىز ءۇشىن باسپا پلاتالارىن ساتىپ الدىق. سەبەبى ولاردىڭ بۇل ءونىمى جوبا شەڭبەرىندەگى تالاپتارعا تولىق سايكەس كەلەدى. بولاشاقتا ءبىز ءوز ۋنيۆەرسيتەتىمىزدە جوبانىڭ العاشقى ناتيجەلەرىن ەنگىزۋ بويىنشا عىلىمي ىنتىماقتاستىقتى ودان ءارى دامىتامىز», دەپ ءتۇسىندىردى عالىم ق.ماحانوۆ.
س.كيروۆ اتىنداعى زاۋىتتىڭ باس ديرەكتورى الماس نۇرماعامبەتوۆ تەمىرجول, مۇناي-گاز, ەنەرگەتيكا سالالارىندا پايدالانۋعا ارنالعان 100-دەن استام ءونىم ءتۇرى شىعارىلاتىنىن جەتكىزدى. «ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىمەن ينتەگراتسيانى نىعايتۋ ءبىز ءۇشىن ۇلكەن ماڭىزعا يە. ىنتىماقتاستىعىمىزدىڭ ءبىرىنشى كەزەڭىندە اقىسى تولەنەتىن تاجىريبەگە قابىلداۋعا دايىنبىز. ستۋدەنتتەر تەگىن تاماق پەن جاتىن ورىنمەن قامتاماسىز ەتىلەتىن بولادى. سونىمەن قاتار ىنتىماقتاستىعىمىزدىڭ اياسىندا ەۋرازيا ۇلتتىق ۋنيۆەرسيتەتىنىڭ فيزيكا-تەحنيكالىق فاكۋلتەتىنە 5 كومپيۋتەر سىيعا تارتتىق. الدا كوپتەگەن جوسپار, جوبا بار. بىرلەسكەن جۇمىس ناتيجەلى بولادى دەپ ۇمىتتەنەمىز», دەدى سپيكەر.