سەنات توراعاسى ماۋلەن اشىمباەۆ پالاتانىڭ ءبىر توپ دەپۋتاتىمەن بىرگە ايەلدەردى قولداۋعا ارنالعان «باقىتتى وتباسى» ءبىلىم جانە اقپاراتتىق-كونسۋلتاتسيالىق ورتالىعىنا باردى. ورتالىق جەتەكشىسى ىرزا تۇرسىنزادا «باقىتتى وتباسى» ءبىرىنشى كەزەكتە كوپ بالالى, مۇمكىندىگى شەكتەۋلى بالا تاربيەلەپ وتىرعان, جۇمىسسىز, قيىن جاعدايعا تاپ بولعان جانە جالعىزباستى انالارعا جان-جاقتى قولداۋ كورسەتەتىن پلاتفورما ەكەنىن ايتتى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
«باقىتتى وتباسى» ورتالىعىندا مامانداندىرىلعان كابينەتتەر جۇمىس ىستەيدى. سونداي-اق ءوزىن ءوزى دامىتۋ ءۇشىن جانە جەكە كاسىبىن باستاۋعا جول اشۋ ماقساتىندا كونديتەرلىك ءىس, توقىما, اعىلشىن ءتىلى, جۇمساق ويىنشىقتار تىگۋ جانە تاعى باسقا كاسىپ تۇرلەرىن ۇيرەتەتىن تەگىن كۋرستار قاراستىرىلعان.
سەنات سپيكەرى ايەلدەر قۇقىعىن قورعاۋدا جانە ينكليۋزيۆتى قازاقستان قالىپتاستىرۋدا وسىنداي ورتالىقتاردىڭ ماڭىزى زور ەكەنىن اتاپ ءوتتى.
«مەملەكەت باسشىسىنىڭ تاپسىرماسى بويىنشا وتباسى ينستيتۋتىن نىعايتۋعا, ايەلدەر مەن بالالاردىڭ قۇقىقتارىن قورعاۋعا ارنالىپ ازىرلەنگەن زاڭدار قابىلدانىپ, مەملەكەتتىك وتباسى ساياساتىن قالىپتاستىرۋعا جاۋاپتى ۋاكىلەتتى ورگاننىڭ مارتەبەسى ايقىندالدى, قيىن جاعدايعا ۇشىراعان وتباسىلاردى قولداۋعا ارنالعان ەرەجەلەر قاراستىرىلىپ, ايەلدەر مەن بالالارعا قارسى قىلمىستىڭ جاۋاپكەرشىلىگى كۇشەيتىلدى. اتالعان باعىتتاعى مىندەتتەردى ىسكە اسىرۋدا «باقىتتى وتباسى» سەكىلدى ورتالىقتار ماڭىزدى ءرول اتقارادى. الداعى ۋاقىتتا بىرلەسكەن جۇمىسىمىز مۇمكىندىگى شەكتەۋلى ازاماتتارعا جايلى جاعداي جاساۋعا جانە وتباسى ينستيتۋتىن نىعايتۋعا تىڭ سەرپىن بەرەدى دەپ سەنەمىز», دەدى ماۋلەن اشىمباەۆ.
ءىس-شارا سوڭىندا ورتالىق باسشىسى جاڭا باستامالارعا قولداۋ ءبىلدىرىپ, ىنتىماقتاستىق تانىتقانى ءۇشىن سەناتورلارعا العىس ايتتى. سونداي-اق ول الداعى جوسپارلارىنا توقتالىپ, الەۋمەتتىك كاسىپكەرلىكتى دامىتۋعا ارنالعان جاڭا ۇسىنىستارىن ورتاعا سالدى.