مەملەكەت باسشىسى مادەنيەت جانە اقپارات ءمينيسترى ايدا بالاەۆانى قابىلدادى. پرەزيدەنتكە ۆەدومستۆو اتقارعان جۇمىستاردىڭ ناتيجەسى, سونداي-اق مينيسترلىكتىڭ الداعى قىزمەتى بارىسىندا قولدانىلاتىن پەرسپەكتيۆتى تاسىلدەر تۋرالى باياندالدى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا اقپارات, مادەنيەت, كرەاتيۆتى يندۋستريا, ازاماتتىق قوعام, ءدىن, ەتنوسارالىق قارىم-قاتىناس, جاستار جانە وتباسىلىق-دەموگرافيالىق ساياسات سالالارىندا قابىلدانىپ جاتقان شارالار تۋرالى مالىمەت بەرىلدى.
ايدا بالاەۆا ۆەدومستۆونىڭ جەتەكشىلىك ەتەتىن سالالارىن دامىتۋعا قاتىستى جوسپارىن ايتتى.
كەزدەسۋ سوڭىندا مەملەكەت باسشىسى مينيسترلىككە مادەني-تاريحي نىسانداردىڭ ينفراقۇرىلىمىن دامىتۋ, شىعارماشىلىقتى قولداۋ, قازاقستاننىڭ مادەنيەتىن شەتەلدە دارىپتەۋ سەكىلدى بىرقاتار ناقتى مىندەت جۇكتەدى. بۇدان بولەك, كرەاتيۆتى يندۋستريانى ينستيتۋتسيونالدىق تۇرعىدا قولداۋ جانە اتالعان سالانى جەدەل دامىتۋ جۇمىستارىن جانداندىرۋ تاپسىرىلدى.