اتىراۋداعى جەرگىلىكتى اسكەري باسقارۋ ورگاندارى زاپاسقا شىعارىلعان جاۋىنگەرلەردى سالتاناتتى جاعدايدا قارسى الدى. ولار مەرزىمدى اسكەري بورىشىن اقتاۋ گارنيزونىنداعى تەڭىز جاياۋ اسكەرلەرى قۇراماسىندا وتەگەن.
پويىز انە-مىنە كەلەدى دەپ تاعاتسىزدانا كۇتىپ تۇرعانداردىڭ اراسىندا 85 جاستاعى كلارا اجەي دە بار. ول نەمەرەسى دارىن جۇباتحانوۆتى قارسى الۋعا ارنايى كەلگەن.
– بالالارىمىز وتان الدىنداعى بورىشىن ادال اتقارىپ, ورتامىزعا امان-ەسەن ورالدى. جاس بۋىننىڭ بارلىق ويعا العان ارمان-ماقساتتارى ورىندالسىن. ەلىمىزدىڭ بولاشاعى جاستاردىڭ قولىندا! – دەدى اقجاۋلىقتى اجە.
ءومىر مەكتەبىنەن وتكەن جاۋىنگەرلەر اسكەردەگى وقۋ-جاتتىعۋلاردى, مارشتار مەن دابىل ارقىلى كوتەرىلگەن كۇندەرىن ەشقاشان ۇمىتپاق ەمەس. وتان الدىنداعى بورىشىن وتەگەن زاپاستاعى كىشى سەرجانت ءالي امانگەلدى وسىلاي دەيدى.
– ارميادا كەز كەلگەن قيىن جاعدايدا يىق تىرەستىرە ءجۇرىپ, ناعىز دوستىقتىڭ قانشالىقتى ماڭىزدى ەكەنىن تۇسىنەسىڭ. ءوزىم تەڭىز جاياۋ اسكەرىندە قىزمەت ەتكەنىمدى ماقتان ەتەمىن, – دەدى ول.
اسكەردە قىزمەت ەتكەن جاستارعا ۇبت تاپسىرماي-اق ەلدىڭ جوعارى وقۋ ورنىنا ءتۇسۋ قۇقىعى بەرىلگەن. ال جاۋىنگەرلىك جانە مەملەكەتتىك-قۇقىقتىق دايىندىقتا ۇزدىك ناتيجە كورسەتكەندەر تەگىن نەگىزدە جوعارى ءبىلىم الا الادى.
– جەرلەستەرىمىزدى سالتاناتتى جاعدايدا اسكەرگە شىعارىپ سالىپ, قۇرمەتپەن قارسى الۋ داستۇرگە اينالدى. ازاماتتىق بورىشىن وتەگەن 20-دان استام اسكەري قىزمەتشى ۇيلەرىنە امان-ەسەن ورالدى, – دەدى اتىراۋ وبلىسىنىڭ قورعانىس ىستەرى جونىندەگى دەپارتامەنتى باسشىسىنىڭ ورىنباسارى, پولكوۆنيك قۋاندىق بەردىعاليەۆ.
سەمەيلىكتەر دە ماڭعىستاۋ پويىزىن سالتاناتتى جاعدايدا قارسى الدى. ءىس-شاراعا اباي وبلىسىنىڭ قورعانىس ىستەرى جونىندەگى دەپارتامەنتىنىڭ وكىلدەرى, ساربازداردىڭ اتا-انالارى مەن دوستارى قاتىستى.
– وسىدان تۋرا ءبىر جىل بۇرىن بۇل جىگىتتەردى اسكەرگە شىعارىپ سالعان ەدىك. ولار ناعىز ەر جىگىتتەي شىڭدالىپ ورتامىزعا قايتا ورالىپ وتىر. اسكەردەن العان تاجىريبەسى مەن بىلىمدەرى الداعى ومىرلەرىنە نەگىز بولاتىنىنا سەنىمدىمىن, – دەپ اتاپ ءوتتى اباي وبلىسىنىڭ قورعانىس ىستەرى جونىندەگى دەپارتامەنتى باسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى, پودپولكوۆنيك قانات ءشارىپحانوۆ.