قازىرگىدەي قىسىلتاياڭ شاقتا ەلدىڭ بار نازارى سۋ باسقان وڭىرلەرگە اۋىپ تۇر. ماتەريالدىق, مورالدىق تۇرعىدا كومەك بەرۋگە جۇرەگى بار جاننىڭ ءبارى ءازىر. سونداي جاناشىرلىق پەن ازاماتتىقتى ەلىمىزدەگى جوعارى وقۋ ورىندارىنىڭ قىزمەتكەرلەرى مەن ستۋدەنتتەرىنىڭ دە ناقتى ءارى ناتيجەلى ارەكەتىنەن بايقادىق.
وتكەن اپتادا عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا بايانداعانداي, ەلىمىزدەگى 16 جوعارى وقۋ ورنىنىڭ جاتاقحانالارىنان جالپى سانى 3 820 ورىن دايارلانىپ, وندا 548 ادام ورنالاستى, ونىڭ 228-ءى – مەكتەپ جاسىنداعى بالالار. ال رەزەرۆتەگى ورىندار سانى 3 272-ءنى قۇرايدى.
«ال ستۋدەنت جاستار مەن جوعارى وقۋ ورىندارىنىڭ قىزمەتكەرلەرى قاتارىنان 5 مىڭنان اسا ەرىكتى قوعامدىق قىزمەتتە ءجۇر. ولار نەگىزىنەن گۋمانيتارلىق كومەكتى ۇلەستىرۋ, تاراتۋ, تيەپ جانە ءتۇسىرۋ, سونىمەن قاتار بوگەتتەر جاساۋ ءۇشىن قاپتارعا قۇم تولتىرۋ سياقتى جۇمىستاردى اتقارىپ جاتىر. جوعارى وقۋ ورىندارىنىڭ 150-دەن اسا وقىتۋشىسى وقۋشىلاردىڭ ساباقتارىن ۇيىمداستىرۋعا دايىن جانە جوعارى وقۋ ورىندارىندا اۋديتوريالار مەن ورىندار ازىرلەنىپ جاتىر. قاجەت بولعان جاعدايدا وقۋشىلاردى وڭالتۋ ءۇشىن ولاردىڭ دەمالىسىن ۇيىمداستىرۋعا دا وڭىرلەردەگى جوعارى وقۋ ورىندارى دايىن», دەدى ۆيتسە-مينيستر.
سۋ تاسقىنىنان امان وڭىرلەردەگى جوعارى وقۋ ورىندارى سۋ باسقان وڭىرلەرگە ءتۇرلى جاردەم تۇرلەرىن كورسەتۋدە بەلسەندىلىك تانىتىپ وتىر. ماسەلەن, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 500-گە جۋىق وقىتۋشىسى مەن قىزمەتكەرى ءبىر كۇندىك جالاقىسىن قايىرىمدىلىققا اۋدارىپ, 4 ملن تەڭگەدەن اسا قاراجات اۋداردى. سونداي-اق اتالعان ۋنيۆەرسيتەتتىڭ وكىلەتتى كەڭەس توراعاسى مۋحيتتين شيمشەك تۇركيالىق باۋىرلاردىڭ اتىنان قوسىمشا 3 ملن تەڭگە قاراجات جىبەردى. ال وقۋ ورنىنىڭ «اكتەرلىك ونەر» ماماندىعىنىڭ 2-كۋرس ستۋدەنتتەرى قايىرىمدىلىق اكتسياسىن ۇيىمداستىرىپ, «پاي-پاي, جاس جۇبايلار-اي» اتتى قويىلىمدى ساحنالادى. بيلەت ساتىلىمىنان تۇسكەن قارجىنى ماتەريالدىق كومەككە اۋداردى. احمەت ياساۋي ۋنيۆەرسيتەتىنىڭ باسشىلىعى بارلىق جينالعان قاراجاتتى اتىراۋ وبلىسىنىڭ تۇرعىندارىنا جاردەم ءۇشىن جۇمساۋعا شەشىم شىعارىپتى. وقۋ ورنى اتىنان قۇرىلىس-شارۋاشىلىق زاتتارى ساتىپ الىنىپ, جۇك كولىگىمەن اتىراۋ وبلىسىنا جونەلتىلدى. وقۋ ورنى جىبەرگەن جاردەمدى ح.دوسمۇحامەدوۆ اتىنداعى اتىراۋ ۋنيۆەرسيتەتى قابىلداپ الىپ, جاردەم قاجەت ورىندارعا جەتكىزەدى.
د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ 1000-نان اسا پروفەسسور-وقىتۋشىلار قۇرامى مەن ۋنيۆەرسيتەت قىزمەتكەرلەرى دە ءبىر كۇندىك جالاقىسىن ارنايى كومەك قورىنا اۋداردى. وسىعان قوسا ۋنيۆەرسيتەت بازاسىندا سۋ تاسقىنىنان زارداپ شەككەندەرگە گۋمانيتارلىق كومەك رەتىندە گيگيەنا قۇرالدارى, ازىق-ت ۇلىك جانە زارداپ شەككەندەرگە قاجەت باسقا دا زاتتار جينالادى. ال ستۋدەنتتىك بەلسەندىلەر ازىق-ت ۇلىك پەن زاتتاردى جيناۋ ورتالىعىندا كومەكتەسەدى.
سولتۇستىك وڭىردەگى ۋنيۆەرسيتەتتەر دە سۋ تاسقىنىنىڭ الدىن الۋ جۇمىستارىنان قالىس قالمادى. ايتالىق, ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ وقىتۋشىلارى, قىزمەتكەرلەرى مەن ستۋدەنتتەرى پەتروپاۆلداعى سۋ تاسقىنىنا قارسى ءىس-شارالارعا قاتىسىپ جاتىر. جۇمىسقا 300-دەن كوپ ادام تارتىلعان. توتەنشە جاعدايلار دەپارتامەنتى قىزمەتكەرلەرىنىڭ باسشىلىعىمەن ەرىكتىلەر قورعانىس قۇرىلىستارىن نىعايتادى, قاپتاردى تولتىرادى, قالا تۇرعىندارىنا كومەك كورسەتەدى, سونداي-اق گۋمانيتارلىق كومەكتى تۇسىرۋگە قاتىسادى. ءوز كەزەگىندە, م.قوزىباەۆ ۋنيۆەرسيتەتى ۇجىمىنىڭ ايەل قىزمەتكەرلەرى تاسقىنىنا قارسى ءىس-شارالارمەن اينالىساتىن ەرىكتىلەر مەن اسكەري قىزمەتشىلەرگە تاماق دايىنداپ جاتىر. سونىمەن قاتار اتالعان ۋنيۆەرسيتەتتە سۋ تاسقىنىنان زارداپ شەككەندەرگە پسيحولوگيالىق كومەك كورسەتۋگە دايىن ەرىكتىلەر توبى قۇرىلدى. ولار – اريزونا ۋنيۆەرسيتەتىمەن ءبىلىم بەرۋدەگى پسيحولوگيا باعىتى بويىنشا قوس ديپلومدى باعدارلامالار بويىنشا وقيتىن ستۋدەنتتەر, سونداي-اق جوعارى وقۋ ورنى پسيحولوگيالىق كلۋبىنىڭ قاتىسۋشىلارى. بارلىعى – 40 ادام. ەرىكتىلەر توبى ارنايى ۇيىمداستىرىلعان ترەنينگتەر تسيكلى ارقىلى توتەنشە جاعدايلار دەپارتامەنتىنىڭ پسيحولوگتەرىنەن ءدارىس الدى. ستۋدەنتتەرگە جەدەل جەلى تەلەفونىندا جانە ەۆاكوپۋنكتتەردەگى ادامدارمەن جۇمىس ىستەۋ بويىنشا كىرىسپە نۇسقاما بەرىلدى.
اتىراۋداعى قىزۋ جۇمىستىڭ ورتاسىندا جۇرگەن سونداعى ەكى ۋنيۆەرسيتەتتىڭ قىزمەتكەرلەرى مەن ستۋدەنتتەرى 10 شاقىرىم بوگەت تۇرعىزىپ جاتىر. اتىراۋعا جۇمىس ساپارى كەزىندە عىلىم جانە جوعارى ءبىلىم ءمينيسترى ساياسات نۇربەك المالى جانە بەسىكتى اۋىلدارىندا تاسقىن سۋدان قورعاۋعا بوگەت تۇرعىزىپ جاتقان ازاماتتارمەن كەزدەسىپ, ولارعا العىس ايتقان ەدى. سول كەزدەسۋدەن مينيسترلىكتىڭ تاراتقان اقپاراتىنا سۇيەنسەك, ح.دوسمۇحامەدوۆ اتىنداعى اتىراۋ ۋنيۆەرسيتەتى مەن س.وتەباەۆ اتىنداعى مۇناي-گاز ۋنيۆەرسيتەتىنىڭ 400-گە تارتا قىزمەتكەرى جانە 2 500 ەرىكتى ستۋدەنتى جايىق وزەنى ارناسىن بەكىتۋ, بوگەت تۇرعىزۋ جۇمىستارىنا بەلسەندى قاتىسىپ ءجۇر. اتىراۋ وبلىسىندا قۇرىلعان جەدەل شتابتىڭ نۇسقاۋىمەن ۋنيۆەرسيتەتتەر قالا ىرگەسىندەگى المالى جانە بەسىكتى ەلدى مەكەندەرىن تاسقىن سۋدان قورعايتىن بيىك بوگەتتەردى اياقتاپ قالعان. ۋنيۆەرسيتەتكە بولىنگەن ايماقتا جەرگىلىكتى كومپانيالار تەحنيكامەن قامتاماسىز ەتىپ, بوگەت تۇرعىزۋدى تاۋلىك بويى جۇرگىزىپ كەلەدى. بوگەتتىڭ تاسقىن سۋعا بەرىكتىگىن ارتتىرۋ ءۇشىن ستۋدەنتتەر مەن وقىتۋشى پروفەسسورلار قاپقا جەدەلدەتە توپىراق تولتىرىپ ازىرلەپ, توسپانى بەكەمدەپ جاتىر. ۋنيۆەرسيتەتتەردىڭ جەدەل شتابى ستۋدەنتتەر مەن قىزمەتكەرلەردى قاجەتتى قۇرال-سايمانمەن قامتاماسىز ەتىپ, جىلى شاتىرلار تىگىپ, ىستىق تاماق دايىنداپ, تاسىمالداۋشى اۆتوبۋستاردى ۇيىمداستىرۋدا. وسىلايشا, جەدەل ءارى تاسقىنعا بەرىك 10 شاقىرىمعا سوزىلعان بوگەت سالىنىپ جاتىر.
اقتوبە وبلىسىنداعى سۋ تاسقىنىنا قارسى جۇرگىزىلىپ جاتقان قارقىندى جۇمىستارعا ق.جۇبانوۆ اتىنداعى اقتوبە وڭىرلىك ۋنيۆەرسيتەتىنەن 500-گە جۋىق ەرىكتى بەلسەندى اتسالىسىپ جاتىر. ولار 27-ناۋرىزدان باستاپ اپاتتان قورعاۋ شارالارىنا, سونىڭ ىشىندە, قۇم تاسۋ, بوگەت جاساۋ جانە ەۆاكۋاتسيالاۋ جۇمىستارىنا اتسالىسىپ جاتىر. سونىمەن قاتار گۋمانيتارلىق كومەك كورسەتۋ ورتالىقتارىندا قاجەتتى تۇرمىستىق تاۋارلاردى ۇلەستىرۋ جانە رەتتەۋ جۇمىستارىنا دا كومەكتەسىپ كەلەدى. ال ۋنيۆەرسيتەت قىزمەتكەرلەرى مەن وقىتۋشىلارى, شارۋاشىلىق ءبولىمىنىڭ ماماندارى, «ازىق-ت ۇلىك ونىمدەرىنىڭ تەحنولوگياسى» ماماندىعىنىڭ ستۋدەنتتەرى ەۆاكۋاتسيا ايماعىندا قىزمەت ەتىپ جۇرگەن قۇتقارۋشىلارعا 250-دەن اسا ىستىق تاعام تاراتتى. ەۆاكۋاتسيالىق پۋنكتتەردە ورنالاسقان وتباسىلارعا پسيحولوگيالىق قولداۋ كورسەتۋ ماقساتىندا پەداگوگيكا جانە ءبىلىم بەرۋدەگى مەنەدجمەنت فاكۋلتەتىنىڭ وقىتۋشىلارى مەن ستۋدەنتتەرى تۇراقتى تۇردە پسيحولوگيالىق ترەنينگتەر وتكىزىپ جاتىر.
عىلىم جانە جوعارى ءبىلىم ۆيتسە-ءمينيسترى دارحان احمەد-زاكي وتكەن اپتادا قوستاناي قالاسىنا جۇمىس ساپارىمەن بارىپ, ا.بايتۇرسىن ۇلى اتىنداعى ۋنيۆەرسيتەتتە ورنالاسقان گۋمانيتارلىق كومەك قابىلداۋ پۋنكتىنىڭ جۇمىسىمەن تانىسقان ەدى. مۇندا اتالعان ۋنيۆەرسيتەت قىزمەتكەرلەرى مەن ستۋدەنتتەرى گۋمانيتارلىق جۇك تيەۋگە كۇش سالىپ كەلەدى. استانا, جامبىل, قاراعاندى, ليساكوۆسك پەن قىرعىزستاننان زارداپ شەككەندەرگە كومەك جيناپ جاتىر. قازىرگى تاڭدا 174 مىڭ توننا ازىق-ت ۇلىك پەن ەڭ قاجەتتى زاتتار كەلىپ, ەرىكتىلەر ونى سۋ تاسقىنىنان زارداپ شەككەندەرگە ۇلەستىرىپ وتىر. قازىردىڭ وزىندە 750-دەن اسا ادامعا كومەك كورسەتىلدى, بۇل كورسەتكىش ساعات سايىن ارتىپ كەلەدى. سول ساپارى اياسىندا ۆيتسە-مينيستر د.احمەد-زاكي ا.بايتۇرسىن ۇلى ۋنيۆەرسيتەتىنىڭ Smart ورتالىعىندا بولىپ, اتالعان جوعارى وقۋ ورنىنىڭ عالىمدارى بىلتىردان بەرى اينالىسىپ جاتقان سۋ رەسۋرستارىنىڭ جەدەل مونيتورينگى جانە گيدروتەحنيكالىق قۇرىلىستاردىڭ ەكولوگيالىق باقىلاۋ جۇيەسىن قۇرۋ جوباسىمەن تانىستى.
ءال-فارابي اتىنداعى قازاق ۇلتتىق زەرتتەۋ ۋنيۆەرسيتەتى سۋ تاسقىنى بولىپ جاتقان باتىس قازاقستان وبلىسىنا 5 ملن تەڭگەگە 20 توننا گۋمانيتارلىق كومەك جىبەردى. ال سۋ تاسقىنىنان ۇيلەرى زارداپ شەككەن 50 ستۋدەنتكە 100 مىڭ تەڭگەدەن جاردەماقى تاعايىندادى. جينالعان كومەكتىڭ جالپى سوماسى 10 ملن تەڭگەنى قۇرادى. وقۋ ورداسىنىڭ بازاسىندا ارنايى قايىرىمدىلىق پۋنكتى اشىلدى. اكتسياعا ۋنيۆەرسيتەتتىڭ وقىتۋشىلارى مەن قىزمەتكەرلەرى, ءبىلىم الۋشى جاستار بەلسەندى اتسالىستى. گۋمانيتارلىق كومەك تىزىمىندە جاڭا كيىم-كەشەكتەر, ازىق-ت ۇلىك, جەكە گيگيەنا قۇرالدارى, كارەماتتار, بۇزىلمايتىن تاعامدار, اۋىزسۋ, توسەك-ورىن جابدىقتارى, رەزەڭكە ەتىكتەر مەن قولعاپتار جانە باسقا دا قاجەتتى زاتتار بار. ونىڭ ىشىندە 250 قالىڭ توسەنىش, 500 كورپە, 300 جاستىق, 700 سۇلگى, 400 كىر سابىن, 500 ليتر سۇيىق سابىن بار. وسىعان قوسا 1 300 كيلو ماكارون ونىمدەرى, 200 كيلو قاراقۇمىق, 500 كيلو كۇرىش, 200 كيلو قانت سياقتى ۇزاق ساقتالاتىن تاعام تۇرلەرى جونەلتىلدى. ۇيلەرى سۋعا كەتكەن جانە قالپىنا كەلتىرۋگە جارامسىز بولىپ قالعان وتباسىلاردىڭ ستۋدەنت بالالارىنا قولداۋ قاراجات جەكە وزدەرىنە اۋدارىلادى.