قازاقستان حالقى بىرلىگى كۇنى مەرەكەسى قارساڭىندا ۇلىتاۋ وبلىسىندا قازاقستان حالقى اسسامبلەياسىنىڭ ءىى سەسسياسى ءوتتى. سەسسيا جۇمىسىنا وبلىس اكىمى ب.ابدىعالي ۇلى قاتىسىپ, قۇتتىقتاۋ ءسوز سويلەدى, دەپ حابارلايدى Egemen.kz.
وبلىستىق قوعامدىق دامۋ باسقارماسىنىڭ باسشىسى د.مۇحاننىڭ بايانداماسىندا وبلىستاعى ەتنومادەني بىرلەستىكتەردىڭ قاتارى كوبەيە تۇسكەنى اتاپ ءوتىلدى.
«قازىرگى كەزدە وبلىستا رەسمي تىركەۋدەن وتكەن 8 ەتنومادەني بىرلەستىك جۇمىس ىستەيدى. ءبىر جىل بۇرىن ولاردىڭ سانى التاۋ بولاتىن. قازىرگى كەزدە جاڭا باستاماشىل توپتار قۇجاتتارىن تىركەۋگە دايىنداپ جاتىر. جىل سوڭىنا دەيىن ولار اككرەديتاتسيادان ءوتۋى ءتيىس», دەدى ول.
سەسسيا بارىسىندا ەتنومادەني بىرلەستىكتەردىڭ جۇمىستارىن جانداندىرۋ, ولاردىڭ جوبالارىن گرانتتىق قارجىلاندىرۋ جانە ت.ب. وزەكتى ماسەلەلەر ورتاعا سالىندى.
جيىن سوڭىندا اسسامبلەيانىڭ بەلسەندى مۇشەلەرى وبلىس اكىمىنىڭ العىس حاتىمەن ماراپاتتالدى.