قر باس پروكۋراتۋراسى 2022 جىلدىڭ قاڭتار ايىندا بولعان وقيعالارعا بايلانىستى قىلمىستىق ىستەردى تەرگەۋدى جالعاستىرىپ جاتىر. قىلمىستىق ءىس جۇرگىزۋ كودەكسىنىڭ 128-بابى تارتىبىندە بۇرىنعى ىشكى ىستەر ءمينيسترى ەرلان تۇرعىمباەۆ ۇستالدى. بۇل اقپاراتتى باس پروكۋراتۋرا راستادى, دەپ جازادى Egemen.kz.
«2024 جىلدىڭ 29 ساۋىرىندە اۋىر زارداپتارعا اكەلىپ سوققان بيلىك پەن لاۋازىمدىق وكىلەتتىكتەردى اسىرا پايدالانعانى ءۇشىن (قك-ءنىڭ 362-بابى 4-بولىگى) قازاقستان رەسپۋبليكاسىنىڭ قىلمىستىق ءىس جۇرگىزۋ كودەكسىنىڭ 128-بابى تارتىبىندە بۇرىنعى ىشكى ىستەر ءمينيسترى ەرلان تۇرعىمباەۆ ۇستالدى.
قىلمىستىق ىستە مەملەكەتتىك قۇپيالاردى قۇرايتىن مالىمەتتەردىڭ بولۋىنا بايلانىستى سوتقا دەيىنگى تەرگەپ-تەكسەرۋدىڭ باسقا دەرەكتەرى جاريا ەتۋگە جاتپايدى.
مەملەكەتتىك قۇپيالاردى قۇرايتىن سوتقا دەيىنگى تەرگەپ-تەكسەرۋ دەرەكتەرىن جاريا ەتۋگە جول بەرمەۋ قر قىجك-ءنىڭ 47 جانە 201-باپتارىنىڭ تالاپتارىمەن رەگلامەنتتەلگەن», دەلىنگەن باس پروكۋراتۋرا حابارلاماسىندا.