ىستانبۇلدا كىمدەر كۇرەسەدى؟

قازىر گرەك-ريم كۇ­رە­سى­نەن قازاقستان قۇرا­­ما­­­سى­نىڭ قور­جى­نىن­دا­­ وليمپيا و­يىن­دا­رىنىڭ ءتورت ليتسەنزياسى بار. العاشقى جول­­دامانى نۇرسۇلتان تۇرسى­نوۆ­تىڭ (87 كگ) يەلەنگەنى بەل­گىلى. بىل­تىر قانداسىمىز بەل­گرادتا ۇيىم­داس­­تىرىلعان الەم چەمپيوناتىندا ۇزدىك بەس با­لۋاننىڭ قاتارىنا قو­سى­لىپ, كوز­دەگەن ماقساتىنا قول جەت­­كىز­دى. ال بىشكەكتەگى باسەكەدە اي­دوس سۇلتانعالي (60 كگ), دەمەۋ جا­­دى­­راەۆ (77 كگ) جانە ءالىمحان سىز­­دى­قوۆ (130 كگ) تابىستى ونەر كورسەتتى.

الاتاۋدىڭ ارعى بەتىندە اتوي سال­عان اپايتوستەردىڭ اراسىنان ايدوستى بولە-جارا اتاپ وتۋگە بولادى. كەزىندە الەم چەمپيوناتىندا ەكى مار­تە قولا مەدالدى ولجالاپ, ازيا چەم­پيونى اتانعان 28 جاستاعى سىر بويى ساڭلاعىنىڭ وليمپياداعا ءالى بىردە-ءبىر جولى تۇسپەگەن ەدى. بيىل اقپان ايىن­دا استانا­دا وتكەن ەل چەمپيو­ناتىندا سۇل­تان­عالي ءوزىنىڭ باستى قارسىلاسى مەي­رامبەك ايناعۇلوۆتان ايلاسىن اسىرىپ, ليتسەنزيالىق تۋرنيرگە قاتىسۋ قۇقىعىنا يە بولدى. بىشكەكتە ول يراك پەن تايپەي سپورتشىلارىن ويسىراتا ۇتسا, تاجىكتىڭ تاس­تۇ­لەگىنە قارسى كەزدەسۋدە وتە ساۋاتتى تاكتيكا قۇرا ءبىلدى. سول كۇنى ايدوس سۇلتانعاليدىڭ ونەرىنە بار جانكۇيەر تامساندى.

دەمەۋ جادىراەۆ – ۇلتتىق كو­ماندا ساپىنداعى ەڭ جاسى ۇل­كەن بالۋان. 2017 جىلى الەم چەم­پيو­نا­تىنىڭ كۇمىس جۇلدەگەرى اتانعان جەتىسۋ ءوڭىرىنىڭ تۋماسى وسىدان ءۇش جىل بۇرىن توكيو وليمپياداسىندا ونەر كورسەتتى. بىراق ول جارىستا جادىراەۆتىڭ جولى بولمادى. بيىل دا ءدال وسى ساڭلاققا سەنىم ارتىلدى. وسى ورايدا جانكۇيەرلەر تاراپىنان «ەگدە تارتقان بالۋاندى عالامدىق دوداعا اپارۋدىڭ نە قاجەتى بار ەدى؟» دەگەن ساۋالدىڭ تۋىنداۋى زاڭدى. بىراق دەمەۋ ەل چەمپيوناتىندا ءوزىنىڭ مىقتى­لى­عىن تولىقتاي مويىنداتتى. جالىن­دى جاستاردى ايتپاعاندا, تاجىريبەلەرى ابدەن تولىسقان ماگو­ماد يبراگيموۆ پەن تەمىر­لان شادۋكاەۆ 34 جاستاعى ساقا سپورت­شىنىڭ قارقىنىنا شى­داي المادى. بىشكەكتە دە قازاق بالۋا­نى وتە جاقسى كۇ­رەستى. اسىرەسە جادى­راەۆتىڭ شە­شۋشى تۇستاعى باسە­­كەسى وتە اسەر­لى بولدى. وڭتۇستىك كورەيا­­نىڭ وكىلى دوۋون ليدەن 0:2 ەسە­بى­مەن ۇتىلىپ جاتقانىنا قارا­­ماستان, سوڭعى ساتكە دەيىن بوران­­بەك قوڭىراتوۆتىڭ شاكىرتى قار­قى­نىن ەش باسەڭدەتكەن جوق. ناتي­­­جە­­سىندە, قازاق بالۋانى جەڭىس­­تى قار­­سى­لا­سىنىڭ ۋىسىنان ج ۇلىپ اكەت­تى.

ال اسا اۋىر سالماق دارە­جە­سىندە ايقاسقان 29 جاستاعى ءالىم­حان سىزدىقوۆ وليمپيا ويىندارىنا جولداما السا دا, ونىڭ ونەرى كوپشىلىك كوڭىلىنەن شىقپادى. 2022 جىلى ازيا چەمپيونى اتانعان قازاقتىڭ نار تۇلعالى بالۋانى بىلتىر ازيا ويىندارى­ مەن قۇرلىق بىرىنشىلىگىن قولا مەدالمەن قورىتىندىلادى. وسى جارىستاردىڭ ەكەۋىندە دە سىزدىقوۆتىڭ فۋنكتسيونالدىق دايار­لىعى سىر بەرگەن ەدى. وسى جولى دا ءدال سولاي بولدى. جار­تى­لاي فينالدا قىرعىز­ستان­دىق رومان كيمدى ەداۋىر ۇپاي ايىر­ماشىلىعىمەن ۇتىپ جاتىپ, قار­سى­لاسىنىڭ ەسەپتى تەڭەستىرۋىنە مۇم­كىندىك بەردى. ول ازداي, سوڭعى ەكى مينۋتتا ءالىمحاننىڭ شار­شا­عانى سونشالىق, ول مۇلدەم كۇرەس­پەي قويدى. الىسىپ-ج ۇلىسۋ بىلاي تۇرسىن, تىپتەن ورنىنان تۇرا الماي قالدى. باسەكە 7:7 ەسەبى­مەن اياقتالدى. قانداسىمىز تەك قوسىمشا كورسەتكىشتەردىڭ ارقاسىندا عانا جەڭىسكە جەتىپ, جول­داماعا قول جەتكىزدى. پاريج­دە ءالىمحاننىڭ ءدال وسىنداي كۇ­رەسپەن الىسقا بارمايتىنى انىق. سوندىقتان دا جەكە باپ­كەرى بيسولت ديتسيەۆ ەكەۋى وسى ول­قى­لىق­تىڭ ورنىن تولتىرۋ كەرەك.

بىرەر ايدان كەيىن پاريجدە الاۋى تۇتاناتىن وليمپيا ويىن­­­­دارىنا قازاقستاننىڭ گرەك-ريم­ كۇرەسى شەبەرلەرىنە تولىق قۇرام­مەن بارۋ ءۇشىن ءالى ەكى جولداما قاجەت. بىشكەكتە ءبىز مەيىرجان شەرماحانبەتتىڭ وزا شاباتىنىنا ەش كۇمان كەلتىرمەگەن ەدىك. 2019 جىلعى الەم چەمپيوناتىنىڭ قولا, 2023 جىلعى ازيا ويىن­دا­رىنىڭ كۇمىس جۇلدەگەرى جانە ازيا چەمپيونى دەگەن اتاعى بار 27 جاستاعى شىمكەنتتىڭ شىمىر جىگىتىنىڭ تەڭدەسسىز ونەرىمەن تالايلاردى تامساندىرعانىنا تالاي مارتە كۋا بولعانبىز. بىراق كەيدە ونىڭ بولمايتىن جەردە جەڭىلىپ, كورەرمەندەر كوڭىلىن سۋ سەپكەندەي باساتىنى تاعى بار. قىرعىز رەس­پۋبليكاسىنىڭ باس شاھارىن­­دا ءدال سولاي بولدى. تۇساۋكەسەر كەزدە­سۋىندە تۇرىكمەنستاندىق راۆشان اتداەۆتىڭ اياعىن كوكتەن كەلتىرسە, شيرەك فينالدا جاسوس­پى­رىمدەر اراسىندا الەم چەمپيو­نى, جاستار مەن ەرەسەكتەر اراسىندا ازيا چەمپيونى, وزبەك­ستان­دىق ابرور اتاباەۆتان ايلاسىن اسىردى. الايدا شەشۋشى تۇستا جا­پو­ن­­­يا­­نىڭ جاس جۇلدىزى كيو­تارو سوگا­بەىنىڭ وسال تۇسىن تابال المادى.

جالپى, 67 كگ سالماق دارە­جەسىندە قازاقستاننىڭ وزىندە با­سە­كەلەستىك وتە جوعارى. بۇل سال­ماقتا الەم چەمپيوناتىندا بەس (1 كۇمىس, 4 قولا), قۇرلىق چەم­پيوناتىندا التى (2 التىن, 3 كۇمىس, 1 قولا) جانە ازيا ويىندارىندا ەكى (1 كۇمىس, 1 قولا) رەت جەڭىس تۇعىرىنا كوتەرىلگەن المات كەبىسباەۆ جانە جاستار بۋىنى اراسىنداعى دودالاردا دارالانعان دىنمۇحامەد قوشقار بار. 23 جاستاعى تارازدىڭ تاستۇلەگى ازيادا الدىنا جان سالماسا, الەم بىرىن­شىلىگىندە ۇزدىك ۇشتىكتى تۇيىن­دەدى. بىراق بۇل بالۋاننىڭ ەكەۋى دە ەل بىرىنشىلىگىندە مەيىر­جان شەر­ما­حان­بەتكە ەسە جىبەردى. قازاق­ستان چەمپيوناتىندا ءۇشىن­شى ورىنعا تابان تىرەگەن المات امان­بەكتى بيىل ازيا چەمپيو­نا­­تىندا كۇرەس­تىرگەن ەدى, ول ەكىن­شى اينالىمنان اسا المادى. سول سە­بەپتى دە 9-12 ماسىر ارا­لى­عىن­دا ىستانبۇلدا وتەتىن سوڭعى ليتسەن­­زيالىق تۋرنيرگە قايتا مەيىر­­جان­دى اپارعان ءجون بولار ەدى.

ليتسەنزيالىق تۋرنيردە 97 كگ­ سالماقتا ولجاس سىرلىبايعا سە­نىم ارتىلدى. الايدا تاجىري­بە­لى بالۋان «شۋ» دەگەندە ءسۇرىندى. ەل چەمپيوناتىندا كۇمىس مەدال­دى موينىنا ىلگەن يۋسۋف ماتسيەۆ ازيا بىرىنشىلىگىندە دە ءدال سول مەجەدەن كورىندى. بىراق فينالدا ونىڭ اناۋ-مىناۋ ەمەس, يراننىڭ اتاقتى پەحلەۆانى, توكيو وليمپياداسىنىڭ قولا جۇلدەگەرى, الەم جانە قۇر­لىق چەمپيونى, الەم چەمپيو­نا­تىنىڭ ەكى دۇركىن قولا جۇلدەگەرى, ازيا ويىندارىنىڭ جەڭىمپازى, مۇحاممادحادي ساراۆيگە ەسە جىبەر­دى. بالكىم, وسى جاعى ەسكە­رىلىپ, 20 جاستاعى جالىنداپ تۇر­عان جىگىتكە تاعى ءبىر مۇم­كىن­دىك بەرىلەتىن شىعار دەپ ويلايمىز. قالاي بولعاندا دا, بۇل – ۇلتتىق قۇراما باپكەرلەرىنىڭ قۇزىرىنداعى ماسەلە.

گرەك-ريم كۇرەسىنەن ازىرگە تەك يران قۇراماسى عانا وليمپيا ويىندارىنا تولىق قۇراممەن قاتىسۋ مۇمكىندىگىنە يە بولىپ وتىر. پارسى ەلىنىڭ اپايتوستەرى فرانتسيانىڭ باس شاھارىندا بارلىق التى سالماق دارەجەسىندە ونەر كورسەتەدى. قالعان كومان­دا­لاردىڭ كورسەتكىشتەرى مىناداي: كۋبا, الجير, مىسىر – 5, تۇركيا, قىتاي, قازاقستان – 4, ارمەنيا, اقش, قىرعىز رەس­پۋبليكاسى, وزبەكستان, جاپونيا – 3, رەسەي (AIN), ازەربايجان, چيلي, كولۋمبيا, تۋنيس, ۋكراينا, سەربيا – 2, چەحيا, بەلارۋس (AIN), بولگاريا, ۆەنەسۋەلا, ەكۆادور, ماجارستان, گوندۋراس, ماروككو, مولداۆيا, سولتۇستىك كورەيا, فينليانديا, فرانتسيا, گرۋزيا, ليتۆا, گەرمانيا جانە وڭتۇستىك كورەيا – 1. وسىلايشا, ازىرگە 72 جولدامانىڭ يەسى انىقتالدى. ەندىگى سىناق تۇركيادا وتەدى. انادولى ەلىندەگى جارىستىڭ قورىتىندىسى بو­يىنشا ءار سالماقتا العاشقى ءۇش ورىندى ولجالاعان بالۋاندار پاريجدەگى ويىنداردا كۇش سىناسۋ قۇرمەتىنە يە بولادى.