ۇلتتىق ستاتيستيكا بيۋروسى 22 ساۋىردە حالىق سانى جونىندە جاڭا دەرەك جاريالادى. وندا ەلىمىزدىڭ ەتنوستىق قۇرامىنداعى ۇلتىمىزدىڭ سانى وسى جىلدىڭ باسىنا قاراي 70,98%-عا جەتكەنى كورسەتىلگەن.
ەلىمىزدەگى قازاقتاردىڭ جالپى سانى العاش رەت 14 ميلليون ادامنان اسىپ, 2024 جىلدىڭ باسىندا 14 220 000 ادامعا جەتتى. وسىلايشا, تاۋەلسىزدىك جىلدارىندا ەلىمىزدەگى قازاقتار سانى ەكى ەسەدەي ءوستى. بۇل رەتتە 1989 جىلعى كەڭەس وداعىنداعى سوڭعى حالىق ساناعىنىڭ دەرەگى بويىنشا قازاقتاردىڭ ۇلەسى 39,7% بولعانىن ايتا كەتكەن ءجون.
ۇلتتىق ستاتيستيكا بيۋروسىنىڭ جاقىندا جاريالاعان مالىمەتىندە ەل وڭىرلەرىندەگى ەتنوستاردىڭ ۇلەسى دە كورسەتىلگەن. ماسەلەن, 5 وڭىردە قازاقتاردىڭ ۇلەسى 80%-دان اسادى: استانا – 81,63%, اقتوبە وبلىسىندا – 85,5%, ماڭعىستاۋ وبلىسىندا – 91,46%, اتىراۋ وبلىسىندا – 93%, قىزىلوردا وبلىسىندا – 96,2%. تاعى 8 وڭىردە قازاقتاردىڭ سانى ەلدەگى ورتاشا كورسەتكىشتەن كوپ. جالپى, ورىستار باسىم ەتنوس بولىپ كەلەتىن سولتۇستىك قازاقستان وبلىسىنان باسقا بارلىق وڭىردە قازاقتاردىڭ سانى كوپشىلىكتى قۇرايدى.
ستاتيستيكادا ەلىمىزدەگى ەكىنشى كوپ ەتنوس ورىستار بولىپ وتىر. ولاردىڭ سانى – 2 983 317 ادام. وسى ورايدا ورىس ەتنوسىنىڭ ۇلەسى ءبىر جىلدا 15,18%-دان 14,89%-عا دەيىن قىسقارعانى بايقالدى. ەلىمىزدەگى باسقا سلاۆيان ەتنوستارىمەن قاتار ورىستاردىڭ سانى دا ازايىپ كەلەدى.
ءۇشىنشى ءىرى ەتنوستىق توپ – وزبەكتەر. ولاردىڭ سانى – 660 564 ادام. بۇل – جالپى حالىقتىڭ 3,3% ۇلەسى. وسى كورسەتكىش ءبىر جىلدا 3,25%-دان ءوستى.
سانى بويىنشا ءتورتىنشى ورىنداعى ۋكرايندار 375,9 مىڭ ادامدى قۇرايدى. ولاردىڭ ۇلەسى وتكەن جىلدىڭ باسىنداعى 1,92%-دان 2024 جىلدىڭ باسىندا 1,88%-عا دەيىن قىسقاردى.
ەتنوستىق قۇرامدا بەسىنشى ورىنداعى ۇيعىرلاردىڭ سانى 301,6 مىڭعا جەتتى. ال باسقا ەتنوستاردىڭ ۇلەسىنە كەلسەك, نەمىستەر – 1,12%, تاتارلار – 1,11%, ازەربايجاندار – 0,76%, كورەيلەر – 0,60%, تۇرىكتەر – 0,45%, دۇنگەندەر – 0,42%.