وتاندىق عالىمدار سۋ تاسقىنىن اناليتيكالىق بولجاۋ جانە باقىلاۋ جۇيەسىن ازىرلەپ جاتىر. بۇل تۋرالى عىلىم جانە جوعارى ءبىلىم مينيسترلىگى حابارلادى.
مينيسترلىكتىڭ مالىمەتىنشە, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ عالىمدارى جاساعان اقپاراتتىق-تالداۋ جۇيەسى وبلىس وزەندەرىندەگى سۋ تاسقىنى جاعدايىن باقىلاۋعا مۇمكىندىك بەرەدى. ال اتالعان جوعارى وقۋ ورنىنداعى «اقپاراتتىق تەحنولوگيالار سالاسىنداعى قۇزىرەتتەر جانە تەحنولوگيالار ترانسفەرتى» ورتالىعىنىڭ باسشىسى رۋسلان چەتتىكباەۆ قولعا الىنعان جوبا تۋرالى: ء«بىزدىڭ الدىمىزدا ەلىمىزدىڭ شىعىسىنداعى ماۋسىمدىق سۋ تاسقىنىنان تۋىنداعان توتەنشە جاعدايلاردى مونيتورينگىلەۋ مەن بولجاۋدىڭ كەشەندى اقپاراتتىق-تالدامالىق جۇيەسىن, ماۋسىمدىق سۋ تاسقىنىن بولجاۋعا مۇمكىندىك بەرەتىن جۇيەنى ازىرلەۋ مىندەتى تۇردى. ءبىزدىڭ ۋنيۆەرسيتەتتە وسى جوبامەن جۇمىس ىستەۋ ءۇشىن وزەن گيدراۆليكاسى مەن سۋ باسۋ ايماقتارىن مودەلدەۋدى, زاماناۋي گەواقپاراتتىق جۇيەلەردى, قاۋىپتى نىسانداردى, ينفراقۇرىلىم نىساندارىن, مەكەمەلەردى, تۇرعىن ءۇي قۇرىلىسىن, رەلەفتى جانە مەتەو جاعدايلاردى ەگجەي-تەگجەي كارتوگرافيالىق بايلانىستىرۋدى پايدالانعان زەرتتەۋشىلەر توبى قۇرىلدى», دەدى.
زەرتتەۋشىلەر توبى وسى جۇمىسقا زاماناۋي اقپاراتتىق تەحنولوگيالاردى قولدانادى. ازىرلەۋگە عالىمداردان باسقا, شىعىس قازاقستان وبلىسى توتەنشە جاعدايلار دەپارتامەنتىنىڭ وكىلدەرى دە قاتىسىپ, جۇيەنى جاقسارتۋ, ونىڭ پراكتيكالىق الەۋەتىن ارتتىرۋ بويىنشا كەڭەس پەن ۇسىنىس بەرەدى. «د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ عالىمدارىمەن ءوزارا ءىس-قيمىل تۋرالى مەموراندۋمعا قول قويىلدى. بولاشاقتا سۋ تاسقىنى جاعدايىن كوزدەۋگە, بار تاۋەكەلدەردى ەسكەرە وتىرىپ, الدىن الۋ شارالارىن قابىلداۋعا مۇمكىندىك بەرەتىن تەحنولوگيانى بىرلەسىپ دامىتۋعا بەل بۋىپ وتىرمىز», دەدى شىعىس قازاقستان وبلىسى توتەنشە جاعدايلار دەپارتامەنتىندەگى توتەنشە جاعدايدىڭ الدىن الۋ باسقارماسىنىڭ باسشىسى ارمان ناۋرىزباەۆ.
جۇيەنى ازىرلەپ, جوبانى ىسكە اسىرعاننان كەيىن زەرتتەۋشىلەر ءوڭىر اۋماعىندا سۋ تاسقىنىن بولجاۋ, قاۋىپسىزدىكتى قامتاماسىز ەتۋ بويىنشا ۇسىنىمدار ازىرلەمەك. بۇل بىرنەشە ماسەلەنىڭ شەشىمىن تابۋعا مۇمكىندىك بەرەدى. بىرىنشىدەن, ەكونوميكالىق ماسەلەنى شەشۋگە سەپتەسەدى. ويتكەنى تج بولجاۋ, ولاردىڭ دامۋىن مودەلدەۋ فورس-ماجورلىق جاعدايدىڭ ءوڭىردىڭ ەكونوميكالىق كورسەتكىشتەرىنە اسەرىن ازايتۋعا نەمەسە تولىعىمەن جويۋعا جاعداي جاسايدى. ەكىنشىدەن, ەكولوگيالىق ماسەلەنى رەتتەيدى. باعدارلامانىڭ الىنعان ناتيجەلەرى سۋ تاسقىنى جاعدايىن بولجاۋعا كومەكتەسەدى, وسىلايشا توتەنشە جاعداي تۋىنداعان جاعدايدا تاۋەكەلدەردى ازايتادى. ۇشىنشىدەن, الەۋمەتتىك ماسەلەنىڭ شەشىمى بولا الادى. سەبەبى جوبا حالىقتىڭ قاۋىپسىزدىگىن ارتتىرۋعا, توتەنشە جاعداي اسەرىنەن بولاتىن زالالدى ازايتۋعا كومەكتەسەدى.