بىلتىر الماتى وبلىسىنىڭ ورتالىعى قوناەۆ قالاسىنىڭ باس جوسپارى بەكىتىلگەنى بەلگىلى. اتالعان قۇجاتقا سايكەس, اباي كوشەسى ارقىلى ارنا مەن 10-شاعىن اۋداندى جالعاستىراتىن جول سالىنىپ جاتىر. قۇرىلىسقا جاۋاپتى مەردىگەر – «اسار ستروي» جاۋاپكەرشىلىگى شەكتەۋلى سەرىكتەستىگى.
بۇل كوشەنىڭ ۇزىندىعى 14,3 شاقىرىمدى قۇرايدى. الدىن الا بەكىتىلگەن جوبالىق-سمەتالىق قۇجاتقا ساي, جاڭادان تۇسەتىن جولدىڭ بويىنداعى ينجەنەرلىك جەلىلەر تۇگەلدەي اۋىستىرىلىپ, جاڭارتىلادى. ونىڭ ىشىندە گاز قۇبىرى مەن ەلەكتر جەلىلەرى بار. ال كوشەنىڭ ءوزى 4 جولاقتى بولماق. جول بويىندا باق ورنالاستىرۋ كوزدەلىپ, اباتتاندىرۋ دا قاراستىرىلعان.
سونىمەن قاتار شاعىن اۋدانداردىڭ ىشىندەگى 12 كوشەنىڭ جولىنا اعىمداعى جوندەۋ جاسالادى. جوبانىڭ اياقتالۋ مەرزىمى 2025 جىلعا جوسپارلانعان. قازىر مۇندا 39 اۋىر تەحنيكا مەن 45 ادام قىزمەت ەتىپ جاتىر.
«8, 10-شاعىن اۋدانداردا سازدى اۋماقتار كوپ بولعاندىقتان, جولدىڭ بيىكتىگىن كوتەرىپ, جارتاستى تاستار توسەلىپ جاتىر. بۇل اسفالتتىڭ وتىرىپ كەتۋىنىڭ الدىن الادى. كوشە بويىنان جاڭبىر, قار سۋىنىڭ كەدەرگىسىز اعىپ ءوتۋى ءۇشىن ارىقتار نەمەسە سۋ ارناسىن سالۋ قاجەت. بۇل ءۇشىن ارنايى جوبا ازىرلەنىپ جاتىر», دەيدى قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى باعدات اليەۆ.
بۇعان قوسا قالاداعى 10 كوشەگە كۇردەلى جوندەۋ جۇمىسى جاسالادى.
الماتى وبلىسى