«قازاقستان تەمىر جولى» ۇك سۋ باسقان وڭىرلەردىڭ تۇرعىندارىن قاۋىپسىز ايماققا كوشىرۋگە سەپتىگىن تيگىزىپ جاتىر. اتىراۋ – قۇلسارى – اتىراۋ, قۇلسارى – ماڭعىستاۋ باعىتتارى بويىنشا 12 مىڭ ادام وتەۋسىز نەگىزدە جولاۋشىلار پويىزدارىمەن تاسىمالداندى. تاعى 2 مىڭنان اسا جولاۋشى اتىراۋ – ماڭعىستاۋ, اتىراۋ – الماتى, اتىراۋ – استانا باعىتتارى بويىنشا قوسىمشا ۆاگوندارمەن جەتكىزىلدى.
قوسىمشا پويىزدار ورال – قىزىلوردا, اتىراۋ – قاراعاندى, الماتى – اتىراۋ باعىتتارى بويىنشا جۇرەدى. بۇل 2 مىڭنان اسا جولاۋشىنى تاسىمالداۋعا مۇمكىندىك بەردى. سۋ تاسقىنىنان زارداپ شەككەن اۋدانداردان 500 بالانى ەمدەۋ-ساۋىقتىرۋ ورتالىقتارى مەن بالالار لاگەرلەرىنە تاسىمالداۋ ۇيىمداستىرىلدى.
قتج وبلىس اكىمدىكتەرىمەن, قورعانىس جانە توتەنشە جاعدايلار مينيسترلىكتەرىمەن تىعىز بايلانىستا جۇمىس ىستەپ جاتىر. پويىزدارمەن اۆاريالىق-قۇتقارۋ جۇمىستارىنا كومەكتەسۋ ءۇشىن 4 مىڭ قۇتقارۋشى, اسكەري قىزمەتشى تاسىمالداندى. بۇعان قوسا تەمىرجولشىلار اۋىر اۆتوموبيل تەحنيكاسىن تاسىمالداۋعا ارنالعان ۆاگونداردى ۇسىندى. اتىراۋ, اقتوبە, ورال قالالارىنا 400-دەن اسا كولىك جەتكىزىلدى. سۋ باسۋ ورىندارىنا گۋمانيتارلىق كومەك جەتكىزۋ ءۇشىن پويىزدار قۇرامىنداعى ۆاگوندار ءبولىندى. ارنايى تەحنيكا مەن گۋمانيتارلىق كومەكتى تاسىمالداۋ – ەرەكشە باقىلاۋدا.
قتج جاستارى زارداپ شەككەندەرگە كومەك كورسەتۋ, گۋمانيتارلىق جۇك جيناۋ ءۇشىن ەرىكتىلەر قوزعالىسىن قۇردى. قتج-دا جەدەل شتاب جۇمىس ىستەپ جاتىر.
تەمىرجولدىڭ بارلىق كۇشى مەن قۇرالى جوعارى دايىندىقتا. سۋ تاسقىنىنا قارسى ءىس-شارالاردى ۋاقتىلى جۇرگىزۋ ارقىلى تەمىرجول ينفراقۇرىلىمى زارداپ شەككەن جوق, پويىزدار قوزعالىسى كەستە بويىنشا ءجۇرىپ جاتىر. ماگيسترالدا شايىپ كەتۋگە قارسى 45 پويىز بار, تاۋلىك بويى كەزەكشىلىكتە 47 ءورت ءسوندىرۋ پويىزى بار.