قىلمىسقا توزبەۋشىلىكتىڭ تەگەۋرىنى

زاڭنىڭ نەگىزگى ماقساتى – ايەلدەر مەن بالالاردىڭ قۇقىقتارى مەن زاڭدى مۇددەلەرىن قورعاۋ شارالارىنىڭ تيىمدىلىگىن ارتتىرۋ. قازىرگى تاڭدا, وكىنىشكە قاراي, قوعامدا وتباسىنداعى زورلىق-زومبىلىق جانە تۇرمىستىق قۇقىق بۇزۋشىلىقتار تولاستاماي تۇر. ونىڭ ىشىندە, ابيۋزەرلەر تاراپىنان ايەلدەرى مەن بالالارىن اسا قاتىگەزدىكپەن ۇرىپ-سوعىپ جاتقان فاكتىلەردى ءجيى بايقايمىز.

قالىپتاسقان جاعدايلار وسكەلەڭ ۇرپاقتىڭ پسيحيكاسىنا كەرى اسەر ەتەتىندىگى جانە ولاردىڭ دامۋىن تەجەيتىندىگى ءسوزسىز. سوندىقتان بۇل ماسەلەلەردى رەت-رەتىمەن شەشۋ ماقساتىندا ەلىمىزدە الەۋمەتتىك باعىتتاعى قۇقىق بۇزۋشىلىقتاردى قاتاڭداتۋ ءۇشىن بىرقاتار جۇيەلى شارا قابىلدانىپ جاتىر. اشىپ ايتساق, ىشكى ىستەر مينيسترلىگى قۇرىلىمىندا ايەلدەردى زورلىق-زومبىلىقتان قورعاۋ بويىنشا ارنايى بولىمشەلەر قۇرىلدى. 2021 جىلى ولاردىڭ شتات سانى 256 بىرلىككە دەيىن ۇلعايتىلعان ەدى. مۇنداي لاۋازىمدار قازىر ءاربىر قالالىق جانە اۋداندىق پوليتسيا ورگانىندا بار. سونداي-اق ايەلدەر مەن كامەلەتكە تولماعاندارعا قاتىستى جىنىستىق زورلىق-زومبىلىق قىلمىستارىن تەرگەۋ بويىنشا ايەل تەرگەۋشىلەردىڭ ماماندانۋى ەنگىزىلدى.

قابىلدانعان نەگىزگى زاڭمەن 15 زاڭنامالىق اكتىسىنە, ونىڭ ىشىندە جەتى كودەكس پەن سەگىز زاڭعا وزگەرىستەر مەن تولىقتىرۋلار ەنگىزۋ كوزدەلگەن. زاڭدارمەن كامەلەتكە تولماعانداردى قورلاۋ (قورقىتۋ, كيبەربۋللينگ) جانە 16 جاسقا تولماعان بالانى قوعامدىق كولىكتەن ماجبۇر­لەپ ءتۇسىرۋ جانە باسقا دا تۇزەتۋلەر ءۇشىن اكىمشىلىك جاۋاپ­كەرشىلىك بەلگىلەنەدى. مۇنىڭ بارلىعى مەملەكەتتىك دەڭ­گەيىندە زاڭ مەن ءتارتىپتىڭ قاتاڭ ساقتالۋ قاعيداتى دارىپ­تەلۋىنە, ال قوعامدا قىلمىسقا مۇلدەم توزبەۋشىلىكتى ورناتۋعا باعىتتالعان. بۇل – قۇقىقتىق قوعام قۇرۋ جولىن­داعى تەگەۋرىندى قادام.

بەكبول ورىنباساروۆ,

سەنات دەپۋتاتى