ەلوردادا جاس عالىمدار ءسامميتى ءوتتى. سامميت الاڭىنا عىلىم جانە جوعارى ءبىلىم مينيسترلىگىنىڭ وكىلدەرى, جاس عالىمدار, دوكتورانتتار, عىلىمي ورتالىقتار مەن ۋنيۆەرسيتەتتەردىڭ قىزمەتكەرلەرى, مەملەكەتتىك سەكتوردىڭ وكىلدەرى, كاسىپكەرلەر جينالدى.
ءسامميتتىڭ اشىلۋىندا ءسوز العان عىلىم كوميتەتى باسقارماسىنىڭ باسشىسى رەنات ەلشيبەكوۆ جاستاردىڭ عىلىمعا كەلۋىنە مەملەكەتتىڭ مۇددەلى ەكەنىن, سوعان ساي ەرەكشە قولداۋ كورسەتىلىپ جاتقانىنا توقتالدى.
«سوڭعى جىلدارى ەلىمىزدە عىلىمنىڭ دامۋىنا ايتارلىقتاي نازار اۋدارىلىپ وتىر. ءبىز عىلىمدى قاجەتسىنەتىن ەكونوميكا قۇرۋ جانە وتاندىق عىلىمدى جۇيەلى دامىتۋ بويىنشا بەلسەندى جۇمىستى كورىپ وتىرمىز. سوڭعى 2-3 جىلدا عىلىم بيۋدجەتى بىرنەشە ەسە ءوستى. سونىڭ ىشىندە جاس عالىمداردى قولداۋعا ەرەكشە كوڭىل ءبولىنىپ كەلەدى. جاس عالىمدار ءۇشىن ارنايى «جاس عالىم» گرانتتارى بار. كەلەسى ءۇش جىلدىق كەزەڭدە جاس عالىمداردىڭ زەرتتەۋلەرى ءۇشىن گرانتتارعا 18 ميلليارد تەڭگە ءبولۋ كوزدەلگەن. جىل سايىن الەمنىڭ جەتەكشى عىلىمي ورتالىقتارىندا 500 وتاندىق عالىم تاعىلىمدامادان وتەدى. 2023 جىلى 809 عالىمعا الەمنىڭ جەتەكشى ورتالىقتارىندا عىلىمي تاعىلىمدامادان وتۋگە گرانتتار بەرىلدى. بۇل باعىتتاعى جۇمىس جالعاسىپ جاتىر. ۋنيۆەرسيتەت عىلىمى دا دامىپ كەلەدى. جوو جانىنان ينجينيرينگ ورتالىقتارى مەن تەحنوپاركتەردى قۇرۋعا 16 ملرد تەڭگە ءبولىندى», دەدى ر.ەلشيبەكوۆ.
كوميتەت وكىلىنىڭ ايتۋىنشا, عىلىمدى باسقارۋ جۇيەسىن جەتىلدىرۋ, بيزنەستى ىنتالاندىرۋ ءۇشىن جۇمىستار جۇرگىزىلىپ جاتىر. اتاپ ايتقاندا, «عىلىم جانە تەحنولوگيالىق ساياسات تۋرالى» زاڭ جوباسى جانە «كاسىپكەرلىك سۋبەكتىلەرى ءۇشىن عزتكج-عا (عىلىمي-زەرتتەۋ جانە تاجىريبەلىك-كونسترۋكتورلىق جۇمىستار) شەگەرىمدەر تۋرالى زاڭنامالىق نورمالار ازىرلەندى. قابىلدانعان شارالاردىڭ ناتيجەلەرى قازىردىڭ وزىندە كورىنىپ تۇر. 2023 جىلى عىلىمي-زەرتتەۋ قىزمەتىمەن اينالىساتىن قىزمەتكەرلەر سانى, سونداي-اق قازاقستان رەسپۋبليكاسىندا عزتكج شىعىنى ارتتى.
جيىندا ساياساتتانۋ عىلىمىنداعى PhD جاقسىلىق سابيتوۆ, اكادەميك ن.د.باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعى ديرەكتورىنىڭ ورىنباسارى, PhD ارمان باتپەنوۆ, قاۋىمداستىرىلعان پروفەسسور سەرىك ورازعاليەۆ, استانا IT ۋنيۆەرسيتەتى عىلىم جانە يننوۆاتسيا دەپارتامەنتىنىڭ ديرەكتورى, PhD نۇرحات جاكيەۆ, «عىلىم قورى» اق باسقارما توراعاسىنىڭ ورىنباسارى, PhD اليا سەمباەۆا جاستاردى عىلىمعا شاقىرۋ ماعىناسىندا بايانداما جاساپ, جاس عالىمدارعا ارنالعان مەملەكەتتىك قولداۋدىڭ شارالارىن, تۇرلەرى مەن جولدارى جونىندە كەڭىنەن تارقاتتى.
سامميت بارىسىندا «جاس عالىمداردىڭ تاجىريبەسى: مۇمكىندىكتەرى مەن بولاشاعى» تاقىرىبىندا سەسسيا ءوتتى. بايانداماشىلار ءتۇرلى عىلىمي سالاداعى جەتىستىكتەرى مەن عىلىمي جوبالارىمەن ءبولىستى. تالقىلاۋ قازاقستاننىڭ عىلىمي قوعامداستىعىنداعى جاس عالىمداردىڭ مۇمكىندىكتەرى مەن بولاشاعىن انىقتاۋعا, سونداي-اق ەل جاستارىنىڭ عىلىمي قىزمەتىن ودان ءارى دامىتۋ جولدارىن ىزدەۋگە باعىتتالعان.