اقتوبە وبلىسىندا سۋ تاسقىنىنا بايلانىستى جاعداي تۇراقتالسا دا, اقتوبە قالاسى مەن التى اۋداندا جاريالانعان توتەنشە جاعداي رەجىمى الىنعان جوق. قالاعا قاۋىپ توندىرگەن اقتوبە, قارعالى, سازدى سۋقويمالارىنداعى سۋ كولەمى بىرقالىپتى.
سۋ تاسقىنى كەزىندە ەڭ كوپ زارداپ شەككەن ويىل اۋدانىنىڭ ەكپەتال, جاڭاباز جانە قاراتال اۋىلدارىندا 340 ءۇيدى سۋ باسسا, 49 ءۇي ءالى كۇنگە دەيىن سۋ استىندا. وسى اۋىلداردىڭ تۇرعىندارى ون كۇننەن بەرى اۋدان ورتالىعىنداعى ءۇش ەۆاكۋاتسيالىق ورىندى پانالاپ وتىر.
ۆيتسە-پرەمەر سەرىك جۇمانعارين 8 ساۋىردە ويىل اۋدانىنا كەلىپ, ەۆاكۋاتسيالىق ورىنداردى ارالاپ, وسى جەردەگى تۇرعىندارىمەن جۇزدەستى. باسپانالارىنان, مالىنان ايىرىلعان تۇرعىندار ۆيتسە-پرەمەردەن جانە وبلىس اكىمى اسحات شاحاروۆتان تۇرۋعا جارامسىز بولىپ قالعان باسپانالارى ءۇشىن مەملەكەتتەن قانشا وتەماقى تولەنەتىنىن, ءۇيدىڭ قاشان سالىناتىنىن سۇرادى. ەكپەتالداعى 48 ءۇيدىڭ, جاڭابازداعى 19 ءۇيدىڭ يەسى ويىل ەلدى مەكەنىنەن جاڭا باسپانا سالىپ بەرسە, اۋدان ورتالىعىنا ءبىرجولاتا قونىس اۋدارۋعا كەلىسەتىندەرىن ايتتى. سەرىك جۇمانعارين اۋدان اكىمى اسقار قازىباەۆقا وسى ۇسىنىستى نازارعا الىپ, ينجەنەرلىك ينفراقۇرىلىمى جۇرگىزىلگەن جەر تەلىمدەرىنەن قۇرىلىس ورىندارىن تەزىرەك تاڭداۋدى تاپسىردى.
ويىل اۋدانىنىڭ بىرنەشە ەلدى مەكەنى اراسىندا سۋدىڭ قايتپاۋى سەبەپتى بايلانىس جوق. اۋىلىشىلىك جولدار بۇزىلدى, ويىل-قوبدا تاسجولىنىڭ اۋدان ورتالىعىنا كىرەبەرىسىندەگى ۇلكەن كوپىردى سەڭ بۇزىپ كەتكەن. قازىر جۇرت ۋاقىتشا پونتوندى وتكەل ارقىلى قاتىناپ ءجۇر. سارالجىن اۋىلدىق وكرۋگى شيقۇدىق اۋلىندا ەلەكتر جارىعى جوق, سۋ قۇبىرىن سەڭ بۇزىپ كەتكەن, جول قاتىناسى ۇزىلگەن. ازىق-ت ۇلىك اۋىلعا تىكۇشاقپەن جەتكىزىلىپ جاتىر. شيقۇدىق اۋلىنىڭ تۇرعىندارى تاسقىن بۇزعان جول ۋچاسكەلەرى مەن وتكەلدەردى تەزىرەك جوندەپ بەرۋدى سۇرادى. ۆيتسە-پرەمەر سۋ تاسقىنىنان زارداپ شەككەن قوبدا اۋدانىنا دا كەلدى. 27 ناۋرىزدا اۋىل شەتىندەگى قوبدا وزەنى ارناسىنان شىعىپ, اۋدان ورتالىعىنداعى 279 ءۇيدى, اكىمشىلىك عيماراتتى باسىپ قالدى, مەكتەپ پەن بىرنەشە دۇكەنگە سۋ كىردى. تۇرعىندار اۋدان ورتالىعىنداعى سپورت كەشەنى عيماراتىنا ۋاقىتشا ورنالاستىرىلدى. بۇگىندە 25 ءۇي تولىعىمەن قيراپ, 12 ءۇي اپاتتى جاعدايدا. ۆيتسە-پرەمەر قوبدا اۋدانىنىڭ اكىمى ىزگىلىك تىنىمگەرەەۆكە زارداپ شەككەندەرگە ارناپ تەزىرەك ءۇي قۇرىلىسىن باستاۋدى تاپسىردى. بىلتىر كوكتەمدە دە قوبدا ەلدى مەكەنىنىڭ 25 ءۇيى سۋعا كەتىپ, جاڭا باسپانا سالىنعان ەدى.
سۋ تاسقىنى كۇندەرى 55 ەلدى مەكەن ەلەكتر قۋاتىنان اجىراتىلعان. قازىر 34 ەلدى مەكەندە ەلەكتر قۋاتى قالپىنا كەلتىرىلدى. وسى جۇمىستارمەن 60 ادامنان تۇراتىن 11 بريگادا شۇعىلدانىپ جاتىر.
اقتوبە وبلىسى