اقتوبە وبلىسىندا سۋ باسۋ قاۋپى بار جەرلەردەن 10 مىڭ 138 تۇرعىن (ونىڭ 4077-ءى بالا) ەۆاكۋاتسيالانىپ, 10 663 باس مال قاۋىپسىز جەرگە كوشىرىلدى. قازىرگى كەزدە ۋاقىتشا پانالاۋ ورىندارىندا 1 636 ادام تۇرىپ جاتسا, ونىڭ 689-ى بالا. ازىرگە قاۋىپ جوق, 2 536 ادام ءوز ۇيىنە ورالدى, دەپ حابارلايدى Egemen.kz.
اقتوبە وبلىسى تجد توتەنشە جاعدايلاردى جويۋ باسقارماسىنىڭ باس مامانى نۇربەك ورالباەۆتىڭ حابارلاۋىنشا, 25 ناۋرىز-6 ءساۋىر ارالىعىندا وڭىردە 1 061 تۇرعىن ءۇي, 689 ساياجاي ۇيلەرى مەن 46 عيماراتقا سۋ كىرگەن. كۇن كۇرت جىلىنىپ, قار ەرىگەن 21 ناۋرىزدان باستاپ, كوشەلەردەن 1 ملن 360 مىڭ تەكشە مەتر سۋ سورىلىپ, 157 مىڭ قاپشىق, 300 مىڭ توننا ينەرتتى ماتەريال جەتكىزىلگەن. سۋ باسۋ قاۋپى بار ايماقتاردان ادامداردى قۇتقارۋعا پوليتسيا دەپارتامەنتى, تجد-ءنىڭ جەكە قۇرامى, ۇلتتىق ۇلان جاۋىنگەرلەرىنەن 1 364 ادام جۇمىلدىرىلىپ, 247 بىرلىك تەحنيكا, 200 بىرلىك ءجۇزۋ قۇرالدارى, ەكى سۋ سوراتىن قوندىرعى پايدالانىلدى.
نارۋىزدىڭ سوڭعى كۇنى ويىل-قوبدا تاسجولىن تاسقىن سۋ بۇزىپ كەتكەندىكتەن, ويىل اۋدانى تۇرعىندارى قاتىناسسىز قالدى. ادامدار مەن كولىكتەردى پونتوندى وتكەلمەن جەتكىزۋ ءۇشىن اقتوبە وبلىسىنا قورعانىس مينيسترلىگى ينجەنەرلىك توبىنىڭ اسكەريلەرى كەلىپ, 6 ساۋىردەن باستاپ ويىل اۋدانىنىڭ 427 تۇرعىنىن وتكىزدى, 400 كگ ازىق-ت ۇلىك جىبەردى.
وتكەن تاۋلىكتە قارعالى وزەنىندەگى سۋ دەڭگەيىنىڭ كوتەرىلۋىنەن اقجار, جيليانكا تۇرعىن ءۇي الاپتارى مەن سادوۆوە, سولنەچنوە, ەكو باۋ-باقشا ۇجىمدارىنا سۋ باسۋ قاۋپى ءتونىپ, وسى اۋماقتان 76 ادام ەۆاكۋاتسيالاندى, ونىڭ 25-ءى بالا. ولار قازىرگى ۋاقىتتا قالاداعى №71 ورتا مەكتەپتەگى ۋاقىتشا ورنالاستىرۋ ورنىندا جاتىر.
اقتوبە وبلىسى