اقتوبەدەگى انا مەن بالا ءولىمى: سوت ەشكىمدى جازالاعان جوق

اقتوبە وبلىستىق سوتىنىڭ ءباسپاسوز قىزمەتى حابارلاعانداي, قىلمىستىق ىستەر جونىندەگى مامانداندىرىلعان اۋدانارالىق سوتىندا پاتەرگە زاڭسىز كىرىپ ءۇيدى توناعان, سونىمەن قاتار  ەكى ادامدى ءولتىرىپ, كىشكەنتاي قىزدى ولتىرۋگە وقتالدى دەگەن ايىپ تاعىلعان مارقۇمعا قاتىستى (192-بابىنىڭ 3-بولىگى, 4-تارماعى, 99-بابىنىڭ 2-بولىگى, 1,14-تارماقتارى, 24-بابىنىڭ 3-بولىگى, 99-بابىنىڭ 3-بولىگى) ءىس قارالدى.  

سوتتا انىقتالعانداي, سوتتالۋشى ە. 2023 جىلعى 28 ناۋرىزدا تۇندە ماس كۇيىندە ۆەلوسيپەدپەن ۇيلەردىڭ ءبىرىنىڭ جانىنان ءوتىپ بارا جاتىپ, ەكىنشى قاباتتاعى پاتەردىڭ بالكونىنىڭ اشىق تۇرعان ەسىگىن بايقاعان.

«سوتتالۋشى گاز قۇبىرى ارقىلى پاتەردى توناۋ ماقساتىندا ەكىنشى قاباتتاعى ۇيگە كىرگەن, بىراق اقشا مەن باعالى زاتتاردى تاپپاعان. پاتەر يەسى سىبدىردان ويانعان كەزدە قىلمىسكەر ونى بىرنەشە رەت دەنەسىنىڭ ءار جەرىنەن پىشاقتاپ كەتكەن. كەيىن اناسىنىڭ ايقايىنان ويانعان ۇلىن دا پىشاقتاعان.  العان جاراقاتتارىنىڭ سالدارىنان اناسى مەن ۇلى وقيعا ورنىندا قايتىس بولدى.

وسى كەزدە بالالار بولمەسىندە ۇيىقتاپ جاتقان كىشكەنتاي قىز دىبىستاردان ويانىپ, جەردە جاتقان اعاسىنىڭ ءمايىتىن جانە قىلمىسكەردى كورەدى. ە. اتتى سوتتالۋشى كىشكەنتاي قىزدى كورىپ, ۇيدە تاعى بىرەۋ بار ما دەپ سۇرايدى. كەيىن قىزدى ەكى قولىمەن تۇنشىقتىرىپ, موينىنا بىرنەشە رەت پىشاقپەن سوققى جاسايدى. سول ساتتە قىز ەسىنەن تانىپ قالادى. ە., ونىڭ بويىندا تىرشىلىك بەلگىلەرىنىڭ جوقتىعىنا كوز جەتكىزىپ, قىزدى ءولدى دەپ ويلاپ, وقيعا ورنىنان بوي تاسالاعان», دەپ سوتتا اسا اۋىر قىلمىستىڭ جاي-جاپسارى ايتىلدى.

ال قوسارلانعان كىسى ءولتىردى دەگەن كۇدىكتى ۇستالعان سوڭ قاماۋعا الىنعان تەرگەۋ يزولياتورىندا قايتىس بولعان.

قورعاۋشى تاراپ سوتتان ايىپتالۋشىنىڭ كىناسى ءىس ماتەريالدارىمەن دالەلدەنبەگەندىكتەن, سوتقا دەيىنگى تەرگەپ-تەكسەرۋ زاڭ بۇزۋشىلىقتارمەن جۇرگىزىلگەندىكتەن اقتاۋشى نەگىزدەر بويىنشا ءىستى توقتاتۋدى سۇرادى.

«پروكۋرور ايىپتاۋدى قولداپ, سوتتان مارقۇم ە.-نى جازا تاعايىنداماي, كىنالى دەپ تانۋىن سۇرادى. ە.-ءنىڭ كىناسى سوتتا زەرتتەلگەن دالەلدەمەلەردىڭ جيىنتىعىمەن, ونىڭ ىشىندە ە.-ءنىڭ ءوزىنىڭ كىناسىن مويىنداۋ تۋرالى ايعاقتارىمەن, وقيعا ورنىندا كوشەدەگى بەينەباقىلاۋ كامەرالارىنىڭ جازبالارى, بازالىق ستانتسياداعى ابونەنتتىك نومىرلەردىڭ تالداۋى, ساراپتامالىق زەرتتەۋلەر, ءتىرى قالعان جاس قىزدىڭ ايعاقتارى تەكسەرۋ جانە ناقتىلاۋمەن دالەلدەندى. سوت ۇكىمىمەن مارقۇم ە., جازا تاعايىندالماي, قىلمىس جاساعانى ءۇشىن كىنالى دەپ تانىلدى. سوت ۇكىمى زاڭدى كۇشىنە ەنگەن جوق», دەپ حابارلادى اقتوبە وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى.

سونىمەن قاتار سوت اقتوبە وبلىسىنىڭ ءىىب باستىعى مەن پروكۋرورىنا قاتىستى سوتقا دەيىنگى تەرگەپ-تەكسەرۋ بارىسىندا جىبەرىلگەن زاڭ بۇزۋشىلىقتار بويىنشا جەكە قاۋلى شىعاردى.