قاپىدا قارعىن سۋدىڭ استىندا قالعان اعايىننىڭ جاعدايىنا قىزىلوردالىقتار دا الاڭداۋلى. اپات حابارى ەستىلگەننەن-اق قىزىلوردا وبلىسى تجد كۇش-قۇرالدارى اۆاريالىق-قۇتقارۋ جۇمىستارىن جۇرگىزۋگە قوسالقى كۇش رەتىندە قوستاناي وبلىسىنا جىبەرىلدى.
وبلىستىق تجد توتەنشە جاعدايلاردى جويۋ باسقارماسىنىڭ باستىعى, ازاماتتىق قورعاۋ پودپولكوۆنيگى جاندوس دوسىموۆ باستاعان 31 ادامدىق قۇتقارۋ جاساعى, 6 تەحنيكا, 10 موتوپومپا, 2 قايىق 27 ناۋرىزدا قوستاناي وبلىسىنداعى امانگەلدى اۋدانىنا جەتىپ, جۇمىستى باستاپ كەتتى. اۋەلگىدە ولار امانگەلدى اۋىلىنداعى اباي, پالۋان, بودانوۆ كوشەلەرىندەگى ەرىگەن قار سۋىن تارتتى.
«كەلەسى كۇنى ءبىزدىڭ جىگىتتەر امانگەلدى اۋىلىنان 9 شاقىرىم جەردەگى شىنتاس فازەنداسىنان 5 ادامدى قۇتقارىپ, ولاردى قاۋىپسىز جەرگە شىعاردى. 10 مىڭ تەكشە مەتر سۋ تارتتى. تاۋلىكتىك كەزەكشىلىك ۇيىمداستىرىلدى», دەيدى وبلىستىق تجد «وسجاقجق» رمم باستىعىنىڭ ورىنباسارى باۋىرجان وسپانوۆ.
قىزىلوردالىق قۇتقارۋشىلار بۇگىنگە دەيىن موتوپومپالار كومەگىمەن 22 398 تەكشە مەتر سۋ تارتىپ, 25 ادامدى قۇتقارىپ قالىپتى. جايىلعان سۋمەن الىسىپ ءجۇرىپ, «داۋلەت» شارۋا قوجالىعىنىڭ جۇزدەن اسا مالىن قاۋىپسىز ايماققا شىعاردى. دەڭگەيى كۇرت كوتەرىلگەن جالداما وزەنىنىڭ جاعاسىن نىعايتىپتى. ەلەكتر جۇيەسىنىڭ ماماندارىنا سۋ تاسقىنىنان زاقىمدالعان باعانالارىن قالىپقا كەلتىرۋگە كومەك بەرگەن.
ايتىپ كەلمەيتىن اپات كەزىندە كاسىبي بىلىكتىلىك تانىتقان قۇتقارۋشىلارعا قوستانايلىقتار العىس ايتىپ جاتىر. ال 1 ساۋىردە وبلىستىق توتەنشە جاعدايلار دەپارتامەنتى قۇتقارۋ جاساعىنىڭ 35 ادامى مەن 3 تەحنيكاسى, 10 موتوپومپاسى, 2 قايىق اتىراۋداعى اعايىنعا كومەككە اتتاندى.
قىزىلوردا