ەستىمەگەن ەلدە كوپ. نەمەرە دەگەندى بىلەمىز. روبوت دەگەندى ەستىپ ءجۇرمىز. ەندى جاقىن كۇندەرى روبوت-نەمەرە دەگەنگە دە قۇلاعىمىز ۇيرەنەتىن بولادى.
ميۋنحەندىك «Navel Robotics» ستارتابى قارتتار ۇيىندە پايدالانۋعا ارنالعان روبوت-نەمەرەلەردى ويلاپ تاپتى. بۇل جاساندى ينتەللەكتىنىڭ ەرەكشەلىگى – ەگدە جاستاعى ادامدارعا قولعابىس جاسايتىنىندا. ياعني قاريالارمەن كادىمگى قۇرداسىنداي سىرلاسادى, ءدارى-دارمەكتىڭ ۋاقتىلى قابىلدانۋىن قاداعالايدى, ءتىپتى اڭگىمەگە ساي ءازىل ايتىپ, اتا-اجەلەردىڭ كوڭىلىن كوتەرەدى. 70 سانتيمەترلىك ەلگەزەك «نەمەرە» اپتاسىنا جەتى كۇن, تاۋلىگىنە 24 ساعات توقتاۋسىز قىزمەت ەدى. بىراق سوندا دا جۇمىسىنان كەشىكپەيدى, ەشقاشان رەنجىمەيدى جانە ەشكىمنەن العىس دامەتپەيدى. جوبانىڭ نەگىزىن قالاۋشى كلود تۋسسەن جاڭا روبوتتىڭ ەگدە جاستاعى ادامدار اراسىندا تەز تانىمال بولا باستاعانىن, وعان تۇرعىندار ۇلكەن قىزىعۋشىلىق تانىتىپ جاتقانىن اتاپ ءوتتى. ەرتەگىدەگى دجەپەتتو اقساقالدىڭ اعاشتان قۋىرشاق-بالا جاساپ الاتىنى ەسىڭىزدە شىعار؟ ارتىنشا پينوككيو دەپ ات قويعان قۋىرشاعى شىنايى بالاعا اينالىپ, اكەسىنىڭ كومەكشىسى بولادى. ەرتەگىنىڭ شىنعا اينالعانىنا كوزىمىز جەتىپ وتىر.
كەزدەيسوقتىق پا, الدە...
ادامزات تاريحىندا تاڭداي قاقتىرارلىق تالاي وقيعا بولعان. سونىڭ ءبىرى – 1966 جىلى جاعاجايدا بولعان جاعداي.
رودجەر لوزەر ەسىمدى ءتورت جاسار بالا امەريكانىڭ سالەم قالاسىنىڭ ماڭايىنداعى تەڭىزدە شومىلىپ جۇرگەندە, كەنەت سۋعا كەتىپ قالا جازداعان. بىراق كەتپەدى. باقىتىنا وراي, ونى ەليس بلەيز اتتى ايەل قۇتقارىپ قالعان. ەندى مىنا قىزىققا قاراڭىزشى. ارادا سەگىز جىل وتەدى. رودجەر 12 جاسقا كەلگەندە ءدال وسى سالەم قالاسىنا قايتادان جولى ءتۇسىپ, تەڭىز جاعاسىندا جۇرگەندە, سۋعا باتىپ بارا جاتقان ءبىر ەر كىسىنى كوزى شالىپ, جاعاعا الىپ شىعادى. كەيىن سۇراسا كەلگەندە, ول ەر ادام باياعى ءوزىن قۇتقارعان ايەلدىڭ كۇيەۋى بولىپ شىققان ەكەن.
ەڭ الىپ ۇشاق
امەريكالىق «Radia» كومپانياسى جۇك تاسىمالدايتىن الەمدەگى ەڭ ۇلكەن ۇشاق جاساپ جاتىر.
كولورادو شتاتىنداعى ستارتاپ جوبانى «WindRunner» دەپ اتادى. قازاقشالاساق, «جەلمەن جارىساتىن» الىپ ۇشاقتىڭ ۇزىندىعى – 109 مەتر ( فۋتبول الاڭىنىڭ ۇزىندىعىنداي), قاناتىنىڭ كەڭدىگى – 79,6 مەتر بولماق. سونىمەن قاتار ول 80 تونناعا دەيىنگى جۇكتى تاسىمالداي الاتىن مۇمكىندىككە يە. بۇل دەگەنىمىز ءۇش وليمپيادالىق ءجۇزۋ باسسەينى سىيىپ كەتەتىندەي جەتكىلىكتى كولەم. سالىستىرىپ ايتساق, ازىرشە ەڭ الىپ دەگەن «بوينگ 747» ۇشاعىنان 12 ەسە كوپ كورسەتكىش.