تبيليسيدەگى تاريحي جەڭىس

وسى ساپار قارساڭىندا سەمسەرلەسۋدەن قازاقستاننىڭ مەملەكەتتىك جاتتىقتىرۋشى تيمۋر بايتاسوۆ: «قا­زىرگى كەزدە ءبىز وڭتۇستىك كورەيا قۇرا­ماسىنان 26 ۇپاي وزىپ تۇرمىز. ياعني وليمپيادانىڭ جولداماسىنا يەلىك ەتۋگە مۇمكىندىك زور. ول ءۇشىن شپاگاشىلارىمىز قاپ تاۋى بوكتەرىندە بارىنشا ناتيجەلى ونەر كورسەتۋگە ءتيىس. سونىمەن قاتار ازياداعى باستى قارسىلاستارىمىز الدىمىزدى وراپ كەتپەۋى كەرەك. سوندا وتانداستارىمىز پاريجدەگى ويىندارعا تولىق قۇرامدا قاتىسادى» دەپ ءوز جوسپارلارىمەن بولىسكەن ەدى.

مايتالمان ماماننىڭ ايتقانى ءدوپ كەلدى. اتالعان جارىستا وڭتۇستىك كورەيانىڭ شپاگاشىلارى 1/8 فينالدا چەحيا قۇراماسىنا ەسە جىبەرىپ, ۇزدىكتەر قاتارىنان كورىنە المادى. ال ءبىزدىڭ جىگىتتەر قارسى كەلگەندەردى قوعاداي جاپىرىپ, شيرەك فينالدا وليمپيادا چەمپيونى دەگەن اتاعى بار جاپونيا قۇراماسىنا جەر سيپاتىپ كەتتى. جار­تىلاي فينالدا چەحياعا جول بەرگەن جەرلەستەرىمىز ودان كەيىن يتاليانى ۇتىپ, قولا مەدالدى قورجىنعا سالدى. سول ارقىلى قازاقستان قۇراماسى ءوز تاريحىندا تۇڭعىش رەت وليمپيا ويىندارىندا تولىق قۇرامادا ونەر كورسەتۋگە مۇمكىندىك الدى. بۇل كوماندانىڭ ساپىندا ەلمير ءالىمجانوۆ, رۋسلان قۇربانوۆ, ەرلىك سەرتاي جانە ۆاديم شارلايموۆ سىندى سايىپقىراندار ونەر كورسەتتى.

جارىس اياقتالعان بەتتە باق وكىل­دەرىنە سۇحبات بەرگەن كوماندا ساپىن­داعى ەڭ تاجىريبەلى سپورتشى ەلمير ءالىمجانوۆ: «مەن ءۇشىن بۇل – بەسىنشى وليمپيادالىق تسيكل. وسىعان دەيىن ءتورت رەت اتالعان جارىستا تولىق قۇرامدا سايىسقا تۇسۋگە مۇمكىندىگىمىز بولدى. بىراق سوڭعى ساتتەردە جولداما ۋىستان شىعىپ كەتە بەردى. اقىرى تبيليسيدە كوزدەگەن ماقساتىمىزعا قول جەتكىزدىك. ەندى ءۇش سپورتشى جەكەلەگەن سايىس­تا جانە بارلىعىمىز كوماندالىق باسەكەدە باق سىنايمىز. بۇل ءبىز ءۇشىن تاريحي جەڭىس بولدى», دەپ اعىنان جارىلدى.

جەكەلەگەن سايىستا ەڭ ۇزدىك ناتي­جەنى رۋسلان قۇربانوۆ كورسەتتى. ول شيرەك فينالعا دەيىن جەتتى. سول مەجەدە وتانداسىمىز الەم چەمپيوناتىنىڭ قولا جۇلدەگەرى, بەلگيالىق نەيسەر لويولاعا جول بەردى. ناتيجەسىندە قۇر­بانوۆ بەسىنشى ورىندى قاناعات تۇتتى.