15 ناۋرىز – قايىرىمدىلىق, مەيىرىمدىلىك پەن تاتۋ كورشىلىككە شاقىرۋ كۇنى. بۇل كۇنى شىمكەنتتەگى 10216 مەن 55652 اسكەري بولىمدەرىنىڭ قىزمەتشىلەرى كورۋ قابىلەتى جەڭىل جانە اۋىر بۇزىلعان بالالارعا ارنالعان №33 «اقبوتا» تۇزەتۋ بالاباقشاسىنا ارنايى ات باسىن بۇردى. ونداعى ماقسات – بالالارمەن پاتريوتيزم تۋرالى اڭگىمە ءوربىتىپ, ويىنشىقتار مەن ءتاتتى سىيلىقتار تارتۋ ەتۋ.
اۋە قورعانىسى كۇشتەرىنىڭ وفيتسەرلەرى بالالارعا ءوز قىزمەتىنىڭ ەرەكشەلىكتەرى مەن وتانىمىزدىڭ اۋە شەكارالارىن قورعاۋداعى ماڭىزى جونىندە قىزىقتى اڭگىمەلەپ بەردى. ءوز كەزەگىندە بالالاردى اسكەري قىزمەتشىلەردىڭ كۇندەلىكتى ءومىرى مەن اسكەردەگى باسقا دا كوپتەگەن قىزىق ەرەكشە سەزىمگە بولەدى. اسىرەسە بۇلدىرشىندەر اسكەري تەحنيكا جايىنداعى اڭگىمەلەردى كەرەمەت اسەرگە بەرىلە وتىرىپ تىڭدادى. ولاردىڭ كوزدەرىنەن اسكەري سالاعا دەگەن قۇشتارلىق پەن قىزىعۋشىلىقتىڭ ۇشقىنى ويانعانىن اڭعارۋ قيىن ەمەس ەدى. سونىمەن بىرگە تاربيەلەنۋشىلەر اسكەري فورمانى دا اسا ءبىر زور سەزىممەن تاماشالاپ, ءتىپتى قولدارىمەن ۇستاپ كوردى. بۇل ورايدا كەلگەن قوناقتار بالالارعا اسكەري شەۆروندار مەن ايرىقشا بەلگىلەردى قالاي اجىراتۋ مەن تانۋدى ۇيرەتتى.
بۇلدىرشىندەرمەن تانىسقاننان كەيىن اسكەري قىزمەتشىلەر ولاردى كەلە جاتقان ناۋرىز مەرەكەسىمەن دە قۇتتىقتادى. اسكەريلەر وزدەرىمەن بىرگە الا كەلگەن تاتتىلەر مەن دامىتۋشى ويىنشىقتاردى سىيعا تارتتى.
10216 اسكەري ءبولىمى كومانديرىنىڭ ورىنباسارى مايور دىنمۇحامەد نۇراقاەۆتىڭ ايتۋىنشا, ناۋرىزناما كۇنتىزبەسى بويىنشا الداعى ون كۇن ءتۇرلى تاقىرىپپەن مەرەكە رەتىندە اتاپ وتىلمەك. ناۋرىز مەيرامىنىڭ باستى ەرەكشەلىگى – جىل باسىنىڭ سيمۆولى ءارى ۇلتتىق داستۇرلەر مەن ادەت-عۇرىپتاردى جاڭعىرتۋعا ەرەكشە مۇمكىندىك بەرەتىن ءمانى بار مەرەكە.
«بۇگىنگى كەزدەسۋدە ءبىز بالالارعا كەلەشەكتە ۇقىپتى ازامات بولىپ وسۋگە تالپىندىراتىن اسەرلى سوزدەر ايتتىق. ولاردى ەلىمىزدىڭ ناعىز پاتريوتى بولىپ قالىپتاسۋعا, حالقىمىزدىڭ ادەت-عۇرپىن قۇرمەتتەيتىن مادەنيەتتى جان بولىپ جەتىلۋگە ۇندەدىك. وسىلايشا, بالالار كىشكەنتايىنان دۇرىس تاربيە الىپ وسسە, كەلەشەكتە ونداي ۇرپاقتان جاناشىر ازامات, قيىن ساتتە ءوزارا كومەك پەن قولداۋ بىلدىرەتىن ناعىز ەلدىڭ ۇلاندارى جەتىلىپ شىعادى. ءبىز ءۇشىن ەڭ باستىسى بالالاردىڭ جانارىنداعى قۋانىشىن كورۋ بولدى. ودان ارتىق بىزگە العىس تا, سىي-سياپات تا جوق», دەدى مايور د.نۇراقاەۆ.
كەزدەسۋ سوڭىندا تاربيەشىلەر بۇلدىرشىندەرمەن بىرگە اسكەريلەرگە وتانىمىزدىڭ شەكاراسىن قورعاۋ جولىنداعى ەڭبەكتەرى ءۇشىن العىستارىن جاۋدىرىپ, بالالاردىڭ شىعارماشىلىق توبى دايىنداعان ارنايى مەرەكەلىك كونتسەرتىن قويدى.
شىمكەنت