بىلتىر مەملەكەت باسشىسى قاسىم-جومارت توقاەۆ: «ەل تاريحىندا ايرىقشا ورنى بار تاعى ءبىر ايماق – اتىراۋ وبلىسى. ونداعى ايگىلى سارايشىق قالاسىندا اتاقتى حاندارىمىز ورداسىن تىككەن. مەن ۇلتتىق قۇرىلتايدىڭ كەلەسى وتىرىسىن وسى شەجىرەلى ايماقتا وتكىزۋدى ۇسىنامىن», دەگەن ەدى. بۇگىن اتىراۋدا پرەزيدەنتتىڭ قاتىسۋىمەن ۇلتتىق قۇرىلتايدىڭ ءۇشىنشى جيىنى وتەدى. ال كەشە قۇرىلتاي قارساڭىندا ۇيىمداستىرىلعان پلەنارلىق باسقوسۋدا ۇلتتىق قۇندىلىقتار مەن ءبىلىم ماسەلەسى, وتباسىنداعى تاربيەگە باسا ءمان بەرىلدى.
«ازاماتتىق قوعامنىڭ» ايتارى كوپ
پارلامەنت دەپۋتاتتارى, قوعام قايراتكەرلەرى مەن قوعام بەلسەندىلەرى جانە تانىمال زاڭگەرلەر قاتىسقان ۇلتتىق قۇرىلتاي جيىنىنىڭ ءبىرىنشى كۇنى «ازاماتتىق قوعام», «مادەنيەت. ونەر. رۋحانيات», ء«بىلىم جانە عىلىم», «الەۋمەتتىك-ەكونوميكالىق دامۋ» دەپ اتالاتىن ءتورت سەكتسيا جۇمىس ىستەدى. ەكى كۇنگە جالعاساتىن جيىندا بارلىق وڭىردەن كەلگەن قۇرىلتاي مۇشەلەرى ەل دامۋىنىڭ باعىت-باعدارىن ايقىندايتىن وزەكتى ماسەلەلەردى تالقىلايدى.
پرەزيدەنتتىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى رۋسلان جەلدىبايدىڭ توراعالىعىمەن وتكەن «ازاماتتىق قوعام» سەكتسياسىندا ۇلتتىق قۇرىلتاي پلاتفورماسىنداعى وزەكتى ماسەلەلەر كوتەرىلىپ, شەشۋ جولدارى تالقىلاندى.
باسقوسۋدا قۇرىلتاي مۇشەلەرى قوعام بىرلىگىنە, ءتارتىپ پەن زاڭدىلىقتىڭ ساقتالۋىنا جانە جالپىادامزاتتىق قۇندىلىقتاردى ناسيحاتتاۋعا باعىتتالعان شارالارعا كەڭىنەن توقتالىپ, وسى سالاداعى وزەكتى ماسەلەلەردى قوزعادى. سونداي-اق ولار تالقىلاۋ بارىسىندا قازىرگى تاڭدا كۇن تارتىبىنەن تۇسپەي كەلە جاتقان ماڭىزدى ماسەلەلەر – ازاماتتىق قوعامدى دامىتۋ, زاڭ ۇستەمدىگىن ورناتۋ, ادام قۇقىعىن قورعاۋ, حالىقتىڭ قۇقىقتىق ساۋاتىن ارتتىرۋ جانە زورلىق-زومبىلىققا, حاراسسمەنتكە جول بەرمەۋ جايىنا ەرەكشە نازار اۋداردى. پرەزيدەنت كومەكشىسى جيىندا ايتىلعان قۇقىقتىق ماسەلەلەر نازاردان تىس قالمايتىنىن اتاپ ءوتتى. سەكتسيادا جەرگىلىكتى اكىمدەردى سايلاۋدىڭ ناتيجەسى تۋرالى دا ماسەلە قوزعالدى.
«جەرگىلىكتى جەردەگى سايلاۋ – ەلىمىزدەگى ماڭىزدى رەفورمانىڭ ءبىرى. سوڭعى سايلاۋ اۋداندار مەن اۋىلداردا تۇرعىنداردىڭ قىزىعۋشىلىق تانىتقانىن كورسەتتى. ەندى ەل ازاماتتارى سايلاۋ ۇدەرىسىنە بارىنشا قاتىسۋعا تىرىسىپ وتىر. ولار اكىمدى وزدەرى تاڭداپ, بەلگىلى ءبىر ءىس-شارالاردىڭ ورىندالۋىن سۇرايتىن بولادى. ءبىز سايلاۋ ناتيجەسىنە تالداۋ جۇرگىزەمىز», دەدى ر.جەلدىباي.
سەسسيا كەزىندە بايانداما جاساعان ادىلەت ءمينيسترى ازامات ەسقاراەۆ مەملەكەت باسشىسىنىڭ تىكەلەي تاپسىرماسىمەن قۇرىلعان ۇلتتىق قۇرىلتاي بۇگىندە قوعامداعى وتكىر ماسەلەلەردى تالقىلاپ, شەشىمىن تاباتىن جالپىۇلتتىق الاڭعا اينالعانىنا توقتالدى.
«مەملەكەت باسشىسى 2023 جىلعى 10 شىلدەدە قول قويعان «ونلاين-پلاتفورمالار جانە ونلاين-جارناما تۋرالى» زاڭ ونلاين ورتانى قالىپتاستىرۋعا باعىتتالعانىن اتاپ وتكەن ءجون. زاڭنىڭ ماڭىزدى جاڭاشىلدىقتارىنىڭ ءبىرى – ونلاين-پلاتفورمالاردىڭ ءوز ينتەرفەيسىن قازاق تىلىنە اۋدارۋدى مىندەتتەۋى. دەربەس دەرەكتەردى قورعاۋ, پايدالانۋشىلاردىڭ شاعىم بەرۋ مۇمكىندىگى, ونلاين-پلاتفورمالارداعى كونتەنتتى مودەراتسيالاۋ, الەۋمەتتىك جەلىلەردى پايدالانۋشىلار مەن اسەر ەتۋشىلەردىڭ قۇقىقتارى مەن مىندەتتەرى قاراستىرىلادى. سونداي-اق زاڭ جالعان اقپارات تاراتقانى ءۇشىن اكىمشىلىك جاۋاپكەرشىلىكتى قاراستىرادى. بۇل نورما قازىردىڭ وزىندە ارەكەت ەتە باستادى, بۇل جالعان اقپاراتپەن كۇرەسۋدىڭ ماڭىزدى ءتاسىلىن كورسەتەدى», دەدى مينيستر.
ا.ەسقاراەۆ قازىرگى ۋاقىتتا جۋرناليستەردىڭ ادەپ كودەكسى قابىلدانۋ بارىسىنا دا توقتالدى. «ادالدىق, وبەكتيۆتىلىك, ادىلدىك, پىكىرلەردىڭ ءپليۋراليزمى جانە ادام قۇقىقتارىن قۇرمەتتەۋ جۋرناليستەر قىزمەتىنىڭ نەگىزگى ەرەجەسى بولۋعا ءتيىس», دەدى مينيستر.
بىرەگەي پلاتفورماداعى باستى ماسەلەلەر
مادەنيەت جانە اقپارات ءمينيسترى ايدا بالاەۆانىڭ جەتەكشىلىگىمەن وتكەن «مادەنيەت. ونەر. رۋحانيات» سەكتسياسىنىڭ وتىرىسى دا قىزۋ تالقىلاۋلار مەن ۇسىنىستارعا تولى بولدى. ءمينيستردىڭ ايتۋىنشا, ۇلتتىق قۇرىلتاي ۇلت زيالىلارىنىڭ قوعامداعى قوردالانعان ماسەلەلەردى تالقىلايتىن, ەل دامۋىنىڭ باعىت-باعدارىن ايقىندايتىن بىرەگەي پلاتفورماعا اينالىپ وتىر. ۇلتتىق قۇرىلتايدىڭ تۇركىستان تورىندە وتكەن ەكىنشى وتىرىسىنان كەيىن جۇمىس فورماتى تۇبەگەيلى وزگەرگەن.
«ەلىمىزدە «مەملەكەتتىك ناگرادالار تۋرالى» زاڭعا وزگەرىستەر ەنگىزىلىپ, «قازاقستاننىڭ حالىق جازۋشىسى» اتاعى قايتارىلدى. بىلتىر «قازاقستاننىڭ حالىق جازۋشىسى» اتاعىنا ت.ابدىك ۇلى, س.ەلۋباەۆ, ب.نۇرجەكەەۆ, س.سماتاەۆ, ا.اشيروۆ جانە ل.شاشكوۆا يە بولدى. پرەزيدەنت جارلىعىمەن «ازىرەت سۇلتان» مەملەكەتتىك تاريحي-مادەني مۇراجاي-قورىعىنا ۇلتتىق مارتەبە بەرىلدى. استانا, الماتى, شىمكەنت قالالارى مەن وبلىستاردىڭ وڭىرلىك رامىزدەرىن ازىرلەۋ جانە قولدانۋ تۋرالى ۇلگىلىك ەرەجەنىڭ جوباسى دايىندالدى. ياساۋيتانۋ عىلىمي ورتالىعىنىڭ جۇمىس تۇجىرىمداماسى جانە ءۇش جىلدىق جۇمىس جوسپارى ازىرلەندى», دەدى مينيستر.
ول, سونداي-اق, بيىل ەلىمىزدە وتەتىن V دۇنيەجۇزىلىك كوشپەلىلەر ويىندارىنا دا توقتالدى. كوشپەلىلەر ويىنىن وتكىزۋ ءۇشىن پرەمەر-ءمينيستردىڭ وكىمىمەن ۇيىمداستىرۋ كوميتەتى قۇرىلعانىن اتاپ ءوتتى.
«قازىر V دۇنيەجۇزىلىك كوشپەلىلەر ويىنىن وتكىزۋ جونىندە دايىندىق ءجۇرىپ جاتىر. «قازسپورتينۆەست» اق بازاسىندا ۇيىمداستىرۋ كوميتەتىنىڭ اتقارۋشى ديرەكتسياسى قۇرىلدى. ال 10 قاڭتاردا ۆيك ستيلىندە قالانى بەزەندىرۋ باعدارلاماسى باستالدى. وسى كەزگە دەيىن كوشپەلىلەر ويىنىنا 58 ەل قاتىساتىنىن راستادى», دەپ ءمالىم ەتتى ا.بالاەۆا.
ءمينيستردىڭ ايتۋىنشا, كرەاتيۆتى يندۋستريا وكىلدەرىنە ارنايى سالىقتىق جەڭىلدىكتەر قاراستىرىلعان. بۇدان بىلاي كرەاتيۆتى يندۋستريا قىزمەتىنىڭ 40 ءتۇرى بولشەك سالىقتىڭ ارنايى سالىق رەجىمىندە جۇمىس ىستەي الادى.
«كرەاتيۆتى بيزنەس جەكە تابىس, قوسىلعان قۇن جانە كورپوراتيۆتىك تابىس سالىقتارىنان بوساتىلادى. جەكە كاسىپكەر ءۇشىن 2-دەن 4%-عا دەيىن, جشس ءۇشىن 8%-عا دەيىن بىرىڭعاي سالىق تولەنەدى. ال مەملەكەتتىك جاستار ساياساتىنىڭ 2023-2029 جىلدارعا ارنالعان تۇجىرىمداماسى بەكىتىلدى. تۇجىرىمداما شەڭبەرىندە جاس كاسىپكەرلەرگە جىلدىق 2,5% جەڭىلدىكپەن نەسيە بەرۋ ەنگىزىلىپ وتىر. وسى كەزگە دەيىن 26 ملرد تەڭگەگە 5,5 مىڭنان اسا جوبا قارجىلاندىرىلدى. جۇمىس ورىندارىنا 467 مىڭ جاس ورنالاستىرىلدى», دەدى ول.
ءمينيستردىڭ دەرەگىنە سۇيەنسەك, «مەملەكەتتىك جاستار ساياساتى تۋرالى» زاڭعا NEET ساناتىنداعى جاستار ۇعىمىن بەكىتۋ بولىگىندە وزگەرىستەر ەنگىزىلگەن. بۇل جاستاردى جۇمىسقا ورنالاستىرۋ, ءبىلىم بەرۋ, بىلىكتىلىگىن ارتتىرۋدا جۇيەلى جانە اتاۋلى جۇمىستى جۇرگىزۋگە مۇمكىندىك بەرەدى. قازىر جاستار ساياساتى سالاسىنداعى ينديكاتورلاردى كۇشەيتۋ تەتىگى پىسىقتالىپ جاتىر.
ال ۇلتتىق قۇرىلتاي مۇشەلەرى ۇلتتىق قۇندىلىقتاردى ۇلىقتاۋ ماسەلەسىنە كوبىرەك نازار اۋداردى. ماسەلەن, ءماجىلىس دەپۋتاتى جاناربەك ءاشىمجاننىڭ پىكىرىنشە, ەلىمىزدە ماتەريالدىق ەمەس قۇندىلىقتاردى تۇگەندەۋ تۇبەگەيلى جولعا قويىلماي تۇر. ونىڭ ايتۋىنشا, ارقانىڭ دالاسىندا, ماڭعىستاۋدىڭ ويى مەن قىرىندا, ءار وڭىردە قازاقتىڭ ۇلتتىق قۇندىلىقتارى ءالى دە تولىق زەرتتەلگەن جوق. دەپۋتاتتىڭ پىكىرىنشە, قازىر ۇلتتىق رۋحى جالاڭاشتانعان ۇرپاقتىڭ بۋىنى قالىپتاستى. جاس بۋىننىڭ بەتىن ۇلتتىق قۇندىلىققا بۇرۋ كەرەك.
سارايشىق تاريحىن قايتا جاڭعىرتۋ قاجەت
قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆتىڭ پىكىرىنشە, اتىراۋ وبلىسىنداعى ورتاعاسىرلىق جايىق وزەنىنىڭ جاعالاۋىنداعى كونەنىڭ كوزى – سارايشىق قالاشىعىنا ماڭىز بەرىلىپ وتىرعانىنا توقتالدى. الايدا ەسكەرەتىن جايت بار.
«سارايشىق قالاسىنىڭ ءتۇپ تاريحىن زەرتتەۋ, قۇندىلىقتارىن دارىپتەۋ ءالى جەتكىلىكسىز. ونىڭ سەبەپتەرىن انىقتاعان ءجون. جالپى, مۇنايلى ولكەدە ەكى نارسە قولعا الىنۋعا ءتيىس. ونىڭ ءبىرى – بەيبارىستىڭ عىلىمي ورتالىعى بولۋى قاجەت دەپ ەسەپتەيمىن. بىلتىر اراب ەلىندە بولعان كەزىمىزدە سونداي ورتالىق قۇرىلعان ەدى. ارابتار ونى قازاقستاندا دا بىرلەسىپ قۇرۋعا ىنتالى بولىپ وتىر. ويتكەنى عالىمداردى جىبەرۋ, قارجىلاندىرۋ ماسەلەسى قامتىلعان ەدى. ءبىز داۋىلپاز اقىن ماحامبەتتى دە ۇمىتىپ كەتتىك. سول سەبەپتەن وعان دا ءبىر ورتالىق كەرەك. مەنىڭشە, اتىراۋ وڭىرىندەگى جوعارى وقۋ ورىندارى وسىعان جەتە كوڭىل ءبولۋى قاجەت. ارينە, تەك ۋنيۆەرسيتەتتەر ەمەس, وبلىستاعى مادەنيەت باسقارماسى, باسقا دا ورتالىقتار وسى ماسەلەنى قولعا السا دەگەن ۇسىنىسىمىز بار», دەدى م.قۇلكەنوۆ.
مينيستر ا.بالاەۆانىڭ ايتۋىنا قاراعاندا, ەلىمىزدە اسپان استىنداعى 12 مۋزەي بار. سونىڭ ءبىرى – سارايشىق مۋزەي-قورىعى. اتىراۋ وبلىسىنداعى ورتاعاسىرلىق سارايشىق قالاسىنىڭ تاريحىن قايتا جاڭعىرتۋ كوزدەلىپ وتىر.
«سارايشىق – قازاق دالاسىنداعى ەڭ كونە قالانىڭ ءبىرى. مۋزەيدىڭ اينالاسىندا زيراتتار بار. سۇيەكتەر شاشىلىپ جاتىر. مۇنىڭ ءبارىن تازالاۋ, رەتتەۋ جەرگىلىكتى اكىمشىلىكتىڭ نازارىندا بولادى. بۇل جۇمىستار اياقتالعان سوڭ, 2025 جىلدان كەيىن بىرلەسكەن ەكسپەديتسيا جۇمىسىن باستايمىز. ءبىر اي بۇرىن سارايشىق مۋزەي-قورىعىنىڭ ۇجىمىمەن كەزدەسىپ, حالىقارالىق دەڭگەيدە تانىتۋ ماسەلەسىن تالقىلادىق. باكۋدەگى تۇركى الەمىنىڭ مادەنيەتىن دامىتۋ قورى اياسىندا بىرلەسكەن ەكسپەديتسيا ۇيىمداستىرۋ, سارايشىق قالاسىن قايتا جانداندىرۋ ماسەلەسىن قاراستىرامىز», دەدى ا.بالاەۆا.
ۇلتتىق ادەبيەت ماسەلەسى دە قوزعالدى. قازاقستان جازۋشىلار وداعىنىڭ باسقارما توراعاسى م.قۇلكەنوۆ قازاق جازۋشىلارىنىڭ تۋىندىلارى الەم تىلدەرىنە اۋدارىلماي جاتقانىنا توقتالدى. ال «قازاق گازەتتەرى» جشس باس ديرەكتورى ديحان قامزابەك ۇلى بالالار ادەبيەتىنە, بالالار باسىلىمدارىنا قولداۋ كورسەتۋ ماسەلەسىن كوتەردى.
«كەيىنگى كەزدە بالالار ادەبيەتىنە قاتىستى ەكى جاقسى تەندەنتسيا بار. ءبىرىنشىسى – بالالار ادەبيەتىن قولداۋ. ەكىنشىسى – قالاماقىنىڭ ءوسۋى. قازىر بالالار ادەبيەتىنىڭ ماماندارى – اقىن, جازۋشىلارى وتە از. جالپى بالالارعا ارناپ شىعارما جازۋ – وتە قيىن ماسەلە. ۇلتتىق قۇندىلىق ماسەلەسى تاريحتى بىلۋمەن بايلانىستى. اكادەميالىق جەتى تومدىق تاريحتا بۇگىنگى كوتەرىلىپ وتىرعان ءبىراز ماسەلە, ونىڭ ىشىندە سارايشىق قالاسىنىڭ, التىن وردا ۇلىسىنىڭ تاريحى سەكىلدى جايتتار قالپىنا كەلەدى دەپ ويلايمىن», دەدى د.قامزابەك ۇلى.
ۇلتتىق قۇرىلتاي مۇشەسى باۋىرجان عۇبايدۋللين شەكارالىق ايماقتاردا تۇيتكىلدى ماسەلەنىڭ بار ەكەنىن اتاپ ءوتتى. ماسەلەن, باتىس قازاقستان وبلىسى رەسەيدىڭ بەس وبلىسىمەن شەكتەسەدى. كورشى ەلدىڭ شەكاراسىنا تاياۋ قونىستانعان اۋىلدار وتاندىق تەلە-راديو حابارىنا مۇقتاج بولىپ وتىر. ءموبيلدى بايلانىس اياسى تار.
«شەكاراداعى اۋىلداردىڭ جاستارىن كورشى ەلدىڭ جوعارى وقۋ ورىندارى بيۋدجەتتىك گرانتپەن وقۋعا كوپتەپ تارتىپ جاتىر. مۇستافا شوقايشا ايتقاندا, «بالا قاي تىلدە ءبىلىم السا, سول ەلگە قىزمەت ەتەدى». بۇل – الاڭداتارلىق جايت. تاعى ءبىر ماسەلەنى تارقاتار بولسام, تۇرعىندار سانى 50-دەن از بولسا, سول اۋىلدار جابىلۋى قاجەت. بۇل تالاپ شەكاراداعى اۋىلدارعا قولدانىلماسا ەكەن», دەيدى ب.عۇبايدۋللين.
ءماجىلىس دەپۋتاتى ەدىل ءجاڭبىرشيننىڭ دەرەگىنشە, لۋدومانيا ماسەلەسى ءالى دە ۋشىعىپ تۇر. وسىعان بايلانىستى ءماجىلىستىڭ ءبىر توپ دەپۋتاتى ارنايى زاڭ دايىنداعان. بۇعان ەلىمىزدەگى 350 مىڭ ادامنىڭ لۋدومانيا «دەرتىنە» شالدىققانى سەبەپ بولعان. ولاردىڭ ارقايسىسىندا 10 ملن تەڭگەگە دەيىن قارىزى بار.
«اۋىلدىڭ ماسەلەسى قاي كەزدە دە وزەكتىلىگىن جويماي كەلەدى. قازىر ەلدى مەكەندەر تۇرعىندارى ۇلتتىق ونەرگە شولدەپ وتىر. وسىعان بايلانىستى ونەر ادامدارىنىڭ گاسترولدىك ساپارىن ۇيىمداستىرۋعا بولماي ما؟ بىراق ايتپاۋعا بولمايتىن ءبىر جايت بار. ماڭعىستاۋداعى جاڭاوزەن قالاسىندا سپورتتىق نە مادەني ءىس-شارا وتكىزۋگە رۇقسات بەرىلمەيدى. نەگە بۇلاي؟» دەيدى ە.جاڭبىرشين.
بۇدان وزگە سەكتسيا كەزىندە وتباسىلىق زورلىق-زومبىلىققا, تەرىس ءدىني اعىمدارعا تىيىم سالۋ ماسەلەسى قوزعالدى. بار اڭگىمەنىڭ ءتۇيىنى – ۇلتتىق قۇندىلىقتى ۇلىقتاۋ.
تسيفرلاندىرۋ – ءبىلىم بەرۋدىڭ باستى ەلەمەنتى
ء«بىلىم جانە عىلىم» سەكتسياسىنىڭ وتىرىسىنا مودەراتورلىق جاساعان عىلىم جانە جوعارى ءبىلىم ءمينيسترى ساياسات نۇربەك جوعارى ءبىلىم بەرۋدى تسيفرلاندىرۋ قازىرگى الەمدەگى ءبىلىم بەرۋ جۇيەسىن دامىتۋدىڭ نەگىزگى ەلەمەنتى ەكەنىن اتاپ ءوتتى. ونىڭ ايتۋىنشا, تسيفرلىق تەحنولوگيالاردى ەنگىزۋ وقۋ ماتەريالدارىنىڭ قولجەتىمدىلىگىن ارتتىرۋعا, ءبىلىم ساپاسىن جاقسارتىپ, ءبىلىم الۋشىلار مەن وقىتۋشىلار ءۇشىن مۇمكىندىكتەردى كەڭەيتۋگە ىقپال ەتەدى.
سەكتسيا وتىرىسىنا قاتىسۋشىلار دا جوعارى ءبىلىم بەرۋدى تسيفرلاندىرۋ تەك تەحنولوگيالىق جاڭارتۋدى ەمەس, سونداي-اق كادرلاردى دايارلاۋ, ينفراقۇرىلىمدى قۇرۋ جانە پەرسپەكتيۆتى ءبىلىم بەرۋ باعدارلامالارىن ازىرلەۋدى قامتيتىن كەشەندى ءتاسىلدى قاجەت ەتەتىنىن العا تارتتى.
جيىندا مينيستر س.نۇربەك كەلتىرگەن دەرەكتەردىڭ ءبىرى – دۇنيەجۇزىلىك ەكونوميكالىق فورۋمنىڭ زەرتتەۋلەرى. سوعان سايكەس, بولاشاقتا 10 جۇمىس ورنىنىڭ 9-ى تسيفرلىق داعدىلاردى قاجەت ەتەدى جانە 2030 جىلعا قاراي تسيفرلىق داعدىلارعا دەگەن قاجەتتىلىك 55%-عا ارتادى.
«بۇل – قارقىندى تەحنولوگيالىق پروگرەستى ىنتالاندىراتىن كەرەمەت ديناميكا. قازىردىڭ وزىندە الەمدە ءبىلىم بەرۋ جۇيەلەرى كەزدەسەتىن بىرنەشە مەگاترەند ايقىن قالىپتاستى. ءبىرىنشى, جوعارى ءبىلىم بەرۋدى ديدجيتاليزاتسيالاۋ. وقىتۋ مەن وقىتۋ ۇدەرىسىندە زاماناۋي ءبىلىم بەرۋ تەحنولوگيالارىن قولدانۋ قاجەت. ەكىنشىدەن, IT داعدىلارىن دامىتۋعا ارنالعان ميكروبىلىكتىلىك بەرۋدىڭ ءوسۋى بايقالادى. ول ءۇشىن ميكروبىلىكتىلىك باعدارلامالارىن ىسكە قوسۋ جوسپارلانىپ وتىر. نانو دارەجەلەر مەن ميكروبىلىكتىلىك الۋ مۇمكىندىگى قاراستىرىلعان. ۇشىنشىدەن, تسيفرلىق الشاقتىقتىڭ ۇلعايۋى بايقالادى. ياعني تسيفرلىق كەڭىستىكتە وقۋعا قولجەتىمدىلىگى تومەن ادامداردىڭ بەلگىلى ءبىر ساناتى بار. تسيفرلىق قوعامدى قالىپتاستىرۋ ءۇشىن تەڭ قولجەتىمدىلىكتى قامتاماسىز ەتۋ جانە قوسىمشا ونلاين-ساباقتاردى ۇيىمداستىرۋ شارالارىن قابىلداۋ قاجەت», دەدى ول.
سونداي-اق, باسقوسۋدا جوعارى وقۋ ورىندارىنىڭ تسيفرلىق ارحيتەكتۋراسىن دامىتۋ, ەكونوميكانىڭ بارلىق سالاسىن تسيفرلاندىرۋ جاعدايىندا IT داعدىلارى بار كادر دايارلاۋ, بۇل باعىتتا ستۋدەنت, وقىتۋشى جانە اكىمشىلىك قىزمەتكەرلەرگە قويىلاتىن تالاپتاردى ارتتىرۋ ماسەلەلەرى دە جان-جاقتى ءسوز بولدى. سەكتسيا مودەراتورى ساياسات نۇربەك جيىندا ستۋدەنتتەردىڭ الەمدىك تسيفرلىق رەسۋرستارعا قولجەتىمدىلىگىن قامتاماسىز ەتۋ ءۇشىن بىرقاتار ءىس-شارا قابىلدانعانىن دا مالىمدەدى. ونىڭ ايتۋىنشا, ىنتىماقتاستىقتى دامىتۋ جانە ستۋدەنتتەردى جەتەكشى شەتەلدىك پروفەسسورلار كۋرستارىنا قولجەتىمدىلىگىن كەڭەيتۋ ماقساتىندا «Coursera», «Huawei», «Binance Kazakhstan», «Amazon», «Google» سياقتى ءىرى كومپانيالارمەن كەلىسسوزدەر جۇرگىزىلىپ, مەموراندۋمدارعا قول قويىلعان.
ۇلتتىق قۇرىلتاي قارساڭىندا ۇيىمداستىرىلعان پلەنارلىق باسقوسۋ پرەمەر-ءمينيستردىڭ ورىنباسارى تامارا دۇيسەنوۆانىڭ جەتەكشىلىگىمەن وتكەن «الەۋمەتتىك-ەكونوميكالىق جانە ايماقتىق دامۋ» تاقىرىبىنداعى ءتورتىنشى سەكتسيامەن قورىتىندىلاندى.
اتىراۋ وبلىسى