اقپان ايىندا Enbek.kz ەلەكتروندىق ەڭبەك بيرجاسىندا بەلسەندىلىكتىڭ تومەندەگەنى بايقالدى. ماسەلەن, قاڭتارمەن سالىستىرعاندا بوس جۇمىس ورىندار سانى 16,5 مىڭعا (-17%) ازايىپ, 80,8 مىڭدى قۇرادى, ال تۇيىندەمە سانى 77,6 مىڭعا (-41%) ازايىپ, 113,6 مىڭدى قۇرادى.
ايلار اراسىنداعى تۇيىندەمە سانىنىڭ كۇرت وزگەرۋى بىلىكتىلىگى جوق قىزمەتكەرلەردەن ۇسىنىستاردىڭ 84,8 مىڭنان 37,9 مىڭعا دەيىن نەمەسە 55%-عا ايتارلىقتاي تومەندەۋىنە بايلانىستى بولىپ تۇر.
سۇرانىسقا كەلسەك, بوس جۇمىس ورىندارىنىڭ 39,8 مىڭى (49%) – ورتا بىلىكتى ماماندارعا, 25,8 مىڭى (32%) – جوعارى بىلىكتى ماماندارعا ارنالعان. ال بىلىكتىلىگى تومەن بوس جۇمىس ورىندارىنا 15,2 مىڭ ادامنان (19%) كەلەدى.
اقپان ايىندا نەگىزگى سۇرانىستى ءبىلىم بەرۋ ۇيىمدارى (19,2 مىڭ بوس جۇمىس ورنى) جانە باسقا دا قىزمەت تۇرلەرىن ۇسىناتىن كاسىپورىندار (10 مىڭ بوس جۇمىس ورنى) قۇراپ وتىر. بۇل – بارلىق بوس جۇمىس ورىندارىنىڭ ۇشتەن ءبىرى.
اقمولا وبلىسىن قوسپاعاندا (4%-عا وسكەن), بارلىق وڭىردە بوس جۇمىس ورىندارىنىڭ سانى قىسقارعان. ماسەلەن, ەڭ ۇلكەن تومەن شاما تۇركىستان (-35%), جەتىسۋ (-34%) جانە ماڭعىستاۋ (-33%) وبلىستارىندا بايقالادى.
سۇرانىسپەن قاتار ۇسىنىس تا وسىنداي كۇيدە. تۇيىندەمە سانىنىڭ ازايۋى بارلىق ايماقتا, اسىرەسە, وڭتۇستىكتە بايقالدى. وندا بىلىكتىلىگى جوق جۇمىس ىزدەۋشىلەردىڭ سانى ايتارلىقتاي ازايدى. مىسالى, قىزىلوردا وبلىسىندا تۇيىندەمەنىڭ جالپى سانى 20,4 مىڭنان 7,4 مىڭعا دەيىن, ال جامبىل وبلىسىندا 14,1 مىڭنان 7,2 مىڭعا دەيىن قىسقاردى.
اقپان ايىندا بارلىق تۇيىندەمەنىڭ 50,5 مىڭىن (44%) – 16-35 جاس ارالىعىنداعى ىزدەنۋشىلەر, 30,2 مىڭىن (27%) – ورتا جاس (35-45 جاس) وكىلدەرى, تەك 10,8 مىڭىن (10%) زەينەت جاسقا دەيىنگى ادامدار ورنالاستىردى.
اقپان ايىندا جۇمىس بەرۋشىلەر ەڭ جوعارى جالاقى مولشەرىن ونەركاسىپتىك الپينيستەرگە (ورتا ەسەپپەن 1 ملن تەڭگەدەن باستاپ), باس قۇرىلىسشىلارعا (656 مىڭ تەڭگەدەن باستاپ) جانە جۇيەلىك ساۋلەتشىلەرگە (600 مىڭ تەڭگەدەن باستاپ) ۇسىندى.