قىزىلورداداعى س.ايتباەۆ اتىنداعى كوركەمسۋرەت گالەرەياسىندا قازاقستان ديزاينەرلەر وداعىنىڭ مۇشەسى, بەلگىلى فوتوسۋرەتشى شاكيماردان ءماجيت ۇلىنىڭ «تۇران ويپاتىنىڭ وركەنيەتى» اتتى كورمەسى اشىلدى.
گالەرەيانىڭ ەكى زالىنا ورنالاسقان فوتولار شيرەك عاسىرداعى تىنىمسىز ەڭبەك جەمىسى. مۇندا اسىرەسە تاريحقا قىزىققاندار مەن بولاشاق ارحەولوگتەر ءۇشىن دەرەك الار تۋىندى كوپ. ويتكەنى شاكيماردان ءماجيت ۇلى ەجەلگى وركەنيەت ءىزى ساقتالعان وڭىردەگى تاريحي ورىندار مەن كونە كومبەلەردى تاسپالاعان فوتوسۋرەتشى.
كورمەنىڭ اشىلۋ سالتاناتىندا وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى قۋانىش جانۇزاقوۆ, جىراۋ, قازاقستاننىڭ ەڭبەك سىڭىرگەن قايراتكەرى الماس الماتوۆ, وبلىستىق تاريحي-ولكەتانۋ مۋزەيىنىڭ ديرەكتورى ساپار كوزەيباەۆ كورمە يەسىنىڭ ءوڭىردىڭ مادەني-رۋحاني فوتوشەجىرەسىن جاساۋداعى ەڭبەگىن اتاپ ءوتتى.
كورەرمەن نازارىنا كورمەدەگى سىرداعى ساقتار تاريحىنان سىر شەرتەتىن قالالار مەن قورعاندار, ورتاعاسىرلارداعى كەسەنەلەر بىردەن ىلىنەدى. ەكى عاسىردان استام تاريحى بار قىزىلوردا قالاسىنىڭ كەشەگىسىنە كۋاگەر ەسكەرتكىشتەر مەن عيماراتتار, سىردىڭ سۇلۋ تابيعاتى بەينەلەنگەن فوتولار دا وسىندا.
وبلىستىق تاريحي-ولكەتانۋ مۋزەيىنىڭ قۇرىلعانىنا 85 جىل تولۋىنا بايلانىستى ۇيىمداستىرىلعان كورمەدە اۆتوردىڭ جەكە قورىنداعى فوتواپپارات تۇرلەرى, سۋرەتتەرى ەنگەن كىتاپتار دا قويىلدى.
قىزىلوردا