كەزەكتى ۇبت

ۇبت-عا تىركەلۋ 10 ناۋرىزعا دەيىن ۇلتتىق تەس­تىلەۋ ورتالىعىنىڭ app.testcenter.kz. سايتىندا نەمەسە UTO قوسىمشاسى ارقىلى جۇرگىزىلەدى. ۇلتتىق تەستىلەۋ ورتالىعىنىڭ حابارلاۋىنشا, قازىردىڭ وزىندە 110 مىڭ ادام ۇبت-عا قاتىسۋعا ءوتىنىش بەرگەن ەكەن. تەستىلەۋگە تىركەلۋ ۋاقىتى ءالى اياقتالماعانىن ەسكەرسەك, ۇمىتكەرلەر سانى ءالى دە ارتۋى مۇمكىن.

ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, وتكەن جىلعى مەكتەپ جانە كوللەدج تۇلەكتەرى, قازاقستان ازاماتى بولىپ تابىلمايتىن ۇلتى قازاق تۇلعالار, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى. قاتىسۋشىلار تەستىلەۋ وتكىزىلەتىن ورىندى, كۇندى جانە ۋاقىتتى وزدەرى تاڭدايدى.

ۇبت-داعى پاندەردىڭ سانى وزگەرىسسىز قالدى, ياعني ۇشەۋى مىندەتتى جانە ەكەۋى تاڭداۋ بويىنشا. الايدا «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. ال بەيىندى پاندەردىڭ سۇراقتار سانى ارتىپ, 40 تەست تاپسىرمانى قامتىدى. اتاپ وتسەك, بەيىندى پاندەردە بەرىلگەن تىزىمنەن ساي­كەستىكتى انىقتاۋعا ارنالعان 5 تاپسىرما قوسىلدى.

وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراقتى قۇرادى. سونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندى ءپان بويىنشا 40 تاپسىرما. جوعارى بالل – 140, بۇل دا وزگەرىسسىز قالدى. تەستىلەۋ ۋاقىتى – 4 ساعات (240 مينۋت). ايتا كەتەيىك, ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالادى.

10 اقپاندا قاڭتار ۇبت-سى اياقتالدى, جىل باسىن­داعى تەستىلەۋگە 134 مىڭعا جۋىق ادام قاتىستى. ونىڭ ىشىندە تالاپكەرلەردىڭ 76,4%-ى قازاق تىلىندە, 23,5%-ى ورىس تىلىندە, 83 ادام اعىلشىن تىلىندە تەستىلەۋدەن ءوتتى. ۇبت باستالعالى شەكتى ۇپايدى 77,5%-عا جۋىق تالاپكەر جينادى. ورتاشا ۇپاي سانى 69-دى قۇرادى. ەڭ جوعارى بالل – 137. جالپى, 72 تالاپكەر 130-دان جوعارى ۇپاي جينادى.