1 ناۋرىز − العىس ايتۋ كۇنى. 2015 جىلى كۇنتىزبەمىزگە ەنگەن جاڭا مەرەكەنىڭ ماڭىزى مەن ءمانى ايرىقشا. قىسىلتاياڭ قيلى كەزەڭدە قازاق توپىراعىنا تابان تىرەگەن ەتنوستار مەن تۇرعىلىقتى حالىقتىڭ اراسىنداعى دوستىقتى دارىپتەۋدى كوزدەيتىن مەيرام العاش رەت 2016 جىلى جالپى حالىقتىق سيپاتتا تويلاندى, دەپ جازادى Egemen.kz.
ستاليندىك رەجىم كەزىندە قازاقستانعا ءتۇرلى ەتنوستار - 800 مىڭعا جۋىق نەمىس, 102 مىڭ پولياك, 550 مىڭ سولتۇستىك كاۆكاز حالىقتارىنىڭ وكىلى, 18,5 مىڭ قيىر شىعىستاعى كورەي وتباسى قونىس اۋداردى. ساياساتتىڭ سالقىنىنان اتا جۇرتىنان الىسقا ۇزاۋعا ءماجبۇر بولعان جۇرتتى قازاق حالقى جارقىن پەيىلمەن قارسى الدى. ءوز كەزەگىندە قونىس اۋدارۋشىلار دا «اشتىقتا جەگەن قۇيقانىڭ اۋىزدان ءدامى كەتپەس» دەپ ءبىزدىڭ حالىقتىڭ زۇلمات جىلدارى جاساعان جاقسىلىعىن استە ۇمىتقان ەمەس.
1 ناۋرىز − قازاق حالقىنىڭ دارحان كوڭىلىنە وزگە ەتنوس وكىلدەرىنىڭ جاريا ىقىلاس ءبىلدىرۋ, العىس ايتۋ كۇنى.
وسى مەرەكەنىڭ مانىنە ۇقساس ريزاشىلىق ءبىلدىرۋ كۇنى: اقش, جاپونيا, يزرايل, ۆەتنام, قىتاي, بەلارۋس تاعى باسقا ەلدەردە دە تويلانادى.
جازۋشى كامال الپەيىسوۆا قازاقستاندا تويلاناتىن العىس ايتۋ كۇنىنىڭ مازمۇنىن بىلاي تۇسىندىرەدى: «قازاق حالقى ءۇشىن – قينالعاندارعا قامقورلىعىن ايامايتىن, جاساعان جاقسىلىعىن ساتپايتىن, قۇشاعىنا العان قانشا جۇرت قايىرىمدىلىعىن ايتىپ, ءتاۋ ەتىپ جاتسا ماساتتانبايتىن حالقىمىز ءۇشىن – بۇل باسقا ەلدەردە بار بولعاندىقتان بەلگىلەنگەن مەرەكە ەمەس, بۇل – قاجەتتىلىگىن ۋاقىتتىڭ ءوزى تالاپ ەتكەن, حح عاسىردىڭ زۇلماتى قايتالانباۋى ءۇشىن ونى باستان كەشكەن حالىقتار جادىسىن جاڭعىرتۋ ماقساتىندا پايدا بولعان مەرەكە».