قىتايدا قازاقستاننىڭ مادەني ورتالىعى اشىلادى. مادەنيەت جانە اقپارات ءمينيسترى ايدا بالاەۆا بەيجىڭگە جۇمىس ساپارى اياسىندا قحر مادەنيەت جانە تۋريزم ءمينيسترى سۋن ەليمەن كەزدەسىپ, جوبانىڭ جاي-جاپسارىن تالقىلادى. باستاما قىزمەتى مۋزەي, كىتاپحانا ءىسى, مۋزىكا جانە كينو ونەرى, ءتىل ۇيرەتۋ سىندى باعىتتارعا ەكپىن بەرەدى دەپ جوسپارلانىپ وتىر.
بۇگىندە قازاقستان مەن قىتاي اراسىنداعى دوستىق, تاتۋلىق جانە ۇزاقمەرزىمدى ستراتەگيالىق ارىپتەستىك قارىم-قاتىناس بەلسەندى دامىپ كەلەدى. پرەزيدەنت قاسىم-جومارت توقاەۆ قحر-عا رەسمي ساپارى اياسىندا سي تسزينپينمەن كەزدەسىپ, 2022 جىلى ەكى ەلگە ورتاق مادەني ورتالىقتار قۇرۋ تۋرالى كەلىسىمگە قول جەتكىزدى. ەلدەر اراسىنداعى مادەني ديالوگتى دامىتۋداعى بۇل ماڭىزدى قادام مادەنيەت پەن ونەر سالاسىنداعى ىنتىماقتاستىقتى نىعايتاتىنى انىق.
«قىتاي مەن قازاقستان – ۇزاق ۋاقىتتان بەرى ستراتەگيالىق وداقتاس, سونداي-اق بارلىق سالا بويىنشا تىعىز قارىم-قاتىناس ورناتقان سەرىكتەس. بۇگىنگى كەزدەسۋ ەكى ەل اراسىنداعى تاتۋلىقتى ودان ءارى نىعايتۋعا جانە ءوزارا ءتيىمدى ىنتىماقتاستىقتى دامىتۋعا بەرىك نەگىز بولدى. ءبىز ءوز تاراپىمىزدان ورتالىقتىڭ اشىلۋىنا قاتىستى بارلىق ماسەلەنى جەدەل شەشۋدە بارىنشا قولداۋ كورسەتەمىز», دەدى سۋن ەلي.
ساپار بارىسىندا قىتايداعى قازاقستان ورتالىعىنىڭ مازمۇندىق تۇجىرىمداماسى ازىرلەنىپ, عيمارات تاڭداۋعا قاتىستى ۇيىمداستىرۋشىلىق ماسەلەلەر مەن قۇقىقتىق اسپەكتىلەر پىسىقتالدى. سونداي-اق مينيسترلەر مادەنيەت سالاسىنداعى كەلىسىمدەرگە قول قويۋ ارقىلى بىرلەسكەن جۇمىستى كۇشەيتۋدى كوزدەيدى. ەكى ۆەدومستۆونىڭ ودان ءارى بايلانىسىن ارتتىرۋ ءۇشىن تەاتر جانە كونتسەرتتىك ۇجىمدار اراسىنداعى گاسترولدەر, كورمەلەر مەن كلاسسيكالىق ادەبيەت تۋىندىلارىن ءوزارا اۋدارۋ, باسىپ شىعارۋ جانە تاعى باسقا جوبالار قاراستىرىلعان.
ا.بالاەۆا قازاقستان ءۇشىن قىتايدان مۇراعات ماتەريالدارى مەن مادەني مۇرانى قايتارۋدىڭ ماڭىزىنا توقتالدى. وعان قوسا تسيرك ونەرى مەن حورەوگرافيا سالاسىنداعى ستۋدەنتتەر مەن وقىتۋشىلارعا ارنالعان قحر ماماندارىنىڭ شەبەرلىك سىنىپتارىن وتكىزۋ, كينەماتوگرافيا بويىنشا گرانتتار ءبولۋ, مۋزەي ءىسى سالاسىندا تاجىريبە الماسۋ جانە تاريحي-مادەني مۇرانى ساقتاۋ, رەستاۆراتسيالاۋ وزەكتى ەكەنىن اتاپ ءوتتى.
جۇمىس ساپارى بارىسىندا مينيستر قحر راديو جانە تەلەديدار ىستەرى جونىندەگى مەملەكەتتىك باسقارما باسشىسى تساو شۋمينمەن دە جۇزدەستى.
«قازاقستان-قىتاي سەرىكتەستىگى بارلىق سالادا جاقسى قارقىنمەن دامىپ كەلەدى. ەكى ەلدىڭ تەلەارنالارى بىرقاتار بىرلەسكەن جوبانى جۇزەگە اسىردى. ءبىز جاڭا فورماتتا كونتەنت جاساۋ ارقىلى ميكروسەريالدار مەن ەلدەر تۋرالى بەينەروليكتەر ءتۇسىرىپ, ولاردى تەلەديدارعا تاراتۋ باعىتىنداعى جۇمىستى كۇشەيتۋدى ۇسىنامىز», دەدى تساو شۋمين.
وتىرىستا ايدا بالاەۆا قحر تەلەارنالارىندا كوركەم, دەرەكتى, انيماتسيالىق فيلمدەردىڭ روتاتسيالانۋىنا قولداۋ سۇرادى. سونىمەن قاتار بىرلەسكەن سەريال, قازاقستاننىڭ كورىكتى جەرلەرى مەن مادەني نىساندارى تۋرالى روليكتەر تۇسىرۋدە كومەكتەسۋگە ءازىر ەكەنىن ايتتى. ىزىنشە مينيستر حابار تاراتۋ اۋقىمى بويىنشا الەمدەگى ەڭ ءىرى باق-تا كورسەتىلەتىن قىتايدىڭ تەلەۆيزيالىق شوۋلارىنا وتاندىق مادەنيەت وكىلدەرىنىڭ قاتىسۋىنا ەرەكشە قىزىعۋشىلىق تانىتاتىنىن قۇلاعدار ەتتى.
ال ا.بالاەۆانىڭ قحر «Global China Media Corporation» ءىرى مەديا كورپوراتسياسىنىڭ باس ديرەكتورى شەن حايسيۋنمەن كەزدەسۋىندە قىتايلىق تاراپ ەكى ەلدىڭ مادەني مۇراسى مەن مادەني قۇندىلىقتارىن ناسيحاتتاۋعا باعىتتالعان دەرەكتى فيلمدەر شىعارۋ تۋرالى كەلىسىم جاساۋدى ۇسىندى. قحر ۇلتتار ىستەرى جونىندەگى مەملەكەتتىك كوميتەت توراعاسى پان يۋەمەن جۇزدەسۋدە مينيستر قازاقستان تاريحىندا العاش رەت قۇرىلعان كوپۇلتتى «بىرلىك» ءان-بي ءانسامبلىنىڭ بەيجىڭگە گاسترولدىك ساپارىن ۇيىمداستىرۋدى قوزعادى.
مادەنيەت جانە اقپارات ءمينيسترىنىڭ بەيجىڭگە جۇمىس ساپارىندا قىتاي ۇلكەن تەاترىنىڭ ديرەكتورى ۆان نينمەن كەزدەسىپ, تاراپتار ەكى ەلدىڭ تەاتر ونەرىن دامىتۋ ماسەلەلەرىن تالقىلادى. قازاقستاندىق دەلەگاتسيا «ۇلكەن قىزىل ارمان» قويىلىمىن تاماشالاپ, بيىك ەستەتيكالىق دەڭگەيدە قويىلعان بي دراماسىنان ەرەكشە اسەر الدى. ايتا كەتەيىك, ناۋرىز مەيرامى قارساڭىندا قىتاي راديوستانسالارىندا قازاق كۇيلەرى بەرىلەدى.