رايىمبەك اۋدانىندا «ورتا قاقپاق» سۋ ەلەكتر ستانساسى پايدالانۋعا بەرىلدى. ونىڭ نومينالدىق قۋاتتىلىعى – 2,2 مۆت. قۇرىلىسى 2021 جىلى باستالعان جوبانىڭ جالپى قۇنى – 1,5 ملرد تەڭگە. بۇل الماتى وبلىسىنىڭ تاۋلى اۋدانىنداعى قۇنى 1 ملرد تەڭگەدەن اساتىن ەڭ ءىرى ينۆەستيتسيالىق جوبا سانالادى.
«ورتا قاقپاق» سۋ ەلەكتر ستانساسى جىلىنا 13 ملن كۆت ەلەكتر قۋاتىن وندىرەدى. مۇنداعى سۋ قۇبىرىنىڭ ۇزىندىعى – 4 شاقىرىم. «قاينار» قوسالقى ستانساسىنا ۇزىندىعى 12 شاقىرىم بولاتىن 10 كۆت-تىق جەلى تارتىلعان. وندىرىلگەن قۋات كوزى سول ارقىلى تاراتۋشى كومپانياعا جەتكىزىلىپ, ودان ءارى تۇتىنۋشىلارعا بەرىلەدى.
ء«بىزدىڭ وبلىس جەل, كۇن, سۋ سياقتى بالامالى ەنەرگەتيكا وندىرۋگە وتە ىڭعايلى. سول سەبەپتەن ونى دامىتۋعا ءتيىستىمىز. ونىڭ ەكولوگياعا دا, تۇرعىندارعا دا پايداسى مەن تيىمدىلىگى زور», دەدى اشىلۋ سالتاناتىنا قاتىسقان وبلىس اكىمى مارات سۇلتانعازيەۆ.
جوبانى جۇزەگە اسىرۋ بارىسىندا 45 ادام جۇمىسپەن قامتاماسىز ەتىلسە, ەندى اۆتوماتتى تۇردە باسقارىلاتىن زاماناۋي سۋ ەلەكتر ستانساسىندا ءتورت جەرگىلىكتى تۇرعىن تۇراقتى جۇمىس ىستەيدى.
«الماتى وبلىسىنىڭ دامۋىنا ءوز ۇلەسىمدى قوسقانىما وتە قۋانىشتىمىن جانە ءبىزدىڭ ينۆەستيتسيالار ءوڭىر حالقىنىڭ تۇرمىسى مەن ەكونوميكاسىنا قىرۋار پايداسىن تيگىزەدى دەپ ۇمىتتەنەمىن. جوبا باستاپقىدا 1,2 ملرد تەڭگەگە باعالانعانىنا قاراماستان, ينفلياتسياعا بايلانىستى قۇنى 1,5 ملرد-قا دەيىن ءوستى. ءبىز وزىمىزگە جۇكتەلگەن مىندەتتەردى ءساتتى ورىندادىق. قۋاتتىلىعى جىلىنا 13 ميلليون كۆت/ساع بولاتىن جوبا تۇتىنۋشىلاردى تۇراقتى ەنەرگيامەن قامتاماسىز ەتۋگە مۇمكىندىك بەرەدى. ونىڭ ۇستىنە ستانسانىڭ قۋاتى سۋ دەڭگەيىنىڭ وزگەرۋىنە بەيىمدەلەدى», دەدى جوبانىڭ ينۆەستورى ءارى جەتەكشىسى جانۇزاق قوناەۆ.
ىسكە قوسىلعان سۋ ەلەكتر ستانساسىنىڭ قۇرىلىسىن «بيزنەستىڭ جول كارتاسى» مەملەكەتتىك باعدارلاماسى اياسىندا «Damu» ينۆەستيتسيالىق قورىنىڭ قولداۋىمەن وسى جوباعا قاتىسۋشى «Tekes Energy» جشس قارجىلاندىردى.
الماتى وبلىسى