ماڭعىستاۋ وبلىسىندا پرەمەر-ءمينيستردىڭ ورىنباسارى سەرىك جۇمانعارين «سولتۇستىك-وڭتۇستىك» جانە تحكب كولىك دالىزدەرىن دامىتۋ ماسەلەلەرى بويىنشا كەڭەس وتكىزدى.
اقتاۋ پورتى مەن يراننىڭ سولتۇستىك پورتتارى اراسىندا جۇكتەردى تاسىمالداۋ جولعا قويىلعان «سولتۇستىك-وڭتۇستىك» حالىقارالىق كولىك ءدالىزى – بالامالى ساۋدا مارشرۋتتارىن دامىتۋ تۇرعىسىنان كەلەشەگى بار باعىت. ونىڭ شىعىس تارماعى ماڭعىستاۋ وبلىسى ارقىلى وتەدى.
كەڭەستە كولىك ۆيتسە-ءمينيسترى ماقسات قالياقپاروۆ ايتقانداي, سەرۆيستى جاقسارتۋ, جۇكتەردى جەتكىزۋ ۋاقىتىن قىسقارتۋ جانە اتالعان كولىك دالىزىندە «بىرىڭعاي تەرەزە» قاعيداتىمەن قىزمەت كورسەتۋ ءۇشىن قازاقستان, رەسەي جانە تۇرىكمەنستاننىڭ تەمىرجول اكىمشىلىكتەرى بىرلەسكەن كاسىپورىن قۇرۋدى جوسپارلاپ وتىر.
«وتكەن جىلدىڭ قورىتىندىسى بويىنشا «سولتۇستىك-وڭتۇستىك» ءدالىزى بويىنشا تەمىرجول كولىگىمەن تاسىمالدانعان جۇكتىڭ كولەمى 2,1 ملن توننانى قۇرادى. بۇل 2022 جىلدان 4%-عا ارتىق. 2027 جىلعا قاراي ءدالىزدىڭ كولىك وتكىزۋ الەۋەتى جىلىنا 6 ملن توننادان 10 ملن تونناعا دەيىن ۇلعايتىلاتىن بولادى», دەدى ماقسات قالياقپاروۆ.
ترانسكاسپي حالىقارالىق كولىك باعىتى (Tحكب) – شىعىس-باتىس باعىتتارىنا ماڭىزدى بالاما. ونىڭ وتكىزۋ قابىلەتى – 6 ملن توننا. 2023 جىلى تاسىمالداۋ كولەمى 2,76 ملن توننانى قۇرادى. بۇل – 2022 جىلدان 65%-عا جوعارى. 2024 جىلدىڭ باسىنان تاسىمالداۋ 274,2 مىڭ تونناعا جەتىپ, وتكەن جىلدىڭ كورسەتكىشىمەن سالىستىرعاندا 147%-عا ارتا تۇسكەن.
تحكب-دا ينفراقۇرىلىم مەن تەرمينالدىق قۋاتتاردى جاقسارتۋ, پورتتاردى كەڭەيتۋ, جىلجىمالى قۇرامدى ۇلعايتۋ, اكىمشىلىك كەدەرگىلەردى الىپ تاستاۋ جانە تاسىمالداۋشىلار ءۇشىن قولايلى جاعدايلار جاساۋ بويىنشا اۋقىمدى جۇمىستار جۇرگىزىلىپ جاتىر. مۇنىڭ ءبارى 2027 جىلعا قاراي اتالعان كولىك باعىتىنىڭ وتكىزۋ قابىلەتىن جىلىنا 10 ملن تونناعا دەيىن ارتتىرۋعا مۇمكىندىك بەرەدى.
ەڭ ءىرى جۇمىستاردىڭ قاتارىندا: «دوستىق – مويىنتى» تەمىرجول ۋچاسكەسىنىڭ ەكىنشى جولدارى جانە «الماتى» اينالما تەمىرجول جەلىسى, اقتاۋ تەڭىز پورتىنداعى كونتەينەرلىك حاب, قۇرىق پورتىنداعى «سارجا» كوپفۋنكتسيونالدى تەرمينالىن سالۋ جانە ەكى پورتتى تەرەڭدەتۋ جۇمىستارى بار.
سونداي-اق كولىك ۆيتسە-ءمينيسترى ماقسات قالياقپاروۆ ماڭعىستاۋ وبلىسىنىڭ اۋە جانە اۆتوموبيل كولىگى سالاسىندا جۇرگىزىلىپ جاتقان جۇمىستار تۋرالى حابارلادى. كەڭەس قورىتىندىسىندا سەرىك جۇمانعارين ماڭعىستاۋ وبلىسىنىڭ ەلدىڭ كولىك-لوگيستيكالىق جۇيەسىندەگى, اسىرەسە «سولتۇستىك-وڭتۇستىك» جانە تحكب دالىزدەرىندەگى ستراتەگيالىق ءرولىن اتاپ ءوتتى. ۆيتسە-پرەمەر ولاردى كەڭەيتۋ جانە وتكىزۋ قابىلەتىن ارتتىرۋ بويىنشا جۇرگىزىلىپ جاتقان جۇمىستاردى جانداندىرۋدى تاپسىردى.