جاقسىلىق جاساپ, جانىڭا شۋاق شاشۋ ءۇشىن اسا ءبىر جاعدايدىڭ قاجەتى جوق. مۇنى مىنا ءبىر ىزگىلىكتى ىسكە سۇيسىنگەندىكتەن ايتىپ وتىرمىز. تۋعانىنان سال اۋرۋىنا شالدىعىپ, ارباعا تاڭىلعان دوس تولەگەنوۆ نۇرا اۋدانىنداعى قارتتار ۇيىنە ەكى تەلەديدار تارتۋ ەتىپتى.
بالا جاسىنان تاعدىر تالكەگىنە تاپ بولعان دوس تولەگەنوۆ – ءبىرىنشى توپتاعى مۇمكىندىگى شەكتەۋلى جان. سىناققا سىنبادى. ەڭبەكتى ءسۇيدى. تەلەديداردان باستاپ ءتۇرلى تەحنيكاڭىزدى جاڭعاقشا شاعادى. ءتىلىن جەتىك تۇسىنەدى.
انەۋگۇنى اۋدان ورتالىعىنداعى قارتتار ۇيىنە ەكى تەلەديدار سىيعا تارتىپتى. قارتتار ۇيىندە مۇلدەم تەلەجاشىك جوق ەكەنىن ەستىگەن دوس نەسىپباي ۇلى: «قارتتارىمىز قالاي تەلەديدارسىز وتىرادى؟» دەگەن وي مازا بەرمەي قويدى. «قولىمنان كەلەتىن جاقسىلىعىم عوي. اۋەلى قازىنالارىمىزدى ريزا ەتۋىمىز كەرەك. سول كىسىلەردىڭ باتاسى ءسوزسىز قابىل بولادى. ءسويتىپ, ءوزىم ارنايى بارىپ, تابىستاپ كەلدىم. وزىمدە ەرەكشە قۋانىپ قالدىم», دەيدى.
«راسىمەن, ءبىراز ۋاقىت بولدى, قارتتارىمىز تەلەديداردان الىستاپ قالعان ەدى. دوس باۋىرىمىز قوس تەلەديدارىمەن ۇيىمىزگە كىرىپ كەلگەندە قارتتارىمىز قاتتى قۋاندى. جاقسىلىق جاساعىسى كەلگەن نيەتىنىڭ ءوزى تاۋداي عوي. ءسويتىپ, تەلەديداردى قوسىپ بەرگەن سوڭ, ءوزىمىز وتىرىپ شاي ىشتىك. جانسارايى باي ەكەن. ۇلكەندەر باتاسىن بەردى», دەيدى قارتتار ءۇيىنىڭ باسشىسى گۇلنار تۇسىپبەكوۆا.
بۇل قولى التىن دوس نەسىپباي ۇلىنىڭ العاشقى قايىرىمدىلىعى ەمەس. اۋىلداستارىنا ۇنەمى قارايلاسادى. ءتىپتى ازىق-ت ۇلىك سەبەتىن دە ۇلەستىرىپ وتىرادى. «وتاۋ تۆ», «ID تۆ» سەكىلدى قۇرىلعىلاردى سىيعا تارتىپ, ونىسىن ورناتىپ تا بەرەدى. جانى جاقسىلىق شۋاعىنا تولى شەبەردى اۋىلداستارى دا اسا قۇرمەتتەيدى.
شەبەردىڭ ەسىمى ەلىنە جاقسى تانىس. ءتىپتى قاراعاندى, استانادان دا ارنايى ىزدەپ كەلىپ, تۇرمىستىق تەحنيكالارىن جوندەتەتىن تۇتىنۋشىلار دا بار. سەبەبى بەلگىلى: تەحنيكانىڭ ءتىلىن ابدەن مەڭگەرىپ العان, جۇمىسىن ساپالى اتقارادى.
جارى گۇلنار ەكەۋى ءۇش بالا تاربيەلەپ وتىر. ۇلكەن ۇلى نۇراسىل اكەسىنە اجەپتاۋىر قولعابىس. كاسىپتەرىن جەتىلدىرۋ ءۇشىن بىلتىر ۇكىمەتتەن 1,3 ملن تەڭگە كولەمىندە گرانت العان. بۇل قاراجاتقا شاعىن شەبەرحاناسىنداعى جۇمىستى شيراتىپ, ءۇيىنىڭ جانىنداعى كولىكتىڭ توعىن جوندەيتىن اۆتوشەبەرحاناسىن جابدىقتاپ العان.
– جاقسى اۆتوەلەكتريكتەر وتە از. مەن ءومىر بويى توقپەن جۇمىس ىستەپ كەلەمىن. كولىگىنىڭ توعى اقاۋ بەرگەندەر دە كومەك سۇراپ كەلەتىن. سوندىقتان اۆتوەلەكتريك قىزمەتىن قوسا الىپ ءجۇرۋدى ءجون سانادىم. ءۇش كولىككە شاقتالعان گاراجىم بار. گرانت قاراجاتىنا كولىكتى دياگنوستيكالاۋ ءۇشىن قىمبات قۇرىلعىلار ساتىپ الدىم. ەندى الداعى ۋاقىتتا سۋبسيديالاناتىن جۇمىس ورىندارىنا بەس ادامدى جۇمىسقا ورنالاستىرۋدى ويلاستىرىپ وتىرمىن. ۇلىم كوللەدجدە اۆتوەلەكتريك ماماندىعىندا وقيدى. نەگىزگى كومەكشى – ۇلىم. بار ءۇمىتىم دە سوندا, – دەيدى شەبەر.
دوس نەسىپباي ۇلىنىڭ ومىرىندە مىنانداي دا كەدەرگى بولعان. پسيحياترلار «اقىل-ەسى كەم» دەپ ساراپتامالىق قورىتىندى جاساعان. بىردەن سوتقا جۇگىنىپ, ەڭبەككە جارامدى ەكەنىن دالەلدەپ شىققان. «قاجىدىم, قايراتىم از دەپ وتىرۋعا مۇلدەم ۋاقىتىم جوق», دەيدى ءوزى.
ءبىر جىلدارى دوس جول اپاتىنا ۇشىراپ, ەكى قولى بىردەي ىستەمەي قالعان كورىنەدى. اكەسى وزبەكستان ەلىندە ەم-دوم الىپ جاتقاندا, ۇلى نۇراسىل ۇيدەگى ءۇيىلىپ قالعان تەلەديدارلاردى ءوزى جوندەپ, تۇسكەن قاراجاتتى اكەسىنىڭ ەمىنە جونەلتىپ وتىرعان. ول كەزدە مەكتەپتە وقيدى.
اكەسى بالاسىنىڭ تەحنيكاعا قىزىعۋشىلىعىن كىشكەنتايىنان بايقاعان. ويىنشىق اكەلىپ بەرسە, ونى بۇزىپ, قايتا جينايدى ەكەن. التى جاسىندا العاش رەت قولىنا دانەكەرلەگىشتى الىپ, قۇرال-جابدىقتاردىڭ ءتۇر-ءتۇرىن اجىراتا بىلگەن. ءسويتىپ, اكە-شەشەسى شەبەرحانادان شىقپاعان نۇراسىلدىڭ تەوريالىق باعىت بويىنشا ءبىلىمىن تەرەڭدەتۋگە جولىن اشادى.
اكەسى مەن ۇلى ايىنا 30-عا جۋىق تاپسىرىس ورىندايدى. اۋىلدان الىستاماي-اق التىن قولىمەن وسىنداي كاسىپتى دوڭگەلەتىپ وتىر. ونىڭ ۇستىنە جاقسىلىق جاساۋدى ءومىر سالتىنا اينالدىرعان.
قاراعاندى وبلىسى,
نۇرا اۋدانى