وتاندىق عالىمدار قياردىڭ جاڭا سۇرپىن شىعاردى. كوكونىس بىرنەشە ءوڭىردىڭ اۋا رايىنا ءتوزىمدى. سوندىقتان بىرقاتار وبلىستاعى شارۋالار اراسىندا سۇرانىسقا يە بولعالى تۇر.
بۇل سۇرىپتى اقتوبەلىك زەرتتەۋشىلەر الماتىلىق ارىپتەستەرىمەن بىرگە جاساپ شىققان. قياردىڭ جاڭا سۇرپىن شىعارۋ ءۇشىن عالىمدار ءۇش جىلعا جۋىق ەڭبەك ەتكەن. قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ وقىتۋشىلارى الماتىلىق ارىپتەستەرىمەن بىرگە كوكونىستىڭ بەس ءتۇرلى تۇقىمىن الىپ, دالادا جانە جىلىجايدا كەشەندى تاجىريبە وتكىزدى. ناتيجەسىندە, اۋا رايى كۇرت قۇبىلمالى ايماقتاردا مول ءونىم بەرەتىن وسىمدىك تۇقىمىن الدى.
بيولوگيا عىلىمدارىنىڭ كانديداتى ءاليا بازارعاليەۆا جاڭا سۇرىپتى قولدانۋ ايماعىنىڭ اۋقىمدىعىن اتاپ: «بۇل سۇرىپ اقتوبە وبلىسىنا عانا جەرسىندىرىلمەگەن. الماتى, جامبىل, تۇركىستان, اقتوبە وبلىستارى جانە باسقا دا وبلىستاردىڭ اۋا رايىنا وسىرۋگە تولىعىمەن بولاتىن سورتتىڭ قاتارىنا جاتادى», دەدى.
عالىمدار تۇقىمنىڭ ساپاسىنا سەنىمدى بولىپ وتىر. سەبەبى توپىراققا تۇسكەن ءاربىر ءدانى جەردى جارىپ شىعادى ەكەن. سوعان ساي ءونىمى دە مول. وسىعان قوسا شىبىن-شىركەيسىز-اق توزاڭداناتىن قاسيەتى بار. وسىمدىكتى سۇرىپتاۋ ناتيجەلى بولعاندىقتان, ءتيىستى پاتەنت تە بەرىلدى. ەندىگى مىندەت – شارۋالارعا تابىستاپ, نارىققا جەتەرلىكتەي ەتىپ ءوسىرۋ.
اقتوبە وبلىستىق اۋىل شارۋاشىلىعى جانە جەر قاتىناستارى باسقارماسى باسشىسىنىڭ ورىنباسارى اسىلحان ابتيەۆ: ء«بىز عىلىمي زەرتتەۋدەن وتكەن تۇقىمدى ءىرى القاپتارعا سەبۋگە دايىنبىز. جەرگىلىكتى باعباندار اشىق اسپان استىندا جانە جىلىجايلارعا ەگىپ, ناتيجەسىن كورسە, اقتوبەلىك عالىمدار شىعارعان قيار تۇقىمىنا سۇرانىس جوعارى بولعالى تۇر», دەپ سەنىمىن ءبىلدىردى.